Navigation

Inhaltsbereich

Sessiun: 13.06.2017

Durant 200 onns ha il Sennhof da Cuira dà alloschi a la praschun grischuna. L'ultim en la versiun ch'è anc oz caracteristica da l'architect Theodor Hartmann, che ha – en il rom da la renovaziun da l'onn 1966 – taglià ora in toc dal mir da citad.

Cun prender en funcziun il nov stabiliment per l'execuziun giudiziala Realta a Cazas na vegn betg mo liquidà gia en dus onns il manaschi d'arrest, mabain "tenor la strategia chantunala d'immobiglias" dischlocada er la procura publica, sco ch'i communitgescha l'architect chantunal Markus Dünner. Uschia daventa il Sennhof per uschè dir malnizzaivel. Sin giavisch da la regenza duai el vegnir vendì a tgi che fa la meglra offerta. Quai sveglia dumondas. Perquai ch'il Sennhof n'è betg mo il simbol d'in toc remartgabel da l'istorgia d'abitadi e da citad da Cuira, mabain er per il senn cuminaivel dal Grischun sco tal.

Nus vulessan savair da la regenza, co ch'il chantun s'imaginescha la futura utilisaziun dal Sennhof, co ch'el quinta da proceder e co che la citad da Cuira vegn integrada.

Las sutsegnadras ed ils sutsegnaders tschentan en quest connex las suandantas dumondas a la regenza:

1. Tge è vegnì fatg fin ussa concernent l'utilisaziun dal vegl Sennhof?

2. Co pensa la regenza da daventar activa en questa tematica?

3. Co pensa la regenza da proceder (concurrenza, publicaziun a tgi che fa la meglra offerta ...)?

Cuira, ils 13 da zercladur 2017

Widmer-Spreiter, Stiffler (Cuira), Tenchio, Blumenthal, Bondolfi, Brandenburger, Bucher-Brini, Buchli-Mannhart, Cahenzli-Philipp, Caluori, Casty, Casutt-Derungs, Caviezel (Cuira), Clalüna, Claus, Danuser, Davaz, Deplazes, Dermont, Dosch, Dudli, Epp, Foffa, Gartmann-Albin, Hitz-Rusch, Holzinger-Loretz, Jaag, Jenny, Kappeler, Kollegger, Komminoth-Elmer, Kunz (Cuira), Lamprecht, Locher Benguerel, Lorez-Meuli, Mani-Heldstab, Michael (Donat), Müller, Nay, Noi-Togni, Papa, Paterlini, Pedrini, Perl, Pult, Schutz, Thomann-Frank, Thöny, Tomaschett (Breil), Troncana-Sauer, Weidmann, Wieland, Altmann, Berther (Segnas), Bossi, Geisseler Severin, Pfister, Wellig

Resposta da la regenza

Ils 27 d'avust 2015 ha il cussegl grond approvà il project per construir in nov stabiliment giudizial serrà a Realta, vischnanca da Cazas, cun custs bruts da 119 milliuns francs. En il fratemp è vegnì construì e mess en funcziun il nov edifizi d'orticultura. La construcziun dal stabiliment giudizial progredescha confurm al termin e la finiziun da las lavurs da construcziun è previsa per la fin da la stad da l'onn 2019. Alura suondan ils tests integrals ed a partir da la fin da l'onn l'avertura successiva dal manaschi. Il cumenzament da l'onn 2020 duain ins serrar il manaschi da la praschun chantunala dal Sennhof.

Tenor la strategia chantunala d'immobiglias/planisaziun da biros duain ils lieus da la procura publica a Cuira medemamain vegnir fusiunads e transferids en l'edifizi administrativ chantunal a la Rohanstrasse 5. Ma quai po capitar pir pli tard. L'emprim duain ils posts da servetsch domiciliads là (uffizi d'energia e da traffic, inspecturat dal register funsil e register da commerzi, uffizi per la furmaziun professiunala ed uffizi social) vegnir spustads en novs lieus, per ch'ils locals respectivs possian vegnir renovads ed adattads als basegns da la procura publica. Las midadas da chasa ston vegnir coordinadas en il rom da la planisaziun da biros ed areguard l'edifizi administrativ "sinergia" la primavaira 2020. La partenza da la procura publica davent dal Sennhof po pia avair lieu il pli baud il cumenzament da l'onn 2021.

Tar las singulas dumondas:

1. L'onn 2014 ha l'uffizi da construcziun auta laschà far ils architects Bearth & Deplazes, Cuira, in'analisa/in studi da l'immobiglia Sennhof. En questa lavur vegnan analisadas las basas urbanisticas e l'edifizi sco er mussadas pussaivladads d'ina utilisaziun futura dal Sennhof.

Ulteriuras pussaivladads d'utilisaziun èn vegnidas elavuradas l'onn 2015 en il rom da tschintg lavurs da master e da bachelor tras studentas e students da l'universitad dal Liechtenstein. Il tema da l'incumbensa era quel d'obtegnair in'utilisaziun persistenta, ecologica ed economica dal Sennhof.

Las analisas da l'effectiv e las ponderaziuns davart utilisaziuns futuras da la praschun en la citad veglia da Cuira han producì propostas interessantas. En lur totalitad mussan ellas ch'il Sennhof ha il potenzial per in'ulteriura utilisaziun e ch'el po augmentar considerablamain la valur dal lieu en la citad veglia.

Ord vista urbanistica èsi attractiv da mantegnair l'areal en sia structura da basa da l'edifizi e da modifitgar ses diever tras mesiras architectonicas minimalas. La dumonda da surfatschas d'abitar u da mastergn dastgass esser gronda pervia da la situaziun centrala e quieta a l'ur ost da la citad veglia da Cuira.

2. Ils studis da realisabladad/d'utilisaziun ch'èn vegnids fatgs èn in emprim pass per transfurmar l'utilisaziun dal Sennhof. Ils proxims pass èn gia instradads. Ensemen cun la citad da Cuira vegnan definidas las pretensiuns e las cundiziuns generalas per ina nova utilisaziun persistenta a favur dal chantun e da la citad.

3. Igl è previs da surdar l'areal en il dretg da construcziun. Ord vista da la regenza dovri per quest intent stringentamain ina procedura che garantescha la qualitad. Uschia èsi pussaivel da realisar las ideas dal chantun e da la citad en moda coordinada e d'observar las prescripziuns dal dretg da finanzas. La clera finamira è l'agiudicaziun ad in project urbanisticamain ed architectonicamain persistent per in tschains dal dretg da construcziun confurm al martgà. Ina concurrenza d'investiders è in instrument che tegna quint da questa finamira. Ella duai vegnir realisada l'onn 2018.

23 d’avust 2017