Navigation

Inhaltsbereich

Dumonda Thöny concernent l'acquisiziun da vehichels a diesel

Sessiun: 19.10.2016

Las spezialistas ed ils spezialists dal Cercl'Air (uniun da las represchentantas e dals represchentants da las autoritads e da las scolas autas svizras en il sectur dal mantegniment da l'aria pura) constateschan che la qualitad da l'aria sa meglierescha mo plaunsieu en blers lieus. Particularmain en las aglomeraziuns da citads e per lung da vias frequentadas fermamain n'è l'immissiun d'oxids da nitrogen (NOx) ch'èn nuschaivels per la sanadad strusch sa reducida ils ultims onns. En il Grischun èn pertutgads da quai oravant tut il Partenz u las valladas per lung da la A13.

 

Il scandal da diesel ha mussà che l'industria dad autos ha engianà durant blers onns e vendì autos ch'emettan normalmain ina quantitad da substanzas nuschaivlas bler pli gronda en l'aria che tar la certificaziun en il test da labor. Quasi tut ils autos examinads da las marcas las pli differentas han emess facticamain sin via quantitads d'oxids da nitrogen che surpassan fermamain las limitas legalas. Tar tscherts autos èn schizunt vegnidas mesiradas valurs che sa chattan 10 giadas sur la limita. Quest fatg contribuescha supplementarmain a l'immissiun d'oxids da nitrogen.

 

La UE ha concludì novas disposiziuns davart las svapurs il favrer 2016. A partir dal 1. da settember 2017 vegnan fatgs tests dad RDE (Real Drive Emissions). Quai èn mesiraziuns che vegnan fatgas en il traffic sin via real sco premissa per l'approvaziun dals tips d'autos da persunas. Questas disposiziuns valan er per la Svizra. Uschia dastgass la situaziun però sa meglierar mo plaun a plaun. Las novas disposiziuns d'immatriculaziun per vehichels a diesel novs valan numnadamain pir a partir dal settember 2019.

 

En Svizra è il maun public in cumprader impurtant da vehichels, cun consequenzas directas per l'igiena da l'aria. Il chantun e las vischnancas pon – cun cumprar autos nets – contribuir al mantegniment da l'aria pura ed uschia exequir ina funcziun d'exempel impurtanta.

 

En quest connex sa tschentan las suandantas dumondas:

 

1. Quants vehichels da servetsch ha il chantun Grischun?

 

2. Quants da quels han in motor a diesel?

 

3. Co tracta il chantun ses agens vehichels a diesel suenter il scandal da

diesel?

 

4. È la regenza pronta da desister da cumprar novs vehichels a diesel che n'adempleschan anc betg las normas da svapur che valan a partir dal 1. da settember 2017 a favur da las stentas per mantegnair l'aria pura?

 

5. È la regenza pronta da communitgar ina recumandaziun correspundenta a las vischnancas, a la populaziun ed als gestiunaris privats da flottas da vehichels?

 

Cuira, ils 19 d'october 2016

 

Thöny, Deplazes, Atanes, Baselgia-Brunner, Bucher-Brini, Cahenzli-Philipp, Caviezel (Cuira), Gartmann-Albin, Jaag, Locher Benguerel, Monigatti, Müller, Niederer, Perl, Pult, von Ballmoos, Degiacomi, Horrer, Vassella

Resposta da la regenza

Sco ch'igl è vegnì tematisà en la dumonda, datti differenzas tranter las emissiuns durant la funcziun normala e quellas durant ils ciclus d'examinaziun. Betg pertutgà da quai è il cataster chantunal d'emissiuns. Quel sa basa sin facturs d'emissiun che resultan da mesiraziuns da ciclus da charrar reals. Il cataster d'emissiuns 2010 preschenta tge gruppa da funtaunas ch'emetta tge quantitad da substanzas nuschaivlas en l'aria en tge regiun dal chantun, e stima lur svilup entaifer il temp tranter ils onns 2000 e 2020.

Sin basa dal conclus da la regenza nr. 717 dals 10 da fanadur 2012 èn ils posts da servetsch chantunals obligads dapi il 1. da schaner 2013 da registrar lur vehichels en la software per la gestiun da las flottas eco-fleet. En quella vegnan registradas tant las datas da basa dals vehichels sco er las datas dal consum real durant mintga onn. Uschia vegnan controlladas las valurs da consum e las valurs d'emissiun da CO2. I na pon dentant betg vegnir eruidas resp. controlladas las emissiuns da NOx, da COS, da particlas e da NH3 – en il cas da vehichels cun ina denitrogenisaziun –, cunquai che quellas na dependan betg directamain dal consum, mabain dal tip da funcziun e dal temp d'utilisaziun. En connex cun l'acquisiziun da vehichels vegn resguardada la basa da datas en eco-fleet. Sa basond sin quella vegnan cumprads u recumandads tips che tegnan er quai che las indicaziuns dals producents empermettan.

Resposta a las dumondas

1. Per l'administraziun centrala sco er per ils instituts posseda il chantun 498 autos da persunas ed autos da furniziun (indicaziuns da l'uffizi per il traffic sin via, stadi dals 19 da december 2016).

2. 350 da quels han in motor da diesel.

3. Ultra dad eco-fleet datti recumandaziuns per l'acquisiziun persistenta da vehichels che vegnan adattadas permanentamain al stadi da savida actual (ultima actualisaziun il november 2016). Questas recumandaziuns stattan a disposiziun sin las paginas d'internet dal departament da construcziun, traffic e selvicultura e da l'uffizi per la natira e l'ambient. Ultra da quai ha la regenza approvà il rapport "Schanzas da l'electromobilitad per il chantun Grischun, rapport final amplifitgà dals 26 da zercladur 2015" ed attribuì mesiras concretas al stgalim da prioritad 1 (conclus da la regenza dals 8 da settember 2015, protocol nr. 784). En quest connex sa tracti d'ina analisa da la situaziun actuala, da l'adattaziun dals criteris d'acquisiziun sco er da la construcziun da posts da chargiar en edifizis chantunals. En cas dal project "Center administrativ Sinergia" vegn planisà – en il senn da la realisaziun da questas mesiras – in dumber suffizient da staziuns da chargiar tant per e-bikes, per e-motorettas sco er per e-autos. Cumplementarmain vegnan fatgs actualmain scleriments davart las dumondas, sche ed en tge dimensiun che las flottas da vehichels pon vegnir electrifitgadas.

4. Ina renunzia generala ad in tip da vehichel n'è actualmain nagina soluziun. Vehichels a benzin èn oz pli problematics per l'igiena da l'aria pervia da l'injecziun directa autamain concentrada dal carburant envers vehichels a diesel cun lur sistems serrads da filter cunter particlas. Il chantun vegn a sclerir vinavant en moda fundada en mintga cas singul, tge basegn ch'i dat e cun tge vehichel (areguard la motorisaziun ed il tip da propulsiun) che quel po vegnir cuvrì il meglier. En quest connex vegn er la mobilitad electrica a vegnir integrada pli e pli en l'examinaziun.

5. I na fiss objectivamain betg correct da far ina recumandaziun correspundenta. Las recumandaziuns areguard l'acquisiziun persistenta da vehichels "(acquisiziun persistenta, infurmaziuns e basas") èn, sco explitgà en il punct 3, gia accessiblas a la publicitad.

12 da schaner 2017