Navigation

Inhaltsbereich

Sessiun: 06.12.2016

En il preventiv 2017 descriva l'uffizi per economia e turissem il rapport davart la gruppa da products sco suonda: "Il chantun promova il svilup economic sin ses territori. Sa basond sin la lescha per promover il svilup economic en il chantun Grischun sa concentrescha el en quest connex en spezial sin la promoziun da projects en ils secturs innovaziun, svilup da l'economia locala e turissem."

Sco finamira dals effects stat: "Tras la promoziun chantunala dal svilup economic vegn augmentada la cumpetitivitad e l'innovaziun dal Grischun sco plazza economica. Qua tras vegn er mantegnida ed augmentada la valurisaziun en il chantun. Ultra da quai vegnan segiradas las plazzas da lavur existentas e creadas novas plazzas da lavur."

Il fatg è che incaricas, che na ston betg vegnir publitgadas uffizialmain, na vegnan betg mo surdadas en il Grischun, mabain er ordaifer il chantun. Parts da las incaricas che vegnan surdadas en il Grischun vegnan puspè surdadas vinavant, e quai savens ordaifer il chantun. La finamira dals effects na vegn pia betg cuntanschida, cunquai ch'ina part da la valurisaziun svanescha puspè. En il meglier cas pon vegnir mantegnidas las plazzas existentas. Novas plazzas da lavur na pon strusch vegnir creadas.

Da quai resultan las suandantas dumondas:

1. Per tge motivs surdat l'uffizi per economia e turissem incaricas directamain ordaifer il chantun? Datti differenzas da qualitad che giustifitgeschan questas decisiuns?

2. Ha la regenza enconuschientschas da quai che las incaricas che vegnan surdadas a partenaris grischuns, vegnan per part surdadas vinavant ordaifer il chantun?

3. Sche betg, ha la regenza l'intenziun da sclerir questa dumonda?

4. Sche gea:
a) Sustegna la regenza quest proceder u vul ella en il futur cumbatter cun mesiras adattadas cunter questa perdita da valurisaziun?
b) Per tge motivs surdattan partenaris grischuns parts da las incaricas puspè vinavant ordaifer il chantun?

5. Las sutsegnadras ed ils sutsegnaders supplitgeschan la regenza da far ina glista da tut las incaricas ch'èn vegnidas surdadas ils ultims 5 onns cun denominar ils secturs e cun descriver, sche las finamiras èn vegnidas cuntanschidas. Quantas da questas incaricas èn vegnidas surdadas ordaifer il chantun? Quantas da las incaricas ch'èn vegnidas surdadas en il chantun han effectuà incaricas successivas ordaifer il chantun?

Cuira, ils 6 da december 2016

Stiffler (Cuira), Niggli-Mathis (Grüsch), Dermont, Aebli, Alig, Berther (Mustér), Bondolfi, Burkhardt, Caduff, Caluori, Casanova-Maron (Domat), Casty, Caviezel (Tavau Clavadel), Claus, Darms-Landolt, Dosch, Engler, Felix (Scuol), Foffa, Grass, Hardegger, Heiz, Hitz-Rusch, Holzinger-Loretz, Hug, Jeker, Jenny, Kappeler, Kasper, Koch (Tumein), Kollegger, Komminoth-Elmer, Kunfermann, Kunz (Cuira), Lorez-Meuli, Marti, Michael (Castasegna), Müller, Nay, Niggli (Samedan), Papa, Paterlini, Salis, Schutz, Steck-Rauch, Stiffler (Tavau Plaz), Tenchio, Thomann-Frank, Troncana-Sauer, Valär, Vetsch (Claustra Vitg), von Ballmoos, Waidacher, Weber, Weidmann, Widmer-Spreiter, Wieland, Antognini, Berther (Segnas), Derungs, Erhard, Lombardi, Pfister, Wellig

Resposta da la regenza

Sche las cundiziuns generalas giuridicas permettan quai, sa stenta la regenza da surdar incaricas entaifer il chantun. Quai mussan las statisticas da surdada da blers onns. Tenor quellas han numnadamain pudì vegnir resguardads purschiders indigens tar la pli gronda part da las acquisiziuns d'incumbensaders publics en il chantun Grischun. La dumonda qua avant maun focussescha dentant sin la surdada d'incaricas che na ston betg vegnir publitgadas uffizialmain, e sa restrenscha a l'uffizi per economia e turissem (UET).

Las acquisiziuns respectivamain la surdada d'incaricas na pon betg vegnir cumparegliadas directamain cun las pussaivladads da promoziun sin basa da la lescha davart il svilup economic, damai ch'ellas han differents intents. En connex cun las acquisiziuns entra il chantun da princip en acziun sin il martgà liber cun ina dumonda e cumpra cunter pajament d'in pretsch las prestaziuns necessarias ch'el dovra per realisar sias incumbensas publicas. La finamira prioritara è quella d'impunder meds finanzials publics e pia da cuntanscher la meglra relaziun tranter pretsch e prestaziun. Tar la promoziun da l'economia percunter vegnan concedids contribuziuns ed emprests da daners a terzs en spezial per effectuar ina valurisaziun en il chantun.

Tar la dumonda 1: Ils motivs per surdar incaricas ordaifer il chantun pon per exempel esser las enconuschientschas specificas ubain l'experientscha dal purschider e dal persunal engaschà, las referenzas ch'èn avant maun, l'organisaziun respectivamain la realisaziun dal project ubain concepts u analisas da l'incarica ch'èn gia vegnids fatgs pli baud. Las enconuschientschas u qualitads spezialas d'in purschider giustifitgeschan en il cas singul da resguardar purschiders extrachantunals er tar incaricas che na ston betg vegnir publitgadas uffizialmain. Natiralmain sto il princip da la rentabilitad vegnir observà er en cas da questas surdadas d'incaricas pli pitschnas.

Tar la dumonda 2: I n'exista betg ina survista generala davart il volumen d'incaricas dal UET che na ston betg vegnir publitgadas uffizialmain, sche ed en tge dimensiun che parts da questas incaricas ad interpresas grischunas èn vegnidas surdadas vinavant ordaifer il chantun. I sto però vegnir rendì attent che la subsurdada d'incaricas tenor la legislaziun chantunala da submissiun dastga vegnir fatga da princip mo cun il consentiment da l'incumbensader e mo per prestaziuns subordinadas u spezialas. Plinavant ha la surdada d'incaricas da prestaziuns da servetsch en general lieu sin fundament da las enconuschientschas specificas da l'incumbensà. Correspundentamain na vegnan las incaricas dal UET che vegnan surdadas senza publicaziun uffiziala per regla betg subsurdadas.

Tar la dumonda 3: Tant la regenza sco er l'administraziun èn fitg conscientas da l'impurtanza per l'economia publica dal chantun sco incumbensader e resguardan sche pussaivel interpresas indigenas. Ina prescripziun generala dal chantun ch'en cas da subsurdadas stoppian vegnir resguardads en mintga cas purschiders chantunals, fiss problematica tenor il dretg da concurrenza ed incunvegnenta dal puntg da vista material. Tut tenor incarica èsi necessari d'engaschar interpresas extrachantunalas, e quai pervia da las enconuschientschas. Sche questa pussaivladad vegniss scumandada da princip, na pudess eventualmain betg vegnir resguardà in purschider principal chantunal.

Dal rest vegn la regenza – independentamain da questa dumonda, suenter la terminaziun da la revisiun totala currenta dal dretg da surdada svizzer e resguardond ils resultats da las analisas da la cumissiun da concurrenza federala – a sondar anc ina giada la libertad d'agir areguard il dretg d'acquisiziuns en il sectur da construcziun (vesair latiers incumbensa Felix [Haldenstein] concernent l'impurtanza da las acquisiziuns publicas per l'economia publica).

Tar la dumonda 4: cf. las respostas a las dumondas 2 e 3.

Tar la dumonda 5: Tenor ses program da controlla intern (Wicon) ha il UET realisà durant ils 5 onns dals onns 2012 fin 2016 147 surdadas directas en la dimensiun da totalmain 6,188 milliuns francs. A quest volumen d'incaricas è la confederaziun sa participada cun radund 1 milliun francs.

78 da questas incaricas cun 48,5 % dal volumen d'incarica èn vegnidas surdadas ad interpresas grischunas. 41 incaricas e 34,5 % dal volumen èn vegnidas surdadas ordaifer il chantun. 21 ulteriuras incaricas cun 12,9 % dal volumen èn medemamain vegnidas surdadas ordaifer il chantun. Qua sa tracti da cas spezials, nua ch'igl è stà necessari d'integrar enconuschientschas professiunalas specificas d'instituziuns che lavuran sin plaun naziunal (incaricas a l'uffizi federal da statistica, a la federaziun svizra dal turissem, a l'institut gfs.bern, a l'institut BAK Basel Economics, a l'associaziun da garanzia per IPM AG OST-SID, a l'institut da perscrutaziun da la conjunctura KOF u en il rom d'ina cooperaziun en cas d'incaricas d'auters chantuns e.u.v.). 7 incaricas cun 4,1 % dal volumen èn vegnidas surdadas a purschiders da l'exteriur. Quai perquai ch'igl eran dumandadas enconuschientschas decisivas en connex cun dumondas specificas dal turissem en il territori germanofon ordaifer la Svizra.
La gronda part da las incaricas extrachantunalas pertutga projects u mesiras, nua ch'igl han stuì vegnir consultadas firmas da cussegliaziun spezialisadas en il context naziunal. Sche purschiders grischuns pon exequir incaricas sut cundiziuns cumparegliablas, vegnan quels da princip er resguardads dal UET.

Sco menziunà sut la dumonda 2, na datti naginas indicaziuns davart subsurdadas dal UET a purschiders extrachantunals.

8 da mars 2017