Zum Seiteninhalt

Dumonda Baselgia-Brunner concernent agids finanzials per la tgira d'uffants confurm als basegns

sessiun: 14.06.2017

Perquai ch'il maun public na sa participescha strusch als custs per la tgira d'uffants cumplementara a la famiglia en Svirza, èn quels surproporziunalmain auts en la cumparegliaziun internaziunala. En blers cas na rendi betg, sche tuts dus geniturs van a lavurar. Tant sut l'aspect da la politica da famiglia sco er en vista a la mancanza da persunas spezialisadas sto quest stimul negativ per l'activitad da gudogn urgentamain vegnir reducì.

Perquai metta la confederaziun a disposiziun ils proxims 5 onns var 100 milliuns francs per dar in impuls ch'ils chantuns e las vischnancas investeschan dapli en la tgira d'uffants cumplementara a la famiglia. D'ina vart duain ils custs da tgira vegnir reducids e da l'autra vart duain vegnir sustegnids projects che coordineschan meglier la purschida da tgira cun ils basegns da geniturs cun activitad da gudogn (p.ex. purschidas da tgira durant las vacanzas da scola u en cas da temps da lavur irregulars en spezial en il sectur da tgira ed en regiuns turisticas).

1. Tge pass concrets planisescha il chantun per profitar dals meds finanzials federals che stattan a disposiziun?

2. Co vesa ora il rom temporar?

Ultra da quai sa tschenta en las canortas d'uffants pitschens en connex cun l'integraziun d'uffants cun impediments u cun in basegn spezial da promoziun la dumonda da la finanziaziun.

3. Tgi surpiglia ils custs supplementars per il persunal ch'i dovra en las canortas d'uffants pitschens per la tgira d'uffants cun impediments?

Cuira, ils 14 da zercladur 2017

Baselgia-Brunner, Bucher-Brini, Atanes, Cahenzli-Philipp, Caviezel (Cuira), Deplazes, Gartmann-Albin, Jaag, Locher Benguerel, Monigatti, Noi-Togni, Perl, Peyer, Pfenninger, Pult, Thöny

Resposta da la regenza

La regenza renconuscha l'impurtanza da la cumpatibilitad da famiglia e professiun. Cun la lescha davart la promoziun da la tgira d'uffants cumplementara a la famiglia en il chantun Grischun (DG 548.300) dispona il chantun Grischun d'ina basa legala per sustegnair purschidas da la tgira d'uffants. Questa lescha è en vigur dapi il november 2003. Sa basond sin quai defineschan las vischnancas en collavuraziun cun las purschidras ed ils purschiders renconuschids il basegn da purschidas da la tgira d'uffants cumplementara a la famiglia. La participaziun dal chantun e da las vischnancas als custs normads importa actualmain mintgamai 20 %, totalmain 40 %, en cas da purschidas existentas e mintgamai 25 %, totalmain 50 % en cas da purschidas novas. La regenza fixescha l'autezza dals custs normads e l'autezza da la tariffa da contribuziun. La vischnanca da domicil sto sa participar almain en la medema dimensiun sco il chantun. La legislaziun da l'onn 2003 ha pussibilità in augment tranter ils onns 2004 e 2017 da 180 plazzas sin 742 plazzas da tgira permessas e subvenziunadas en il chantun.

Tar la dumonda 1: La fin da schaner 2019 scada la segunda prolungaziun dal program d'impuls da la confederaziun per l'extensiun da plazzas per la tgira d'uffants. Perquai vegn il subvenziunament da purschidas en il sectur da tgira d'uffants cumplementara a la famiglia examinà cun il punct central da svilup (PS 11/23) 2017–2020 "Promover la coesiun sociala e garantir la segirezza sociala". A medem temp vegnan fixadas las opziuns d'agir en vista als novs agids finanzials da la confederaziun.

Tar la dumonda 2: En il rom da la revisiun da la lescha federala davart ils agids finanzials per la tgira d'uffants cumplementara a la famiglia (CS 861) metta la confederaziun a disposiziun durant 5 onns a partir da l'entrada en vigur da la nova lescha 96,8 milliuns francs sco finanziaziun iniziala en furma d'in credit d'impegn. Durant 5 onns po la confederaziun surpigliar obligaziuns envers ils chantuns en furma da la nova finanziaziun iniziala. L'entrada en vigur da la lescha federala è planisada en il decurs da l'onn 2018. Fin il pli tard l'onn 2023 sto il chantun Grischun inoltrar ina dumonda, sch'el vul far diever dals agids finanzials da la confederaziun.

Tar la dumonda 3: Il chantun garantescha la purschida da la pedagogia speziala e sia realisaziun en il sectur pretensius tranter auter per uffants da la vegliadetgna prescolara cun in basegn spezial da promoziun (art. 44, art. 47 al. 2 ed art. 78 da la lescha davart las scolas popularas dal chantun Grischun, lescha da scola; DG 421.000). Questas mesiras cumpiglian l'educaziun prescolara pedagogic-curativa, la logopedia en il sectur tempriv, l'audiopedagogia sco er las mesiras tar donns da la vesida (art. 44 al. 5 da l'ordinaziun tar la lescha da scola). Il servetsch da pedagogia curativa (SPC) realisescha las mesiras en cas d'in grond basegn da promoziun per ils uffants dal sectur da la scola preliminara per regla a chasa u en localitads adattadas dal SPC. Tar las mesiras da la pedagogia speziala per uffants da la vegliadetgna prescolara cun in basegn spezial da promoziun tutgan ultra da quai la tgira staziunara d'uffants cun impediments considerabels avant ch'els entran en scolina, che vegn garantida da l'instituziun da la scolaziun speziala Scalottas e ch'è vegnida duvrada per in uffant dapi l'entrada en vigur da la lescha da scola vertenta.

La lescha da scola na porscha betg ina basa legala per contribuziuns dal chantun a favur da la tgira d'uffants cun in basegn spezial da promoziun en canortas d'uffants.

23 d'avust 2017