Navigation

Inhaltsbereich

Sessiun: 15.06.2016

Airbnb daventa pli e pli popular en Svizra e dat er moviment al martgà da pernottaziuns qua tar nus. Er en il Grischun sa derasa la plattafurma da sharing pli e pli e po esser ina gronda schanza per il turissem. Ma en il sectur giuridic èn avertas bleras dumondas ed i dat adina dapli critica. Gist en citads grondas engrevgeschia Airbnb numnadamain la mancanza d'abitaziuns, ed ils offerents d'abitaziuns dad Airbnb na pajan savens ni las taxas ni las taglias ch'els stuessan pajar. Uschia resultan dischavantatgs gist per l'hotellaria classica. Citads sco Berlin u San Francisco han reagì sin questas incunvegnientschas ed han scumandà cumplainamain la plattafurma. In scumond dad Airbnb u l'introducziun d'ina prescripziun legala birocratica è dentant la faussa via, perquai che talas plattafurmas cuntegnan in grond potenzial gist per il turissem ch'è gia strapatschà pulitamain. Igl è dentant uras ch'i vegnian stgaffidas en il sectur da las taxas e da las taglias las medemas premissas per l'hotellaria classica e per Airbnb.

 

Perquai sa drizzan las sutsegnadras ed ils sutsegnaders cun las suandantas dumondas a la regenza:

 

1. Tge tenuta ha la regenza envers plattafurmas da sharing resp. da pernottaziun sco Airbnb?

 

2. S'engascha la regenza activamain, per ch'i vegnia stgaffì – areguard las taxas e las taglias necessarias – sin via nunbirocratica in tractament egual tranter l'hotellaria classica e las plattafurmas da pernottaziun sco Airbnb, ed en tge furma fa ella quai?

 

3. S'engascha la regenza activamain, per ch'i vegnian stgaffidas – er areguard las ulteriuras prescripziuns per offerents da pussaivladads da pernottaziun commerzialas – sin via nunbirocratica las medemas premissas tranter l'hotellaria classica e las plattafurmas da pernottaziun sco Airbnb?

 

4. Tge stentas vegnan actualmain fatgas sin plaun naziunal e quant enavant s'engascha la regenza, per ch'i possia vegnir chattada ina soluziun optimala per il chantun Grischun?

 

5. Po – cun agid da l'incumbensa Caduff concernent la finanziaziun dal turissem en il chantun Grischun ch'è vegnida acceptada dal cussegl grond – vegnir stgaffida la premissa che tut ils locaturs d'immobiglias utilisablas turisticamain vegnian tractads en moda eguala en l'avegnir areguard las taxas e las taglias ch'èn da pajar, e fin cura ha la regenza l'intenziun da realisar l'incumbensa Caduff?

 

Cuira, ils 15 da zercladur 2016

 

Schneider, Caluori (Cuira), Berther (Mustér), Blumenthal, Bondolfi, Brandenburger, Caduff, Casanova (Glion), Casutt-Derungs, Cavegn, Caviezel (Cuira), Crameri, Darms-Landolt, Davaz, Della Vedova, Dosch, Epp, Fasani, Florin-Caluori, Foffa, Geisseler, Hardegger, Heiz, Holzinger-Loretz, Kappeler, Kunfermann, Märchy-Caduff, Michael (Donat), Noi-Togni, Paterlini, Perl, Pfenninger, Pult, Salis, Sax, Tomaschett (Breil), Weber, Zanetti, Berther (Segnas), Bossi, Caluori (Zizers), Degiacomi, Föhn, Gujan-Dönier, Schmid

Resposta da la regenza

1. Purschidas sco per exempel la plattafurma da sharing Airbnb correspundan al spiert dal temp e pon s'etablir sin il martgà, perquai ch'ellas cuvran in basegn da la clientella. Novas furmas per chattar e per reservar online alloschis en il Grischun vegnan da princip beneventadas. Ensemen cun auters svilups che servan ad augmentar l'attractivitad da la regiun turistica Grischun, gidan ellas da manar dapli giasts en il Grischun.

2. Da medema maniera sco tut las autras parts da las entradas ston las pajataglias ed ils pajataglias inditgar en lur decleraziuns da taglia er ils retgavs da la locaziun da singulas chombras, d'entiras abitaziuns u d'immobiglias. Sin basa dal dretg vertent vala quai er per offerentas ed offerents dad Airbnb. Sche quellas e quels na fan betg quai, n'èsi strusch pussaivel da registrar cumplettamain questas entradas sin via nunbirocratica. La pretensiun d'ina gistadad fiscala uschè gronda sco pussaivel na sa lascha strusch realisar cun pauca birocrazia.

Sch'ils objects vegnan dads en locaziun sur Airbnb, po ina taxaziun effizienta vegnir cuntanschida mo, sche l'offerent da la plattafurma vegn obligà tras lescha d'annunziar a las autoritads da taglia las locaturas ed ils locaturs e lur retgavs. En intgins lieus sco Amsterdam, Portland e San Francisco incassescha Airbnb automaticamain la taglia d'occupaziun dals giasts e consegna quella – en num da l'ospitanta u da l'ospitant – a l'autoritad da taglia. La pressiun necessaria per regulaziuns analogas en Svizra po vegnir exequida mo sin plaun naziunal, e las pussaivladads giuridicas correspundentas stuessan vegnir stgaffidas tras il legislatur federal. Ma er sch'ils retgavs èn enconuschents, resulta lavur administrativa considerabla per eruir ils custs per realisar il gudogn (tschains da locaziun proporziunal, custs accessorics e.u.v.).

3. Er areguard las ulteriuras prescripziuns per las offerentas ed ils offerents da prestaziun d'alloschament èn decisivas las basas giuridicas vertentas, uschenavant ch'ellas èn insumma relevantas per dar en locaziun pussaivladads da pernottaziun privatas (prescripziuns da segirezza, assicuranzas da responsabladad, prescripziuns da victualias e da restauraziun en connex cun il tractament e la consegna da spaisas e.u.v.). En quest reguard pon purschidas dad Airbnb vegnir messas a pèr cun la locaziun da chombras privatas – ina purschida ch'exista dapi decennis en il chantun turistic Grischun. Novas basas giuridicas n'èn betg necessarias ord vista da la regenza.

4. En il rom da la strategia dal cussegl federal «Svizra digitala» vegnan analisadas las sfidas en connex cun «sharing economy». Ultra da quai sto il cussegl federal respunder fin la fin da quest onn – per incumbensa dal parlament – a differentas dumondas en connex cun il tractament fiscal egual da «sharing economy» e cun las stentas internaziunalas respectivas cunter strategias per evitar taglias. L'emprim ston vegnir spetgads ils resultats da quests scleriments, avant che mesiras necessarias pon eventualmain vegnir skizzadas sin plaun chantunal u communal.

5. La finamira da l'incumbensa Caduff, ch'è vegnida acceptada dal cussegl grond, è plitgunsch quella da simplifitgar e da renunziar a la registraziun da las singulas pernottaziuns. La realisaziun da questa intervenziun na po strusch servir a registrar cumplettamain ils retgavs da locaziun. Dapi l'acceptaziun da l'incumbensa Caduff il mars 2014 han numerusas vischnancas midà lur legislaziun davart las taxas turisticas sin basa dal dretg chantunal vertent. En il rom da l'execuziun da las leschas turisticas communalas ston vegnir registradas er offerentas ed offerents dad Airbnb. Quant enavant ch'igl exista anc in basegn d'adattar il dretg chantunal en connex cun l'incumbensa Caduff, vegn actualmain sclerì.

24 d'avust 2016