La regenza sentenziescha cun tutta vehemenza violenza e smanatschas cunter polizistas e polizists. La tematica da violenza ha ina relevanza speziala tar tut ils corps da polizia, e quai sulet gia perquai ch'els han il dretg d'applitgar meds da sforz cunter persunas sin fundament dal monopol da pussanza dal stadi. En il rom da la lavur da la polizia è perquai avant maun in privel pli grond da vegnir smanatschà u schizunt attatgà da persunas.

1. Cumpareglià cun las citads da Berna, Basilea, Turitg u Genevra èn il chantun Grischun e la citad da Cuira pertutgads main ferm da violenza e da smanatschas cunter polizistas e polizists. Constatar pon ins dentant ina mancanza creschenta da respect envers la polizia. Da l'autra vart dastgi dentant vegnir constatà ch'igl è mintgamai avant maun ina gronda stima envers la polizia en il Grischun, en spezial a chaschun dad occurrenzas grondas sco il WEF u ils campiunadis mundials da skis 2017.

En la statistica criminala da la polizia vegn registrà il causal penal "violenza e smanatschas cunter autoritads e cunter funcziunaris" (art. 285 CP). La statistica na differenziescha en quest connex betg tranter commembers da la polizia e collavuraturs d'autras autoritads, perquai ch'il causal penal pertutga tut las autoritads. La statistica per tut las autoritads mussa – repartì sin las regiuns da polizia – il suandant maletg:

2. L'evaluaziun dals rapports redigids sin basa da l'art. 285 CP ha mussà per l'onn 2016 (24 cas) ch'i sa tractava – tar las persunas donnegiadas – da 22 polizistas e polizists e da 17 represchentants d'autras autoritads. A maun da las annunzias d'accidents hai pudì vegnir eruì che trais da las 22 polizistas e polizists pertutgads èn vegnids blessads tar dus incidents (pugnadas / morsa).

3. Violenza, ma er ingiurias e smanatschas envers polizistas e polizists èn inacceptablas. La regenza na tolerescha en nagina moda e maniera attatgas cunter polizistas e polizists. Areguard la mancanza creschenta da respect envers polizistas e polizists sa tracti d'in aspect d'in fenomen social che po vegnir observà en general; chattar soluziuns sveltas n'è perquai betg facil. La tematica è vegnida discutada quest onn detagliadamain a chaschun da la conferenza da primavaira da las directuras e dals directurs chantunals da giustia e polizia da la Svizra orientala (CDCGP-ost). Sut la direcziun da Reto Cavelti, president dad ostpol.ch, èsi vegnì concludì da nominar ina gruppa da lavur. Quella duai – cun l'integraziun da la conferenza dals cumandants da las polizias chantunalas da la Svizra (CCPCS), dals corps da polizia da las citads sco er da la federaziun dals funcziunaris da polizia – analisar ils problems e preschentar soluziuns pussaivlas ord vista da la polizia. Il document da basa duai esser avant maun l'atun 2017. Dal rest è la regenza – sco il parlament federal er – da l'avis che las disposiziuns penalas actualas bastian.

4. En la scola da polizia da la Svizra orientala ad Amriswil vegnan tut las polizistas e tut ils polizists futurs instruids en quest sectur e scolads areguard il cumportament. Sche polizistas e polizists daventan victimas d'attatgas verbalas u corporalas, han ellas ed els a disposiziun differentas pussaivladads da sustegn, entaifer ed ordaifer il corp. Sin plaun nunbirocratic stattan a disposiziun tar la polizia chantunala en spezial uschenumnads "peers". I sa tracta da commembras e commembers da la polizia ch'èn vegnids scolads spezialmain en agid d'urgenza psicologic ed en communicaziun. Questas persunas stattan a disposiziun per assister e sustegnair en moda colleghiala collavuraturas e collavuraturs da la polizia chantunala ch'èn exponids u stads exponids ad in eveniment engrevgiant. En cas da basegn vegnan intermediads contacts cun persunas spezialisadas externas adattadas (medias e medis, psicologas e psicologs, terapeutas e terapeuts).

28 da zercladur 2017