Zum Seiteninhalt

Dumonda Caviezel (Cuira) concernent il svilup da la vendita d'armas en il Grischun

sessiun: 15.02.2017

Dacurt han differentas medias svizras rapportà che las Svizras ed ils Svizzers cumprian pli e pli armas per lur uschenumnada autoprotecziun.

Ils suandants exempels vegnan menziunads:
Tagesanzeiger dals 4 da schaner 2017: "Ils Svizzers sa rearmeschan cun armas",
NZZ am Sonntag dals 24 d'avrigl 2016: "Las persunas pensiunadas sa rearmeschan",
SRF Rundschau dals 4 da schaner 2017: "Per l'autodefensiun – Ils Svizzers sa rearmeschan cun atgnas armas".

Differents chantuns demussan ratas da creschientscha da duas cifras tar las cumpras d'armas. Schebain che la Svizra è in dals pajais ils pli segirs dal mund e schebain che la criminalitad è en sasez sa reducida durant ils ultims onns en differents secturs centrals (p.ex. infracziuns, assagls da rapiment, violenza da giuvenils, blessuras corporalas, mazzaments), sa sentan diversas persunas apparentamain pli e pli malsegiras u smanatschadas. Spezialmain dunnas e persunas pli attempadas cumpran pli e pli armas da fieu. En blers chantuns prenda la polizia enconuschientscha da quest svilup cun quità e cusseglia da na betg cumprar armas per "l'autoprotecziun".

Ord vista da las explicaziuns menziunadas tschentan las sutsegnadras ed ils sutsegnaders las dumondas qua sutvart. En il focus da las dumondas na stattan betg las armas da las tiraduras e dals tiradurs da sport registrads resp. las armas da chatscha che vegnan acquistadas per ir a la chatscha grischuna da patenta.

- Co è sa sviluppà il dumber da venditas d'armas durant ils ultims 5 onns en il Grischun (midada absoluta e procentuala)? Co sa preschenta il svilup areguard la vegliadetgna e la schlattaina?

- Quantas armas èn registradas en total en il register chantunal d'armas? Sin quant stima la regenza il dumber da las armas betg registradas (acquistadas avant ils 12 da december 2008)?

- Quant savens vegnan organisadas acziuns coordinadas da collecziun d'armas da vart dal chantun (cf. incumbensa acceptada da M. Cavigelli da l'onn 2009)?

- Parta la regenza l'avis d'auters corps da polizia chantunals, che la finala l'armament persunal creschent saja ina ristga considerabla per la polizia?

- Tge fa la regenza concretamain per metter ina fin a quest svilup? Quant enavant pari necessari a la regenza da sensibilisar correspundentamain en chaussa?

Cuira, ils 15 da favrer 2017

Caviezel (Cuira), Cavegn, Salis, Alig, Atanes, Baselgia-Brunner, Brandenburger, Bucher-Brini, Cahenzli-Philipp, Casanova (Glion), Deplazes, Dermont, Epp, Felix (Scuol), Florin-Caluori, Foffa, Gartmann-Albin, Gunzinger, Heiz, Jaag, Jenny, Kollegger, Kunfermann, Kuoni, Locher Benguerel, Mani-Heldstab, Marti, Mathis, Monigatti, Niederer, Noi-Togni, Perl, Peyer, Pfenninger, Pult, Schneider, Tenchio, Thöny, Tomaschett-Berther (Trun), von Ballmoos, Berther (Segnas), Buchli (Tenna)

Resposta da la regenza

Ordavant stuain nus constatar ch'i vegn discurrì d'acquist d'armas e betg da vendita d'armas en quai che suonda. Quai correspunda a la terminologia da la lescha federala davart las armas, ils accessoris d'armas e la muniziun (lescha d'armas, LArm; CS 514.54).

1. Pertutgant la dumonda dal svilup dals acquists d'armas dapi l'onn 2012

L'acquist d'armas, per il qual ins è obligà d'avair ina permissiun d'acquistar armas tenor l'art. 8 LArm, è sa sviluppà dapi l'onn 2012 sco preschentà qua sutvart. Exceptadas da quai èn las armas da chatscha, per las qualas – tenor l'art. 10 LArm – ins n'è betg obligà d'avair ina permissiun d'acquistar armas. Las armas da sport percunter na pon betg vegnir separadas, perquai ch'ellas – cuntrari a las armas da chatscha – n'èn betg pertutgadas da las excepziuns da l'obligaziun d'avair ina permissiun d'acquistar armas.

- 2012 han acquistà   976 persunas (921 umens, 55 dunnas)    1655 armas
- 2013 han acquistà 1109 persunas (1040 umens, 69 dunnas)  1816 armas
- 2014 han acquistà 2737 persunas (2578 umens, 159 dunnas) 8068 armas
- 2015 han acquistà 1813 persunas (1698 umens, 115 dunnas) 4179 armas
- 2016 han acquistà 1487 persunas (1380 umens, 107 dunnas) 2445 armas

Las armas acquistadas pertutgan las suandantas categorias da vegliadetgna e da schlattaina:

-
La singularitad da la statistica dals onns 2014 e 2015 deriva dal fatg che en quests dus onns èn vegnidas registradas annunzias posteriuras davart il possess resp. l'acquist d'armas d'onns precedents. Per obtegnair in'expressiun specifica da la tendenza ston vegnir considerads ils onns 2012, 2013, 2016. En la perioda da 2012 fin 2016 è s'augmentà tant il dumber d'acquistaders d'armas sco er quel da las armas acquistadas per circa 50 %. Tal e qual è restà il dumber da las armas acquistadas annualmain per persuna, numnadamain 1,6 armas.

2. Pertutgant la dumonda da las armas registradas en total

La polizia chantunala ha registrà – stadi dals 10 da mars 2017 – 28 415 armas (inclusiv armas da chatscha). Il dumber da las armas ch'èn avant maun en Svizra, n'è betg enconuschent. Stimaziuns presuman ca. 2 ½ – 4 ½ milliuns armas. Deducì da quai sto ina stimaziun per il chantun Grischun per l'ina resguardar il dumber d'abitantas e d'abitants, per l'autra l'enconuschientscha che la densitad d'armas variescha da regiun a regiun ed è tendenzialmain pli auta en ils chantuns citadins ch'en ils chantuns rurals. La polizia chantunala presuma perquai ch'en il chantun Grischun pudessan esser avant maun anc ina giada tantas armas nunregistradas sco registradas.

3. Pertutgant la dumonda da las acziuns da collecziun d'armas

L'art. 31a da la lescha d'armas oblighescha ils chantuns dapi la fin da l'onn 2008 da prender encunter las armas senza incassar taxas. En in'acziun chantunala da collecziun d'armas organisada per l'emprima giada l'onn 2009 da la polizia chantunala han 460 persunas consegnà tut en tut 858 armas. En il rom da las acziuns da collecziun da l'onn 2013 e da l'onn 2016 ha la polizia chantunala rimnà da 110 resp. 195 persunas 162 resp. 311 armas. La proxima acziun da collecziun d'armas vegn ad avair lieu l'onn 2019. Dal rest vegnan consegnadas regularmain armas er independentamain da las acziuns da collecziun, p.ex. han restituì l'onn passà 143 persunas 240 armas.

4. Pertutgant las dumondas da l'armament persunal

L'armament persunal è ina ristga che po sa mussar en in tractament malsegir, en in deposit insuffizient u en in diever inadequat da l'arma. Mo quai n'è dentant betg ina ristga considerabla per la polizia, mabain ina ristga immanenta a sia professiun. Però questa ristga s'augmenta per la polizia effectivamain e n'è strusch pli calculabla, sch'i sa tracta d'armas nunregistradas. In'autra valitaziun tras il corp da polizia chantunal n'è betg enconuschenta a la regenza.

En il rom da la legislaziun davart las armas èsi permess d'acquistar in'arma. Perquai na po la regenza betg influenzar in armament persunal uschè ditg che quel ha lieu en il rom da las prescripziuns legalas.

3 da matg 2017