Zum Seiteninhalt

Incumbensa Stiffler (Cuira) concernent la pratica dals departaments chantunals per surdar incaricas da prestaziuns da servetsch a terzs en cas da publicaziuns betg uffizialas

sessiun: 14.06.2017

En il chantun vegn surdada la clera maioritad da las incaricas da prestaziuns da servetsch dals departaments chantunals a terzs en la procedura directa ed en la procedura d'invit, sch'i sa tracta da publicaziuns betg uffizialas. Gist quest proceder liber pretenda transparenza per stgaffir confidenza. La resposta da la regenza a la dumonda Stiffler, ch'era vegnida inoltrada il december 2016 e che tractava las surdadas menziunadas qua survart, conferma che 51 pertschient, vul dir passa la mesadad dal volumen d'incaricas da l'uffizi per economia e turissem (UET) vegn surdà ordaifer il chantun. Cumbain ch'il UET era vegnì incaricà da surdar al cussegl grond ina glista dals detagls da surdada e cumbain che questa incarica correspunda a la lescha da transparenza, n'è questa glista anc betg avant maun fin oz.

Dapi la debatta dal cussegl grond da l'avrigl 2017 vegni perquai supponì ch'i existian tar il UET dependenzas considerablas da partenaris da blers onns, ch'i hajan lieu bleras subsurdadas d'incumbensas e che submissiuns vegnian guntgidas sistematicamain tras surdadas da projects parzials.

Per refutar questas supposiziuns sto vegnir stgaffida transparenza en ils fatgs da surdada. La revelaziun na dastga perquai betg mo sa restrenscher al UET. Sur tut ils departaments e sur tut ils uffizis correspundents sto vegnir stgaffida transparenza. Nua che quai è pussaivel ed economicamain raschunaivel ston interpresas grischunas – che cumbattan cunter dischavantatgs dal lieu, che pajan qua taglia, che scoleschan lavurants e che stgaffeschan plazzas – vegnir resguardads tar surdadas chantunalas. Mo uschia fa la promoziun da l'economia chantunala effect, mo uschia vegnan mantegnidas plazzas da lavur e stgaffidas novas plazzas da lavur.

Las sutsegnadras ed ils sutsegnaders incumbenseschan la regenza:

1. da rapportar quantas incaricas da prestaziuns da servetsch – ordinadas tenor departament ed uffizi – ch'èn vegnidas surdadas ils ultims 3 onns en la procedura directa ed en la procedura d'invit ad offerents extrachantunals (dumber, procentuala, summa da tut las incaricas versus summa totala) e da mussar tge criteris che vegnan applitgads per envidar offerents en la procedura directa ed en la procedura d'invit.

2. da definir il know-how che manca en il chantun e da preschentar in'eventuala collavuraziun, uschia che interpresas grischunas survegnan pli savens incaricas.

3. da garantir ch'il spazi d'agir concedì dal legislatur vegnia tratg a niz en la procedura directa ed en la procedura d'invit (limitas minimalas, offerents che ston vegnir envidads) cumplainamain a favur da las firmas domiciliadas en il chantun, q.v.d. che mo questas firmas vegnian envidadas d'inoltrar offertas, sch'il know-how è avant maun, sco che quai è usità en auters chantuns. Uschia restan las plazzas da lavur ed il know-how en il chantun.

4. da suttametter surdadas en la procedura directa ed en la procedura d'invit a la lescha da transparenza e da communitgar quai en ina furma adattada, sco che quai è standard legal per incaricas grondas tenor la cunvegna GATT/WTO.

5. da render accessibla al cussegl grond immediatamain la glista da las publicaziuns betg uffizialas tar il UET ch'era vegnida pretendida il december 2016.

6. da publitgar la glista da las surdadas dal UET tranter il 1. da schaner 2017 ed ils 30 da zercladur 2017.

Cuira, ils 14 da zercladur 2017

Stiffler (Cuira), Dudli, Berther (Mustér), Alig, Blumenthal, Buchli-Mannhart, Burkhardt, Caluori, Casanova-Maron (Domat), Casty, Caviezel (Cuira), Caviezel (Tavau Clavadel), Claus, Darms-Landolt, Della Vedova, Dermont, Engler, Felix (Scuol), Gartmann-Albin, Giacomelli, Grass, Hitz-Rusch, Holzinger-Loretz, Jeker, Jenny, Joos, Kappeler, Kasper, Kunz (Fläsch), Kunz (Cuira), Locher Benguerel, Marti, Nay, Paterlini, Peyer, Pult, Salis, Schutz, Steck-Rauch, Stiffler (Tavau Plaz), Thomann-Frank, Troncana-Sauer, Valär, Vetsch (Pragg-Jenaz), von Ballmoos, Weber, Weidmann, Widmer-Spreiter, Wieland, Altmann, Pfister, Plattner Gerber, Wellig

Resposta da la regenza

La regenza è ordvart conscienta da la rolla dal chantun sco incumbensader impurtant, ed ella persequitescha attentamain quest fatg. Nua che quai è pussaivel e raschunaivel tira l'administraziun chantunala perquai a niz en general gia oz la libertad d'agir tenor la legislaziun da submissiun a favur da l'economia indigena. Offertas vegnan dumandadas en cas singuls en moda fitg restrictiva tar firmas extrachantunalas, sche quai è necessari pervia da las pretensiuns specificas da l'incarica e pervia da las cumpetenzas particularas da l'offerent en il sectur spezial respectiv.

Tenor las statisticas da surdada da blers onns han offerents grischuns pudì vegnir resguardads fin ussa en il chantun Grischun en la pli gronda part dals cas per las acquisiziuns dals incumbensaders publics. Uschia èn 80,6 pertschient da tut las surdadas che ston vegnir annunziadas tenor la prescripziun da la lescha chantunala da submissiun (tut las incaricas da construcziun, furniziuns, prestaziuns da servetsch a partir da 50 000 francs) idas l'onn da gestiun 2015 a firmas indigenas. En las proceduras directas ed en las proceduras d'invit han 81,7 pertschient dals furniturs da prestaziuns da servetsch gì l'onn 2015 lur sedia en il Grischun. Tar las surdadas da l'administraziun chantunala è questa valur stada cun 82,9 pertschient schizunt anc pli auta.

Las lavurs ch'eran vegnidas prendidas per mauns l'onn 2013 entaifer l'administraziun en consequenza da l'incumbensa acceptada Felix (Haldenstein) concernent l'impurtanza da las acquisiziuns publicas per l'economia publica cun l'intent da sondar eventualas ulteriuras libertads d'agir en la legislaziun da surdada, èn vegnidas sistidas ad interim en vista al fatg che la cumissiun da concurrenza (CUMCO) ha extendì las retschertgas sin l'entir territori chantunal sco er en vista a la revisiun parallela actuala da la legislaziun da surdada svizra. Questas lavurs duain pudair vegnir cuntinuadas l'onn proxim suenter ch'ils cuntegns correspundents èn enconuschents.

Tar las singulas dumondas:

1. En l'ambient politic actual renconuscha la regenza il basegn da transparenza supplementara en il sectur da las acquisiziuns. Cumplementarmain a la statistica da surdadas prescritta da la lescha è ella perquai pronta da rapportar davart las incaricas da prestaziuns da servetsch ch'ils departaments ed uffizis chantunals han surdà ils onns 2014–2016 en la procedura directa ed en la procedura d'invit. En enclegientscha cun las emprimas duas persunas che han sutsegnà l'incumbensa èsi – per cunfinar ils custs administrativs – vegnì fixà che las cudeschaziuns en la contabilitad da las finanzas duain servir sco basa da datas. Summas pli pitschnas na duain pia betg vegnir resguardadas.

2. En il rapport ch'è d'elavurar duai ultra da quai vegnir mussà, co ch'ina eventuala mancanza da know-how dals offerents indigens, cunzunt da manaschis pitschens e d'interpresas giuvnas, po vegnir cumpensada resp. sviluppada tar incaricas publicas, per che lur schanzas da survegnir incaricas dal maun public creschian.

3. Per la formulaziun da finamiras annualas dals uffizis vegn resguardada en l'avegnir explicitamain l'exauriziun da la libertad d'agir en cas da proceduras directas e da proceduras d'invit a favur da l'economia indigena. Ma a l'administraziun chantunala duai esser permess er vinavant d'incaricar offerents extrachantunals en cas da circumstanzas spezialas. Independentamain da quai vali d'examinar la pratica d'acquisiziun e da far eventualas correcturas necessarias per garantir il diever economic dals meds finanzials publics, suenter che la procedura currenta da la CUMCO e la revisiun menziunada da la legislaziun da surdada svizra èn terminadas.

4. Per augmentar la transparenza duain las incaricas ch'èn vegnidas surdadas dals singuls uffizis e ch'èn relevantas per l'economia grischuna pudair vegnir consultadas facilmain en l'avegnir. Il departament da construcziun, traffic e selvicultura vegn a relaschar ina directiva correspundenta per quest intent.

5./6. Las incaricas da prestaziuns da servetsch ch'èn vegnidas surdadas da l'uffizi per economia e turissem dapi l'onn 2012 figureschan sin la glista separada che po vegnir consultada sut https://www.gr.ch/DE/institutionen/verwaltung/dvs/awt/ueberuns/Seiten/Themen.aspx. En quest connex stoi vegnir remartgà che quest uffizi ha – pervia da ses champ d'incumbensas, pervia da las dumondas savens surregiunalas e pervia dal basegn cumprovà dad enconuschientschas specificas – plitost da basegn da consultar expertas ed experts extrachantunals.

Sut las restricziuns menziunadas è la regenza pronta d'acceptar questa incumbensa.

31 d'avust 2017