Navigation

Inhaltsbereich

Sessiun: 06.12.2016

La situaziun da segirezza en l'Europa ed ils basegns da segirezza da nossa societad han consequenzas er per las forzas polizialas en noss chantun. Uschia sa vesa er la polizia confruntada cun incumbensas adina pli multifaras e pretensiusas e cun giavischs adina pli gronds. L'instrucziun ed en spezial la furmaziun supplementara che sa referescha a las acziuns da las forzas polizialas survegnan sut quests aspects ina impurtanza anc pli gronda che fin ussa. L'instrucziun e la furmaziun supplementara vegn dada en il rom dal concordat da polizia da la Svizra orientala. Ils curs dal concordat han savens lieu sin las plazzas d'instrucziun da l'armada ch'èn adattadas excellentamain per quai. Spezialmain las plazzas d'armas a Cuira, sin il St. Luzisteig, a Walenstadt ed en il champ DCA a S-chanf. Er la polizia chantunala dal Grischun (Pocha GR) dovra las plazzas d'instrucziun respectivas da l'armada per l'instrucziun interna da sias unitads spezialas e per l'instrucziun dal corps en il sectur da la tactica da segirezza.

L'armada da sia vart concentrescha l'instrucziun da sias truppas adina pli fitg sin adina pli paucas plazzas d'instrucziun, ma ch'èn adattadas per sias finamiras grazia a l'equipament spezial. Latiers tutgan senza dubi las plazzas d'armas numnadas qua survart a Cuira, sin il St. Luzisteig, a Walenstadt ed a S-chanf. L'ulteriur svilup da l'armada dastgass anc rinforzar questa tendenza. Er sche l'armada sa stenta da metter a disposiziun sias plazzas a la polizia, exista a vista mesauna da princip il privel che l'access a las plazzas d'instrucziun dumandadas per la polizia sco terz utilisader n'è betg pli garantì en la dimensiun prendida en mira ed entaifer ils termins giavischads.

Da l'autra vart èsi probablamain uschia che pli e pli plazzas, che na vegnan betg pli duvradas da l'armada, perquai ch'ella sa concentrescha sin pli paucas autras plazzas d'instrucziun, daventan libras. Sut quest aspect sa tschentan las suandantas dumondas per las sutsegnadras ed ils sutsegnaders:

1. È er la regenza da l'avis che la valitaziun generala dals fatgs preschentads qua survart è correcta?

2. Sche gea: Co giuditgescha la regenza il basegn futur dal concordat da polizia da la Svizra orientala (u d'auters concordats) e da la Pocha GR d'ina infrastructura che stat permanentamain a disposiziun, ch'è analoga ad ina plazza d'armas e che po vegnir duvrada per l'instrucziun e la furmaziun supplementara dals corps da polizia?

3. Sche la regenza vesa in tal basegn: Exista per il chantun Grischun la schanza da surpigliar per l'instrucziun da la polizia infrastructuras da l'armada che daventan eventualmain libras e da sviluppar a media vista in "center da cumpetenza" bain frequentà?

Cuira, ils 6 da december 2016

Felix (Haldenstein), Geisseler, Salis, Alig, Bleiker, Brandenburger, Buchli-Mannhart, Burkhardt, Cahenzli-Philipp, Caluori, Casty, Cavegn, Clalüna, Clavadetscher, Danuser, Davaz, Deplazes, Dosch, Dudli, Engler, Epp, Felix (Scuol), Foffa, Grass, Gunzinger, Hardegger, Hartmann, Heinz, Heiz, Hitz-Rusch, Holzinger-Loretz, Jeker, Kasper, Koch (Tumein), Koch (Igis), Kollegger, Komminoth-Elmer, Kunz (Fläsch), Lamprecht, Locher Benguerel, Lorez-Meuli, Mani-Heldstab, Michael (Donat), Müller, Nay, Niederer, Niggli (Samedan), Niggli-Mathis (Grüsch), Papa, Sax, Schneider, Stiffler (Tavau Plaz), Thöny, Troncana-Sauer, Vetsch (Claustra Vitg), Waidacher, Weidmann, Widmer-Spreiter, Wieland, Cantieni, Derungs, Erhard, Wellig

Resposta da la regenza

La confederaziun svizra (departament federal da defensiun, protecziun da la populaziun e sport [DDPS]) ed il chantun Grischun han fatg l'onn 2011 in contract a temp illimità davart l'utilisaziun parziala da la plazza d'armas a Cuira. En il contract vegnan messas a disposiziun a la polizia chantunala dal Grischun (Pocha) las plazzas da tir 416 B e C sin il territori "Rheinsand" da la plazza d'armas per far exercizis da tir. L'utilisadra principala, la truppa, ha en quest connex prioritad. Sch'ils basegns da la truppa pretendan quai, po l'utilisaziun da las plazzas da tir er vegnir scumandada a curta vista. Cun ina cunvegna tranter la Pocha e la polizia da la citad da Cuira (Stapo) davart il stan da tir da la polizia Rheinsand vegn l'utilisaziun da las plazzas da tir cedida dapi l'onn 2011 al corp partenari durant in tschert dumber da dis. Perquai che l'armada construescha in nov deposit da muniziun, ston las plazzas da tir B e C assegnadas per contract vegnir spustadas l'onn 2017 en la part sid dal Rheinsand. Las cundiziuns d'utilisaziun per la Pocha e per la Stapo restan però las medemas.

Cun la flexibilitad necessaria da vart da l'armada e da la Pocha bastan las pussaivladads d'utilisaziun odiernas per l'instrucziun dal corp da polizia.

1. Per il mument n'èsi betg giuditgabel tge consequenzas che l'ulteriur svilup da l'armada vegn ad avair per l'occupaziun e per l'utilisaziun da las singulas plazzas d'instrucziun. Cundecisiv per il chantun Grischun è er, che las plazzas d'armas a Cuira, sin il St. Luzisteig, a S-chanf, a Breil ed a Valragn sco er las plazzas da lavur correspundentas restan mantegnidas vinavant sco empermess da l'armada en il rom dal concept da staziunament.

2. Mintga onn han lieu en il Grischun ils curs d'introducziun, da repetiziun e da protecziun da persunas e d'objects da las unitads d'intervenziun (grenadiers) dal concordat da polizia da la Svizra orientala sco er – en il rom da la conferenza da las cumandantas e dals cumandants da polizia da la Svizra orientala (incl. chantun ZH) – in curs per la polizia da traffic. Quests curs han lieu sper l'instrucziun da corps che sto vegnir fatga mintga onn da las collavuraturas e dals collavuraturs da la polizia chantunala dal Grischun. L'infrastructura che vegn duvrada per l'instrucziun variescha en quest connex. Per l'instrucziun e la furmaziun supplementara en il rom dals curs èn decisivas – ultra dals areals da trenament adattads e da las pussaivladads da sajettar per las unitads d'intervenziun – bunas pussaivladads d'alimentaziun ed avunda pussaivladads da pernottaziun. La regenza renconuscha senz'auter il basegn d'ina buna infrastructura d'instrucziun e sustegna l'examinaziun ch'è vegnida prendida per mauns da la Pocha e da l'uffizi da militar e da protecziun civila davart in'utilisaziun cuminaivla e duraivla da l'areal dal Meiersboden a Cuira per las instrucziuns polizialas da corps e da tir sco er da l'instrucziun e da la furmaziun supplementara en il rom dals concordats menziunads.

3. In center da cumpetenza per l'instrucziun e per la furmaziun supplementara da la polizia en in senn cumplessiv stuess vegnir sviluppà cun agid dal lieu da staziunàment dal center d'instrucziun regiunal da la polizia che sa chatta actualmain ad Amriswil. Al lieu d'instrucziun odiern n'existan però naginas pussaivladads d'engrondiment. Ils curs da basa da la polizia da segirezza da la scola da polizia Amriswil han perquai lieu sin la plazza d'armas a Breil (avant S-chanf) a partir da l'onn 2017. Sco president da la conferenza da las directuras e dals directurs chantunals da giustia e polizia da la Svizra orientala (CDCGP-ost) fa il schef dal departament da giustia, segirezza e sanadad, cusseglier guvernativ Christian Rathgeb, valair ils interess dal corp da polizia en la strategia da la scola.

2 da mars 2017