Zum Seiteninhalt

Incumbensa Engler concernent la renaschientscha da l'idea d'ina viafier orientala da las Alps

sessiun: 15.02.2017

In traffic maschadà da trens da vitgira plauns e da trens da persunas svelts restrenscha fermamain la capacitad d'ina infrastructura da viafier. Sin fundament da prognosas da traffic pon ins partir dal fatg che las capacitads da las axas da la nova lingia da viafier tras las Alps (NVTA) Gottard e Lötschberg vegnan ad avair cuntanschì lur cunfins il pli tard en 25–30 onns. L'amplificaziun cumpletta da las axas da la NVTA, inclusiv las lingias d'apport, ch'era previsa oriundamain, è facticamain sistida a lunga vista per motivs da custs. Questa situaziun porscha al Grischun la schanza d'examinar la viafier orientala da las Alps sco alternativa. Questa idea sa basa sin in detretschament dal traffic, sin in augment da la capacitad e sin ina redundanza da la rait da viafier svizra sco er sin colliaziuns sveltas tranter ils territoris metropolitans Francfurt, Minca, Turitg e Milaun cun 68 milliuns abitants e cun in product naziunal brut da 3 billiuns francs. L'element central da tut quai è ina nova transversala da las Alps tranter ils territoris Cuira e Clavenna per il traffic da persunas svelt.

Areguard la cuntanschibladad sa chatta il Grischun per bler a la fin da la rangaziun en cumparegliaziun cun ils auters chantuns. Suenter che la candidatura per ils gieus olimpics d'enviern 2026 è vegnida refusada cleramain, è il chantun dumandà pir da dretg da far in grond pass en direcziun da la durabilitad e dal progress. Cun ina viafier orientala da las Alps survegn il Grischun la schanza unica da vegnir integrà en in'axa europeica, da meglierar massivamain la cuntanschibladad da las metropolas vischinas sco er da cuvrir meglier ils basegns da traffic dal chantun resp. da sias regiuns. La premissa è dentant quella ch'il chantun prendia en maun sez la chaussa, surpiglia a temp l'iniziativa necessaria e constitueschia en moda proactiva las emprimas basas da discussiun ed allianzas politicas. Il passà ha mussà che projects gronds ston vegnir inizialisads ditg ordavant.

Las sutsegnadras ed ils sutsegnaders incumbenseschan la regenza d'examinar pli detagliadamain il concept d'ina viafier orientala da las Alps tenor l'idea dad AlpTrain. La regenza sto elavurar las basas per manar emprimas discussiuns cun la confederaziun, cun ils chantuns da la Svizra orientala sco er cun la Lumbardia, la Baviera, Baden Württemberg, il Vorarlberg ed il Principadi da Liechtenstein e per effectuar ils pass successivs. Questas basas ston cuntegnair il suandant:

1. Examinaziun da la realisabladad tecnica (incl. stimaziun approximativa dals custs) d'ina viafier orientala da las Alps sco er da l'amplificaziun dals trajects d'access Turitg – Cuira, Lecco – Clavenna, Bellinzona/Roveredo – Clavenna sco er Minca/Stuttgart – Sargans.

2. Svilup d'ina strategia d'amplificaziun per l'infrastructura da viafier per ils proxims 50 – 100 onns cun l'intent da colliar il meglier pussaivel la Svizra orientala resp. il Grischun cun la nova transversala sin l'axa Cuira – Clavenna. En quest connex ston vegnir garantidas las colliaziuns cun Tavau/San Murezzan, Milaun e Roveredo/Bellinzona. Plinavant sto vegnir fatga ina priorisaziun, ed il corridor da planisaziun sto vegnir segirà ord vista da la planisaziun dal territori. Sco mesira accumpagnanta sto vegnir preparada la fundaziun d'in comité per la viafier orientala da las Alps cun ina basa solida.

3. Elavuraziun d'ina vista cumplessiva da l'idea d'ina viafier orientala da las Alps, tranter auter aspects economics, politics, ecologics e da traffic.

4. Pervia da la gronda urgenza sto vegnir elavurà in rapport intermediar fin mez da l'onn 2018, ed il rapport final per mauns dal cussegl grond sto esser avant maun fin la fin da l'onn 2019.

Cuira, ils 15 da favrer 2017

Engler, Caluori, Jeker, Alig, Baselgia-Brunner, Berther (Mustér), Blumenthal, Brandenburger, Burkhardt, Casanova (Glion), Casutt-Derungs, Caviezel (Cuira), Claus, Crameri, Danuser, Della Vedova, Dosch, Fasani, Felix (Scuol), Florin-Caluori, Foffa, Giacomelli, Hardegger, Holzinger-Loretz, Jenny, Joos, Kasper, Koch (Tumein), Koch (Igis), Kunz (Fläsch), Kunz (Cuira), Kuoni, Michael (Castasegna), Nay, Niederer, Niggli (Samedan), Papa, Pedrini, Peyer, Salis, Schneider, Schutz, Stiffler (Tavau Plaz), Stiffler (Cuira), Thomann-Frank, Tomaschett (Breil), Troncana-Sauer, Vetsch (Claustra Vitg), Waidacher, Widmer-Spreiter, Wieland, Buchli (Tenna), Calonder, Niederberger-Schwitter, Stäbler

Resposta da la regenza

La regenza è conscienta dal fatg ch'ina buna cuntanschibladad da las regiuns metropolitanas vischinas cun il traffic public è impurtanta. L'attractivitad dal Grischun sco plazza turistica ed economica e sco lieu da domicil dependa tranter auter fermamain da la colliaziun cun la rait da viafier internaziunala. Uschia è la qualitad da la cuntanschibladad en general in factur essenzial per il svilup social ed economic futur da noss chantun.

Ils onns passads è ina meglra colliaziun dal Grischun cun ils centers ils pli impurtants al nord ed al sid savens vegnida tractada en studis da traffic. En il rom dal project "Planisaziun da novas colliaziuns da traffic" (missiva da la regenza al cussegl grond, carnet nr. 12 / 2012–2013) ha la regenza laschà far in studi da concept per ina meglra colliaziun dal chantun cun las regiuns metropolitanas svizras ed europeicas sin la viafier. En il rom da l'approfundaziun da l'idea da project "Alptrain" ha ella ultra da quai laschà retschertgar differentas variantas d'ina nova transversala da las Alps tras il Grischun.

Tenor il studi da concept custass ina viafier orientala da las Alps Cuira – Milaun, tut tenor la varianta, tranter 20 e 28 milliardas francs (Cuira – Clavenna: 11 – 15 milliar-das francs; Clavenna – Milaun: 9 – 13 milliardas francs). Las expensas d'investiziun en il corridor Cuira – Val dal Rain – Minca importassan, tut tenor la varianta, circa 1 – 6 milliardas francs.

Considerond quests auts custs d'investiziun e sin basa dal fatg che parts essenzialas da las investiziuns vegnissan fatgas ordaifer il chantun Grischun ed ordaifer la Svizra, fissan ferms partenadis naziunals ed europeics indispensabels per pudair dar ina schanza reala a l'idea da realisar ina viafier orientala da las Alps. Mesiras ordaifer il chantun ed ordaifer la Svizra pon numnadamain vegnir persequitadas e realisadas mo tras ils pajais correspundents sezs. In tal project stuess perquai vegnir inizialisà cun success d'in parlament naziunal u schizunt dal parlament europeic.

La realisaziun d'ina colliaziun transalpina supplementara tranter la nova lingia da viafier tras il Gottard ed il tunnel da basa dal Brenner, ch'è en planisaziun, fiss ina prestaziun naziunala ed europeica extraordinaria che para strusch dumagnabla. Per quests motivs n'èn las variantas per novas transversalas da las Alps tras il chantun Grischun betg vegnidas approfundadas ulteriuramain.

Il mantegniment da la substanza sco er l'amplificaziun da l'infrastructura da viafier svizra vegnan finanziads dapi il 1. da schaner 2016 sur il fond per l'infrastructura da viafier (FIV) da la confederaziun. Ils projects correspundents vegnan planisads da la confederaziun en il rom d'in process cuminaivel cun las viafiers e cun ils chantuns. Questas planisaziuns vegnan lura integradas en uschenumnads programs da svilup strategics (PROSSIV). L'uffizi federal da traffic (UFT) planisescha actualmain il pass d'amplificaziun PROSSIV 2030. En elavuraziun èn duas variantas: d'ina vart in'amplificaziun cun projects per circa 7 milliardas francs, da l'autra vart ina segunda varianta cun amplificaziuns per maximalmain 12 milliardas francs.

En il rom dals projects PROSSIV vegn la regenza a s'engaschar er vinavant per ina meglra colliaziun dal chantun cun las regiuns metropolitanas Francfurt, Minca, Milaun e Turitg. L'elavuraziun d'in nov rapport davart ina viafier orientala da las Alps na fiss dentant betg cunvegnenta e chaschunass ultra da quai custs sproporziunads, entant che las schanzas da pudair realisar in tal project transcunfinal fissan fitg pitschnas. La regenza propona perquai da refusar l'incumbensa.

21 d'avrigl 2017