Navigation

Inhaltsbereich

Incumbensa Claus concernent la reintroducziun da la classa d'introducziun en il chantun Grischun

Sessiun: 06.12.2016

Situaziun da partenza

En connex cun il svilup da la scola en tut la Svizra e da la nova lescha da scola en il chantun Grischun è vegnida introducida la "promoziun integrativa" da – sche pussaivel – tut ils uffants dal stgalim primar e superiur. La consequenza da la "integraziun" è stada quella che er las classas d'introducziuns (CI) che stevan sin la sava da la scolina a la scola, èn vegnidas schliadas ed abolidas senza cumpensaziun. Tut las vischnancas dal chantun han perquai stuì renunziar ad in instrument che aveva fin lura ademplì sia funcziun cun bler success. L'aboliziun da las classas d'introducziun vegn resguardada d'in dumber fitg grond da persunas d'instrucziun, da geniturs ma er da persunas dal fatg sco in grond dischavantatg ed in regress. Adina puspè vegn crititgada la mancanza precis da questa purschida, perquai ch'igl è evident che uffants èn vegnids privads uschia d'ina gronda schanza da pudair absolver pli tard ina carriera da scola "regulara" senza sustegn supplementar.

Situaziun actuala

Er ozendi datti adina puspè uffants che dovran – pervia da lur stadi da svilup – anc in zic dapli temp per sa scolarisar, per pudair alura ademplir las pretensiuns. Perquai che las CI n'existan betg pli, sto la materia d'instrucziun vegnir dumagnada en in onn, da temp en temp cun in sustegn supplementar d'ina persuna d'instrucziun da la pedagogia curativa. Suenter in onn vegn l'uffant "promovì" en la 2. classa, independentamain da la dumonda, sch'el sa la materia d'instrucziun u betg. Savens naschan da quai situaziuns disfavuraivlas cun stress e cun ina surdumandada da tut las parts pertutgadas. Suenter l'emprim onn da scola èn las largias da l'emprender / ils deficits savens gia uschè gronds ch'ina instrucziun cun sustegn supplementar resta savens necessaria durant tut il temp da scola. Quai è ina soluziun che chaschuna gronds custs. Perquai che repetiziuns èn mo pli in tema tar "cas absoluts spezials", vegn l'uffant savens "tratg vinavant" sur onns cun finamiras da l'instrucziun adattadas. Uffants daventan uschia "cas problematics", mo perquai ch'els n'han mai survegnì il temp ch'els avessan duvrà. Quai èn premissas fitg nauschas per ina carriera da scola prosperaivla, ma er per la situaziun en la classa respectiva.

Igl è necessari da reintroducir la classa d'introducziun

En la classa d'introducziun vegnan stgaffidas las premissas cognitivas, linguisticas, motoricas e socialas per midar en la 2. classa regulara. La materia d'instrucziun da la 1. classa vegn elavurada durant dus onns. Pia stattan a disposiziun temp d'emprender supplementar e succurs tras la persuna d'instrucziun. Quai èn ils facturs ils pli impurtants per uffants che han in retard tar lur svilup. Uschia survegnan els ina schanza reala. La stima da sasez dals uffants vegn rinforzada tras ils success. Quai ha in effect positiv er en auters secturs. Il temp d'emprender supplementar stgaffescha la pussaivladad da pudair midar suenter 2 onns – cun enconuschientschas consolidadas – a la 2. classa regulara. Blers "cas problematics" pon vegnir evitads en questa moda e maniera. En consequenza da quai èn er ils custs per il sustegn supplementar pli pitschens en las classas pli autas.

Er en cas d'ina reintroducziun èsi pussaivel da lavurar "en moda integrativa". La realisaziun d'ina varianta integrativa per classas d'introducziun (instrucziun en gruppas pitschnas separadas en ils roms principals matematica ed emprima lingua, l'ulteriura instrucziun en la "classa da tschep") è ina buna pussaivladad er per vischnancas pli pitschnas. Quai mussan er exempels d'auters chantuns, nua che classas d'introducziun vegnan manadas en moda separada u integrativa.

La regenza vegn incumbensada da pussibilitar als purtaders da scola da puspè introducir en cas da basegn la classa d'introducziun regulara da 2 onns (inclusiv la varianta integrativa per purtaders da scola pli pitschens). Eventualmain sto la lescha da scola vegnir adattada correspundentamain.

Cuira, ils 6 da december 2016

Claus, Florin-Caluori, Mani-Heldstab, Albertin, Alig, Berther (Mustér), Brandenburger, Buchli-Mannhart, Burkhardt, Caluori, Casanova (Glion), Casanova-Maron (Domat), Casty, Cavegn, Caviezel (Tavau Clavadel), Clalüna, Davaz, Dermont, Dosch, Epp, Felix (Scuol), Foffa, Hardegger, Hitz-Rusch, Holzinger-Loretz, Jeker, Jenny, Joos, Kunfermann, Kunz (Cuira), Kuoni, Märchy-Caduff, Marti, Michael (Donat), Michael (Castasegna), Nay, Niggli (Samedan), Schutz, Stiffler (Tavau Plaz), Stiffler (Cuira), Tenchio, Thomann-Frank, Tomaschett-Berther (Trun), Troncana-Sauer, Valär, von Ballmoos, Wieland, Zanetti, Berther (Segnas), Lombardi, Pfister, Wellig

Resposta da la regenza

Uffants na sa sviluppan da natira ennà betg tuts tuttina svelt. Il mument ch'els entran en scola demussan els differenzas en il svilup ed han differentas situaziuns da partenza en quai che concerna l'emprender. Scolaras e scolars che n'èn betg stads cumplettamain capabels da suandar las pretensiuns da la scola il mument ch'els èn entrads en scola èn en in pèr gronds purtaders da scola vegnids scolarisads en classas d'introducziun separadas fin l'onn da scola 2012/13. Quai vul dir ch'els han absolvì la 1. classa primara en dus onns da scola. La finamira da la classa d'introducziun è stada quella da pussibilitar a las scolaras ed als scolars – grazia ad in temp da scola supplementar il cumenzament da lur temp da scola – suenter ina carriera da scola regulara.

Classas d'introducziun valevan sco classas pitschnas che n'èn betg pli previsas en la lescha davart las scolas popularas dal chantun Grischun dals 21 da mars 2012 (lescha da scola; DG 421.000) sco furma separativa da la scolaziun en il sectur simpel da las mesiras da la pedagogia speziala. Tenor la legislaziun da scola vertenta stattan a disposiziun differentas mesiras da promoziun tar la midada da la scolina al stgalim primar. En il rom da la promoziun integrativa (PI) porschan ils purtaders da scola d'ina vart a las singulas scolaras ed als singuls scolars in sustegn individual da l'emprender ch'è accordà cun lur basegn da promoziun spezial. Da l'autra vart datti la pussaivladad da spustar l'entrada en scola resp. da restar in ulteriur onn en scolina, in onn che duai servir a l'uffant a madirar.

Ina reintroducziun da la classa d'introducziun pudess servir a promover singuls uffants en moda anc pli adattada als basegns. La pratica da pli baud ha mussà, ch'ina part da las scolaras e dals scolars che han frequentà la classa d'introducziun, han pudì dumagnar suenter cun success lur temp da scola senza sustegn da la pedagogia speziala. Sche la classa d'introducziun duai eventualmain puspè vegnir introducida, vali però er da resguardar in pèr aspects ch'èn resultads pervia dal context ch'è sa midà. D'ina vart è la gruppa en mira, per la quala l'anteriura classa d'introducziun è stada ina buna mesira da promoziun, pitschna pervia da las mesiras da promoziun alternativas ch'i dat ozendi. Uschia na tutgan las scolaras ed ils scolars cun flaivlezzas parzialas da la prestaziun u cun difficultads cumplexas d'emprender e da cumportament, tals cun scolaziun speziala integrativa sco er tals che han in basegn da promoziun, perquai ch'els èn da lingua estra, betg tar la gruppa en mira d'ina nova classa d'introducziun. Els tuts han il dretg d'ina instrucziun en ina classa regulara cun ina promoziun individuala respectiva. Da l'autra vart po la classa d'introducziun esser in instrument adattà che amplifitgescha las mesiras da promoziun existentas. Però stoi vegnir fatg quint che questa purschida supplementara vegn a chaschunar als purtaders da scola custs supplementars che n'èn betg mo marginals.

Sco mesira alternativa pudessan ils purtaders da scola tranter auter examinar da manar uschenumnadas classas cumbinadas. Qua sa tracti da partiziuns, nua che la 1. e la 2. classa primara vegnan instruidas cuminaivlamain, quai che permetta a la persuna d'instrucziun da prender pli ferm resguard da l'eterogenitad da svilup da las scolaras e dals scolars cur ch'els entran en scola. En quest connex fissi d'examinar, sche mesiras pudessan vegnir prendidas entaifer las structuras regularas existentas per promover en moda adequata uffants che dovran dapli temp il cumenzament da lur temp da scola.

La regenza è pronta d'acceptar l'incumbensa qua avant maun en il senn da las consideraziuns. Cun examinar la reintroducziun da la classa d'introducziun sco er variantas da realisaziun alternativas sto en quest connex vegnir tegni quint tant dal basegn da promoziun spezial da las scolaras e dals scolars sco er dals basegns dals purtaders da scola e dals custs che resultassan eventualmain.

2 da mars 2017