Tenor la lescha e l'ordinaziun da posta è la Posta obligada da manar ina rait d'uffizis postals e d'agenturas postalas en tut la Svizra. L'accessibladad è vegnida concretisada en l'ordinaziun da posta: Ils puncts d'access als servetschs postals ston esser cuntanschibels a pe u cun ils meds da transport publics per 90 % da la populaziun entaifer 20 minutas, quels tar ils servetschs da pajament entaifer 30 minutas. Sche la Posta porscha in servetsch a domicil en in territori, valan 30 minutas.

Las midadas socialas, particularmain er chaschunadas da la digitalisaziun pli e pli gronda e da la mobilitad creschenta da la populaziun, chaschunan novs basegns ed in auter cumportament da la clientella. Orientada a quai vul la Posta – en il rom da sia strategia "rait da l'avegnir" – extender sias pussaivladads d'access fin l'onn 2020 dad actualmain 3700 a 4000. Discurs ch'il chantun ha gì cun la Posta conferman che la Posta dat ina gronda paisa al format d'agenturas, a la filiala cun partenaris sco er – tut tenor il basegn local – ad ulteriuras pussaivladads d'access sco il servetsch a domicil, automats da 24 uras "My post", posts per clientella commerziala ed ulteriurs posts da consegna e da retratga. Colliadas cun quai èn ulteriuras serradas d'uffizis postals tradiziunals. Igl è evident che las novas purschidas permettan da porscher per part uras d'avertura bler pli lungas ch'in uffizi postal tradiziunal. Per regla èn er garantids ils servetschs che vegnan dumandads il pli savens (consegna e retratga da spediziuns, cumpra da marcas postalas, pajaments senza daner blut u er retratgas da daner blut fin 500 francs). Tras la collavuraziun da la Posta cun partenaris al lieu pon per part er vegnir mantegnidas e rinforzadas structuras localas (p.ex. negozis dal vitg).

Ma la regenza ha mo pauca chapientscha per las ponderaziuns strategicas da la Posta svizra e per sias stentas da sviluppar sia purschida mo en moda economica ed orientada als novs basegns da la clientella. Igl è evident che la nova restructuraziun considerabla da la rait d'uffizis postals vegn ad avair per consequenza in'ulteriura reducziun da plazzas da lavur en il Grischun, schebain ch'il mument na vegnan betg pronunziadas desditgas da plazzas. Ultra da la dumonda da la purschida en ils differents lieus ed en las differentas valladas da noss chantun – ina dumonda ch'è repetidamain l'object d'intervenziuns parlamentaras – han la restructuraziun e la reducziun er ina consequenza per l'economia publica. L'attractivitad da lieus periferics d'abitar e da lavurar en il Grischun dastgass puspè ir enavos. L'impurtanza dal service public per mantegnair e per sviluppar vinavant l'urbanisaziun decentrala è considerabla e sto pia stringentamain vegnir resguardada en las ponderaziuns. Er sch'i vegnan creads novs servetschs moderns ed orientads al nov cumportament da la clientella sco er novs puncts d'access da la Posta, ston quels ademplir las pretensiuns d'ina gestiun economica. Sche quai na reussescha betg e sch'i na reussescha la finala er betg da mantegnair la purschida, vegn quai a chaschunar in'emigraziun pli gronda dals territoris menziunads.

La regenza vegn a gidar las vischnancas a mantegnair in provediment uschè optimal sco pussaivel cun servetschs postals per la populaziun grischuna. Quai er en il senn da sia strategia da rinforzar ils centers regiunals. Ella sa distanziescha cleramain d'ina ulteriura reducziun da plazzas, che tutgass grevamain il chantun Grischun en sia situaziun economica actuala e che reduciss l'attractivitad economica dal chantun Grischun.

La regenza n'ignorescha betg las midadas economicas e socialas e n'ha perquai er betg la finamira da mantegnair structuras u servetschs antiquads. Plitost vul ella che interpresas creeschian novs formats progressivs da plazzas da lavur – supponind motivadamain che quels sajan pli independents dal lieu pervia da la digitalisaziun, e na stoppian betg pli sa chattar sfurzadamain en las grondas aglomeraziuns. Gist sco "digital workplace" porscha il Grischun fitg blers avantatgs che vegnan anc a s'accentuar tras l'amplificaziun creschenta d'infrastructuras effizientas destinadas a l'utilisaziun da tecnologias digitalas. La regenza ha gia communitgà a la Posta sia aspectativa, numnadamain ch'ella resguardia ils svilups en il mund da lavur ed elavuria concepts per spustar activamain plazzas da lavur en las regiuns perifericas. Medemamain spetga la regenza che la Posta suttamettia propostas, co ch'ella vul infurmar las vischnancas grischunas e las integrar en il process areguard la strategia per la rait postala 2020.

En il senn da questas explicaziuns è la regenza pronta d'acceptar l'incumbensa.

1 da favrer 2017