Navigation

Inhaltsbereich

Incumbensa Lorez-Meuli concernent mesiras da cumpensaziun en cas d'intervenziuns en spazis da viver degns da vegnir protegids tenor l'art. 14 al. 3 OPNP

Sessiun: 07.12.2016

L'art. 18 al. 1ter da la lescha federala davart la protecziun da la natira e da la patria (LPNP) prescriva: Sch'i n'è betg pussaivel d'evitar, tegnend quint da tut ils interess, che las intervenziuns tecnicas disturbian biotops degns da vegnir protegids, sto il chaschunader prender mesiras spezialas per la meglra protecziun pussaivla, per il restabiliment ubain per in'autra cumpensaziun adequata da quests biotops. Tenor l'art. 14 al. 7 da l'ordinaziun davart la protecziun da la natira e da la patria (OPNP) sto quel che fa u chaschuna ina intervenziun vegnir obligà da prender las meglras mesiras pussaivlas per proteger u per restabilir ils biotops ubain da prender autras mesiras da cumpensaziun adequatas. 

Per determinar l'obligaziun da prestar cumpensaziuns e per fixar las prestaziuns cumpensatoricas ha l'uffizi per la natira e l'ambient (UNA) sviluppà sistems da puncts. Sa basond sin quests sistems da puncts èsi er pussaivel da cumpensar questa obligaziun cun daners (= taxa da cumpensaziun). Las taxas da cumpensaziun tenor la LPNP van a la finanziaziun speziala "taxas da cumpensaziun en il sectur da la protecziun da biotops e da la cuntrada". Quests meds finanzials èn liads ad in intent; els dastgan vegnir duvrads mo per projects da revalitaziun. 

Sch'i na vegnan betg chattadas prestaziuns cumpensatoricas adequatas, po l'intervenziun – sa basond sin l'art. 7 da l'ordinaziun chantunala davart la protecziun da la natira e da la patria (ONPGR) – er vegnir cumpensada cun pajar in import da 3.– francs per punct en in fond chantunal per mesiras da cumpensaziun. Sche las mesiras surpassan las prestaziuns cumpensatoricas pretendidas pon vegnir bunifitgads puncts da la prestaziun cumpensatorica. 

Questa obligaziun da prestar cumpensaziuns n'è actualmain reglada ni sin stgalim d'ina lescha ni sin stgalim d'ina ordinaziun e vegn fixada mo sur in sistem da puncts. Quest sistem da puncts n'ha nagin caracter liant e na garantescha nagina segirezza giuridica.  

Las sutsegnadras ed ils sutsegnaders incumbenseschan la regenza: 

1. da reglar la valitaziun da l'obligaziun da prestar cumpensaziuns sin stgalim d'ina ordinaziun; 

2. da communitgar a las vischnancas / als projectants mintga onn il saldo dals puncts da la prestaziun cumpensatorica u da publitgar quel publicamain; 

3. da publitgar ils projects da revalitaziun realisads e las prestaziuns cumpensatoricas ch'èn vegnidas duvradas per tals. 

Cuira, ils 7 da december 2016  

Lorez-Meuli, Valär, Casanova (Glion), Bleiker, Buchli-Mannhart, Burkhardt, Cahenzli-Philipp, Casty, Danuser, Darms-Landolt, Dermont, Engler, Felix (Scuol), Geisseler, Giacomelli, Hardegger, Hartmann, Heinz, Heiz, Jaag, Joos, Kasper, Komminoth-Elmer, Kunfermann, Lamprecht, Niederer, Niggli (Samedan), Niggli-Mathis (Grüsch), Papa, Paterlini, Sax, Schutz, Steck-Rauch, Stiffler (Tavau Plaz), Thomann-Frank, Tomaschett (Breil), Tomaschett-Berther (Trun), Toutsch, Vetsch (Claustra Vitg), von Ballmoos, Berther (Segnas), Cantieni, Derungs, Erhard, Pfister

Resposta da la regenza

Las basas legalas da la confederaziun e dal chantun pretendan che en cas d'intervenziuns inevitablas en spazis da viver degns da vegnir protegids ed en cuntradas protegidas stoppia vegnir prestada ina cumpensaziun adequata. Fin oz n'existan sin plaun federal naginas basas co che la dimensiun d'in donn ecologic e co che la valur d'ina prestaziun cumpensatorica stuessan vegnir quantifitgadas correctamain. In agid porscha la pratica dal tribunal federal. Tenor il tribunal federal sto l'equivalenza da la cumpensaziun vegnir giuditgada tant a maun da criteris qualitativs sco er quantitativs. Tenor il tribunal federal sto l'object da cumpensaziun pudair surpigliar funcziuns ecologicas sumegliantas sco l'object destruì. Ultra da quai ston las mesiras ordinadas er esser raschunaivlas e proporziunalas. Tenor il tribunal federal pon mesiras da cumpensaziun er esser excepziunalmain commensuradas, sch'ellas avessan da sa mussar sco betg equivalentas (decisiun 1A.104/2001 consideraziun 5.2; 1A.82/1999 dals 19 da november 1999).

Per pudair objectivar las pretensiuns envers cumpensaziuns tenor la lescha federala davart la protecziun da la natira e da la patria (LPNP) ha l'uffizi per la natira e l'ambient (UNA) sviluppà in'emprima clav da valitaziun per intervenziuns en spazis da viver terresters degns da vegnir protegids (betg aquatics, ordaifer il guaud) ed in giudicament da mesiras da cumpensaziun. La clav lavura cun in sistem da puncts che resguarda la raritad e la sensibilitad dal tip da spazi da viver pertutgà, l'existenza da spezias raras sco er la reparabladad e l'intensitad da l'intervenziun. La regenza, autras autoritads chantunalas da permissiun ed en il fratemp er autoritads federalas sa basan dapi blers onns regularmain sin quest sistem da puncts, sch'ellas ston fixar mesiras da cumpensaziun. Cun reguard al project da concessiun Lago Bianco da la Repower è il UNA vegnì incumbensà internamain da sviluppar duas clavs da valitaziun supplementaras per intervenziuns en spazis da viver aquatics ed en cuntradas protegidas. Ils giudicaments correspundents èn vegnids integrads en la dumonda d'approvar la concessiun da la Repower dals 29 da november 2011 e la regenza ha disponì en l'approvaziun da la concessiun dals 25 da mars 2014 (protocol nr. 285) che las mesiras stoppian vegnir concretisadas pli fitg e realisadas.

Ils art. 4 al. 1 e 7 al. 1 da l'ordinaziun chantunala davart la protecziun da la natira e da la patria dals 18 d'avrigl 2011 (ONPGR; DG 496.100) pretendan che l'autezza da l'obligaziun da prestar cumpensaziuns vegnia eruida a maun da directivas da la regenza. En il fratemp ha il UNA elavurà in sboz per ina directiva correspundenta. Quel sboz vegn preschentà a la regenza per l'approvaziun suenter ch'ils departaments ed ils posts da servetsch pertutgads èn vegnids consultads en chaussa. Questa directiva vegn, sa basond sin la lescha da transparenza, a cuntegnair tranter auter er prescripziuns davart il manaschament da datas e davart l'accessibladad da datas. La regenza è pronta d'acceptar l'incumbensa en il senn da questas explicaziuns.

16 da favrer 2017