Navigation

Inhaltsbereich

Sessiun: 19.04.2017

Polizistas e polizists vegnan adina puspè filmads u fotografads tar lur lavur. Pli e pli vegnan las sequenzas publitgadas sin social media. Silsuenter vegn discutada vastamain – tut tenor l'acziun – la lavur d'ina polizista resp. d'in polizist, er sch'ella u el vegn attatgà. Ultra dal respect envers las polizistas ed ils polizists che manca pli e pli, paran ils dretgs persunals d'esser irrelevants.

Las deputadas ed ils deputads sutsegnads dumondan perquai la regenza il suandant:

1. Dastgan fotografias da polizistas e polizists da la polizia chantunala dal Grischun u d'ina polizia communala vegnir publitgadas oz senz'auter, en spezial senza il consentiment da las polizistas e dals polizists, oravant tut en l'internet?

2. Prevesa la regenza da relaschar – a chaschun da la proxima revisiun da la lescha da polizia – disposiziuns pertutgant la protecziun da las polizistas e dals polizists grischuns?

Cuira, ils 19 d'avrigl 2017

Cavegn, Caduff, Salis, Berther (Mustér), Blumenthal, Bondolfi, Buchli-Mannhart, Burkhardt, Caluori, Casanova (Glion), Crameri, Danuser, Darms-Landolt, Davaz, Della Vedova, Dermont, Dosch, Epp, Fasani, Felix (Haldenstein), Florin-Caluori, Foffa, Geisseler, Grass, Gunzinger, Hardegger, Hitz-Rusch, Jeker, Koch (Tumein), Kollegger, Komminoth-Elmer, Kunfermann, Lamprecht, Locher Benguerel, Mani-Heldstab, Märchy-Caduff, Michael (Donat), Müller, Nay, Niederer, Niggli (Samedan), Niggli-Mathis (Grüsch), Noi-Togni, Papa, Paterlini, Pedrini, Sax, Schneider, Stiffler (Tavau Plaz), Tomaschett (Breil), Tomaschett-Berther (Trun), Weber, Widmer-Spreiter, Zanetti, Cantieni, Costa, Gugelmann, Hartmann-Conrad (Schiers), Heini, Lombardi

Resposta da la regenza

Per incumbensa da la federaziun svizra dals funcziunaris da polizia (FSFP) è vegnida fatga il mars 2015 in'expertisa giuridica davart la protecziun da la persunalitad d'appartegnents da la polizia. Quella expertisa s'occupa tranter auter detagliadamain dal dretg sin l'agen maletg e dal "bashing en l'internet". La prevenziun svizra da la criminalitad PSC ha ultra da quai preparà il schaner 2015 in prospect cun il tema "Dretg sin l'agen maletg", che stat a disposiziun sin mintga post da polizia da la Svizra. El po vegnir chargià giu sut www.skppsc.ch e cuntegna respostas explicativas ed exempels concrets.

1. Il maletg da polizistas e da polizists dastga vegnir publitgà en las medias, sch'i po vegnir fatg valair in motiv da giustificaziun per quai; en dumonda vegn cunzunt l'interess public predominant, particularmain l'interess public d'infurmaziun.

In interess public exista tar eveniments spezials sco arrestaziuns u tar occurrenzas sco demonstraziuns ed acts da violenza. Quest interess public cumpiglia er l'activitad da la polizia sezza. Appartegnents da la polizia sa movan – per ademplir lur incumbensa surdada ad els dal stadi – en il sectur cuminaivel. Perquai ston els acceptar – sa basond sin l'interess public d'infurmaziun – ch'i vegnian fatgs maletgs dad els e dals andaments ch'interessan. Maletgs d'appartegnents da la polizia a lur lavur èn pia permess e da princip n'exista nagina violaziun dals dretgs persunals protegids tras l'art. 28 CCS. Sche far ils maletgs sco tals impedescha la lavur da la polizia, po dentant vegnir fatg valair il causal penal da l'impediment d'in act uffizial (art. 286 CCS). Tenor il Tribunal federal è il causal però ademplì mo, sch'el impedescha "en moda gravanta la lavur da registraziun e la preschientscha fisica en acts polizials".

La permissiun da far maletgs d'appartegnents da la polizia en lur funcziun publica e sin basa da l'interess public d'infurmaziun na vala betg absolutamain. Purtrets d'appartegnents da la polizia, maletgs dad els a proxima distanza u tras fotografias correspundentas cun teleobjectivs n'èn betg permess, sch'els vulan mo accentuar la persuna sezza. Quai è il cas cunzunt, sch'i n'exista nagin act u nagin ulteriur connex cun il tema dal rapport, sch'il maletg vegn pia mo fatg per preschentar ils appartegnents da la polizia sezs.

Sch'in maletg vegn fatg e sche sia publicaziun è permessa, po quella avair lieu tel quel. Perquai ch'il maletg sco tal è permess, na sto el er betg vegnir midà cun p.ex. render nunenconuschaivels ils appartegnents da la polizia che figureschan sin tal.

Ina violaziun da la persunalitad po esser avant maun, sche l'identitad da polizistas e polizists cumpara cun cumbinar differentas infurmaziuns sin paginas d'internet e sch'i resulta in tschert profil. Ina violaziun da la persunalitad u ina cuntravenziun cunter causals penals sco calumnia, diffamaziun u ingiuria po esser avant maun, sche infurmaziuns chargiadas sin la rait servan a discreditar singuls appartegnents da la polizia tras "bashing en l'internet".

2. En il rom da la proxima revisiun da la lescha da polizia n'èn betg previsas ulteriuras disposiziuns pertutgant la protecziun da la persunalitad da polizistas e polizists. Las persunas pertutgadas pon far valair violaziuns da la persunalitad en ina procedura civila u penala. Per proteger la persunalitad da tut las collavuraturas e da tut ils collavuraturs porscha il chantun Grischun sustegn cunzunt en il senn da protecziun giuridica.

28 da zercladur 2017