Igl è incontestà che la nova orientaziun da la Repower vegn caracterisada d'ina gronda dinamica en l'ambient politic ed economic actual sin il champ d'energia. Questa nova orientaziun ed il mantegniment dals interess a lunga vista èn davaira in sfida, e quai tant per l'interpresa sco er per il chantun.

Tar la dumonda 1: Sco acziunari principal dispona il chantun d'ina participaziun substanziala da 21,96 pertschient. Cun duas persunas grischunas è el represchentà bain en il cussegl d'administraziun da la Repower. Qua tras è er garantì il mantegniment da ses interess.

Tar la dumonda 2: En connex cun la tematica dal return als concedants na vesa la regenza nagin impediment per il mantegniment dals interess dal chantun e da las vischnancas envers la Repower. Ils puncts centrals da la strategia dal return als concedants èn cuntegnids en il rapport davart la politica d'electricitad dal chantun Grischun (rapport d'electricitad 2012). Ils proxims onns vegni a dar numerus returns als concedants durant in temp relativamain lung (principalmain tranter l'onn 2035 e l'onn 2050). La decisiun respectiva, sch'il chantun e las vischnancas concessiunaras duain far diever d'ina pussaivladad da participaziun, u la decisiun per in u l'auter gener da cuntinuaziun vegn mintgamai prendida sin basa d'in giudicament cumplessiv dal cas concret, uschia er en cas da la Repower.

Tar la dumonda 3: La Repower è francada bain en il Grischun. Mo gia per motivs tecnics (gestiun e mantegniment dals stabiliments da rait e da producziun) sto l'interpresa esser represchentada cun ses persunal e cun structuras decentralas en ils lieus, nua ch'ella è activa. Co che las singulas filialas en il Grischun sa sviluppan, dependa er da la realisaziun da la strategia da l'interpresa en detagl e da las midadas sin il martgà. La segirada da las plazzas da lavur e da las forzas spezialisadas correspundentas en la periferia dependa la finala er da cundiziuns generalas attractivas e dal fatg che l'interpresa sa sviluppia vinavant en moda positiva.

Tar la dumonda 4: L'occupaziun da la direcziun è chaussa dal cussegl d'administraziun. La regenza na va betg d'accord cun l'opiniun da las sutsegnadras e dals sutsegnaders, ch'ils "resultats dischagreabels" derivian decisivamain da faussas valitaziuns da la direcziun operativa. Gist en il temp il pli difficil ha la direcziun cumprovà ch'ella lavura cun cleras finamiras vi da la realisaziun da la strategia ch'è vegnida concludida dal cussegl d'administraziun e che vegn sustegnida dals acziunaris principals. Malgrà che la situaziun dal martgà è anc adina ina sfida, è ella sin buna via cun la strategia. Cun la nova strategia ha la Repower – tenor la persvasiun da la regenza – prendì la dretga via per daventar pli independenta dal pretsch d'electricitad absolut. Dal rest èn ils problems actuals da la branscha il motiv principal per la situaziun actuala – quai mussa cleramain er la situaziun tar autras interpresas d'energia.

Tar la dumonda 5: Per fixar la salarisaziun è cumpetent il cussegl d'administraziun. Resguardond las sfidas sin il martgà ed ils sforzs extraordinaris en quest connex, sa chatta l'indemnisaziun dal CEO e da la direcziun strategica en ina dimensiun cumparegliabla er en la cumparegliaziun da la branscha.

Tar la dumonda 6: Il cussegl d'administraziun stat serradamain davos la strategia da la Repower. La strategia cumpiglia er l'alienaziun da las pitschnas participaziuns a l'energia nucleara. Vi da quest plan n'è sa midà nagut. Ils detagls en chaussa èn fixads en la cunvegna confidenziala da transacziun ch'è vegnida concludida l'onn 2016 tranter ils acziunaris principals.

Tar la dumonda 7: Suenter l'augment dal chapital è la situaziun finanziala da la Repower stabila. La quota d'agen chapital cuntanscha – tenor las cifras publitgadas a chaschun da la clusiun da mez onn – la valur fitg solida da 47 pertschient. Ultra da quai ha la Repower ina liquiditad netta. Stentas per agids transitorics da vart dal chantun n'èn mai stadas e na stattan betg en discussiun.

Tar la dumonda 8: In contract d'obligaziuns per acziunaris exista tranter ils novs acziunaris principals, sco che quai era il cas pli baud. Las cunvegnas cuntegnidas en tal correspundan als mecanissems usitads tranter acziunaris gronds e na prevesan ni per ils acziunaris principals ni per la societad restricziuns nunusitadas.

19 d'october 2017