Navigation

Inhaltsbereich

Dumonda da la fracziun da la PS concernent las consequenzas da la refurma da l'imposiziun da taglia sin interpresas III per il chantun e per las vischnancas

Sessiun: 01.09.2016

En la sessiun da stad 2016 han las chombras federalas rectifitgà e concludì la refurma da l'imposiziun da taglia sin interpresas III (RITI III).

 

Questa refurma ha consequenzas finanzialas per la confederaziun, per ils chantuns e per las vischnancas. E perquai che la concepziun en la gronda part dals chantuns n'è anc betg clera, èn questas consequenzas previsiblas mo en conturas. Tar la confederaziun chaschuna la RITI III perditas dal retgav da circa 1,3 milliardas francs per onn.

 

Ussa sa tschenta la dumonda, co ch'il Grischun realisass la RITI III e tge consequenzas finanzialas che quai avess per il chantun e per las vischnancas grischunas.

 

Las sutsegnadras ed ils sutsegnaders supplitgeschan perquai la regenza da prender posiziun davart las suandantas dumondas:

 

1. Tgenins dals instruments previs cun la RITI III – sco la «patent box», la promoziun da l'input, la taglia sin il gudogn cun tschains rectifitgads e.u.v. – ha la regenza l'intenziun da realisar?

 

2. En cas ch'igl è previs da reducir la taglia sin il gudogn: En tge dimensiun duai quai succeder e tge consequenzas finanzialas resultassan uschia?

 

3. Cun tge consequenzas finanzialas quinta la regenza per il chantun tras la realisaziun planisada da la RITI III?

 

4. Tge consequenzas finanzialas ha la revisiun per las vischnancas grischunas?

 

5. En il chantun Vad ha la populaziun acceptà cun 87 pertschient da las vuschs ina reducziun da las taglias sin interpresas che cuntegneva mesiras accumpagnantas a favur da las persunas natiralas (premias da las cassas da malsauns, imports per canortas e.u.v.). Tge mesiras sociopoliticas vesa la regenza en il Grischun per minimisar las consequenzas negativas da la RITI III per las persunas natiralas?

 

Cuira, il 1. da settember 2016

 

Peyer, Atanes, Baselgia-Brunner, Bucher-Brini, Cahenzli-Philipp, Caviezel (Cuira), Deplazes, Gartmann-Albin, Jaag, Locher Benguerel, Monigatti, Noi-Togni, Perl, Pfenninger, Pult, Thöny, Vassella

Resposta da la regenza

La refurma da l'imposiziun da taglia sin interpresas III (RITI III) è vegnida deliberada da las chombras federalas ils 17 da zercladur 2016. Cunter quest relasch è vegnì fatg ed è reussì il referendum. La votaziun è previsa per ils 12 da favrer 2017. Sch'il suveran accepta il project, èsi planisà da metter en vigur la revisiun per il 1. da schaner 2019.

Al legislatur chantunal resta pauc temp per realisar la RITI III en il dretg chantunal. Tenor il plan da termins actual da la regenza è planisada ina procedura da consultaziun dal mars fin il zercladur 2017, e las tractativas parlamentaras èn previsas per la sessiun d'avrigl 2018.

Davart las differentas dumondas prenda la regenza posiziun sco suonda:

1. Actualmain n'è la regenza betg anc s'occupada profundamain cun la realisaziun da la RITI III, uschia ch'i n'è anc betg pussaivel da dar respostas detagliadas a las mesiras concretas.
I sto vegnir examinà, sch'i duai vegnir prendida en mira ina reducziun moderada da la taglia sin il gudogn cun in'auta distgargia en las differentas mesiras da cumpensaziun ("patent box" e.u.v.) ubain ina reducziun pli ferma da la taglia sin il gudogn cun regulaziuns spezialas main attractivas.

2. Actualmain vegn prendida en mira ina grevezza fiscala effectiva sin il gudogn da segiramain main che 15 pertschient. Manegiada è la taglia sin il gudogn da la confederaziun e dal chantun (incl. las taglias incassadas per las vischnancas e per las baselgias chantunalas), resguardond la pussaivladad da deducir las taglias sin il gudogn. La dimensiun exacta da las distgargias prendidas en mira vegn er a depender da las decisiuns dals auters chantuns, perquai ch'i sa tracta d'obtegnair in chantun Grischun ch'è fiscalmain cumpetitiv sco lieu d'interpresas.
La reducziun da la taglia effectiva sin il gudogn per 1 punct procentual effectuescha – tar in retgav da la taglia sin il gudogn da 62,4 milliuns francs ch'èn budgetads per l'onn 2017 – in minus d'entradas da circa 7,5 milliuns francs per il chantun, 8 milliuns francs per las vischnancas ed 800 000 francs per las baselgias chantunalas. Las perditas per las vischnancas èn levamain pli autas, perquai ch'il pe da la taglia sin il gudogn per las vischnancas vegn ad esser – tenor las propostas da la regenza – pli auta a partir da l'onn 2017 ch'il pe da la taglia chantunala sin il gudogn.

3. Las consequenzas finanzialas da la realisaziun da la RITI III n'èn oz betg anc cleras. Ellas dependan da las mesiras tar la taglia sin il gudogn, tar la taglia sin il chapital e tar ils differents instruments.

4. Las mesiras da distgargia vegnan er a s'effectuar tar las taglias sin il gudogn e sin il chapital da las vischnancas ed avair là pli u main las medemas consequenzas sco per il chantun.

5. La realisaziun da la RITI III ha l'intent d'obtegnair in lieu fiscal attractiv per las persunas giuridicas cun la finamira da mantegnair las plazzas da lavur existentas e da motivar las interpresas da stgaffir novas plazzas da lavur. En la cumparegliaziun interchantunala profiteschan cunzunt las persunas natiralas sin stgalims da progressiun mesauns e pli bass gia oz d'ina grevezza fiscala fitg moderada. La posiziun relativamain favuraivla dal chantun Grischun vegn confermada cun tutta clerezza per exempel tras il monitoring fiscal actual 2016 dal chantun Son Gagl. Pervia dal rom finanzial stretg na vesa la regenza actualmain naginas pussaivladads per ulteriuras distgargias finanzialas per las persunas natiralas.

21 d'october 2016