Cuntegn da la pagina

Incumbensa Engler concernent la meglieraziun da la cuntanschibladad dal Grischun

sessiun: 14.06.2017

La proposta da la regenza da refusar l'incumbensa Engler concernent la renaschientscha da l'idea d'ina viafier orientala da las Alps è chapaivla pervia dals custs, n'ans dastga però betg surmanar da perder or dals egls la cuntanschibladad da noss chantun.

En vista a la – er per la regenza – incontestadamain gronda impurtanza d'ina buna cuntanschibladad dal Grischun nà da las regiuns metropolitanas vischinas duai l'idea d'ina viafier orientala da las Alps tenor il concept dad AlpTrain per il traffic da persunas svelt vegnir persequitada vinavant sco visiun.

D'ina retschertga (rapport dals 15.12.2011) resorta ch'ils potenzials ils pli gronds per il Grischun èn avant maun en las regiuns metropolitanas da Turitg e da Milaun. Sco emprim pass duai il focus perquai vegnir mess sin l'engrondiment da la lingia Turitg–Cuira. Da colliar il Grischun meglier cun la regiun metropolitana da Turitg cuntegna per differents motivs las schanzas las pli grondas da pudair sviluppar vinavant il chantun en moda decisiva e persistenta. I sto esser la finamira da questa retschertga da chattar soluziuns ch'èn substanzialmain pli favuraivlas envers il studi avant maun «Zu(g)kunft Zürich–Chur» dal 1. da mars 2010.

Ultimamain è vegnì preschentà cun Hyperloop One in nov sistem da traffic (viafier da suspensiun magnetica). Cun ina sveltezza da viadi da var 1000 km/h sco er cun investiziuns marcantamain pli favuraivlas pudessan vegnir dadas a la realisaziun da la viafier orientala da las Alps ina dimensiun ed ina dinamica absolutamain nova.

Las sutsegnadras ed ils sutsegnaders incumbenseschan la regenza da preschentar al cussegl grond fin mez 2019 in rapport preliminar tenor il concept da la viafier orientala da las Alps/dal AlpTrain che cuntegna ils suandants scleriments:

1. Realisabladad tecnica d'in engrondiment da la lingia Turitg–Cuira a custs bass («low-cost») per in temp da viadi sut in'ura sco er cun investiziuns da max. 3-4 milliardas francs. Il studi dal 1. da mars 2010 n'arriva betg d'ademplir questas cundiziuns. L'engrondiment sto vegnir annunzià stringentamain a chaschun dal proxim pass d'engrondiment dal program da svilup strategic da l'infrastructura da viafier (PROSSIV). Per accelerar l'engrondiment sto il chantun examinar las pussaivladads d'ina prefinanziaziun.

2. Eruida dal niz per l'economia da manaschi/economia publica sco er giudicament dals aspects dal traffic e da l'ecologia sco er ina valitaziun da la dumonda.

3. Scleriment preliminar da las schanzas ch'ina viafier da suspensiun magnetica sutterrana (tenor Hyperloop One) saja construibla e realisabla sco alternativa ad in engrondiment d'ina viafier d'auta sveltezza a binaris normals a l'exempel dal traject da referenza Turitg–Cuira.

Cuira, ils 14 da zercladur 2017

Engler, Caluori, Jeker, Alig, Bondolfi, Buchli-Mannhart, Burkhardt, Caduff, Cahenzli-Philipp, Caviezel (Cuira), Della Vedova, Felix (Scuol), Giacomelli, Hitz-Rusch, Holzinger-Loretz, Jaag, Jenny, Joos, Kasper, Kunfermann, Kunz (Fläsch), Kunz (Cuira), Locher Benguerel, Marti, Paterlini, Peyer, Pfenninger, Pult, Schneider, Schutz, Steiger, Stiffler (Tavau Plaz), Stiffler (Cuira), Tenchio, Thomann-Frank, Tomaschett (Breil), Troncana-Sauer, Vetsch (Pragg-Jenaz), von Ballmoos, Wieland, Altmann, Berther (Segnas), Gassmann, Geisseler Severin, Pfister, Plattner Gerber, Wellig

Resposta da la regenza

La regenza è conscienta dal fatg che colliaziuns sveltas dal traffic public cun il Grischun èn impurtantas. Il traject da las Viafiers federalas (VFF) Turitg – Cuira è l'apportader il pli impurtant ed in factur economic central per il Grischun sco lieu attractiv per viver, per lavurar e per il turissem. En la missiva da la regenza al cussegl grond concernent la planisaziun da novas colliaziuns da traffic (NCT; carnet nr. 12 / 2012–2013, p. 822 ss.) è l'acceleraziun dal traject VFF Turitg – Cuira vegnida valitada sco project A. L'incumbensa d'approfundar ils studis per ina colliaziun pli svelta Cuira – Turitg è part da la missiva ed anc adina valaivla.

1. Ils custs da circa 8,5 milliardas francs ch'èn vegnids calculads en il studi NCT valan anc adina. Las acceleraziuns en tut il sistem da las chadainas da transport pon vegnir cuntanschidas mo cun ina reducziun dal temp da viadi a sut in'ura. Cun in'extensiun da «low cost» che custass mo 3–4 milliardas francs na po la reducziun dal temp da viadi giavischada betg vegnir realisada. Independentamain da la reducziun dal temp da viadi prendida en mira resulta er in cler augment da l'attractivitad, sche las meglieraziuns dal manaschi e da l'infrastructura èn pli pitschnas e vegnan fatgas mo en tscherts puncts. Quai pon esser colliaziuns nà da l'exteriur senza ch'ins stoppia midar tren, u trens directs a l'eroport da Turitg. In dals projects ils pli impurtants è però la densificaziun da las colliaziuns IC ad in tact da mes'ura integral. Uschia na pon bleras chadainas da transport betg mo vegnir acceleradas per 15 minutas, mabain per 30 minutas. Quai duai vegnir realisà il pli tard l'onn 2025.
En il rom dal «Program da svilup strategic da l'infrastructura da viafier» (PROSSIV) da la confederaziun èn planisadas mesiras d'infrastructura che han l'intenziun d'augmentar vinavant la capacitad e la stabilitad dal manaschi. La restructuraziun da la staziun da Landquart vegn a pussibilitar en l'avegnir da midar da las VFF a la Viafier retica sin il medem perrun. Uschia profitescha tut il chantun Grischun da chadainas da transport acceleradas e pli cumadaivlas.

2. Cun il studi NCT è gia vegnì eruì il niz per l'economia da manaschi e per l'economia publica, èn gia vegnids giuditgads ils aspects dal traffic e da l'ecologia ed è er gia vegnida valitada la dumonda. In ulteriur rapport na porta – ord vista da la regenza – naginas enconuschientschas novas.

3. La viafier da suspensiun magnetica (Hyperloop One) sa chatta anc en la fasa da svilup. Actualmain exista mo in traject da test fitg curt en il desert da Nevada (USA). Ils custs d'investiziun effectivs na pon anc betg vegnir stimads. En cas dal project Swissmetro èn gia vegnids fatgs scleriments preliminars sumegliants che mussan che la schanza da realisar in tal project è fitg pitschna. Ina viafier da suspensiun magnetica na vegn ultra da quai betg considerada sco med da transport ideal per la colliaziun cun il Grischun, perquai ch'ella purtass ina midada da sistem e perquai ch'i stuess – sco consequenza – vegnir renunzià a colliaziuns cun la Svizra e cun l'exteriur senza stuair midar tren. Ultra da quai pon (tenor il studi da martgà europeic per il sistem Swissmetro da la scola politecnica federala da Turitg da l'onn 2006) gudogns da temp da viadi vegnir realisads cun ina viafier da suspensiun magnetica pir a partir d'ina distanza da passa 200 km. Ultra da quai ha ina viafier da suspensiun magnetica ina capacitad pli pitschna cumpareglià cun in sistem da viafier convenziunal. Uschia na pudessan cun ina viafier da suspensiun magnetica gia oz betg vegnir cuvridas cumplainamain las dumondas da trens da las VFF durant las fins d'emna d'enviern. Per ils motivs menziunads qua survart na vesa la regenza nagin basegn per far in scleriment preliminar da la realisabladad/da las schanzas da realisar ina viafier da suspensiun magnetica sutterrana Turitg – Cuira e refusescha questa part da l'incumbensa.

La regenza resguarda l'acceleraziun e l'augment da l'attractivitad dal traject Turitg – Cuira sco ina incumbensa permanenta impurtanta. Perquai è ella pronta d'acceptar l'incumbensa cun las restricziuns menziunadas qua survart en quel senn ch'ella s'oblighescha da persequitar vinavant cun auta prioritad tut las pussaivladads che megliereschan la cuntanschibladad dal Grischun, sco er da far sforzs per ch'ellas vegnian realisadas.

23 d'avust 2017