Navigation

Inhaltsbereich

Sessiun: 01.09.2017

En la sessiun d'avust 2017 dal cussegl grond è vegnida discutada en il rom da la revisiun totala da la lescha per promover la tgira da persunas malsaunas la dumonda, sch'ils servetschs psichiatrics dal Grischun (SPGR) duain furnir "en moda subsidiara" u da princip servetschs da la psichiatria d'uffants e da giuvenils.

Il cussegl grond è sa decidì da stritgar il pled "subsidiar" en l'art. 3 al. 1 da la lescha davart ils servetschs psichiatrics dal Grischun. Uschia pon ils SPGR metter a disposiziun da nov la medema purschida sco la psichiatria d'uffants e da giuvenils dal Grischun (PUG).

Tant la soluziun subsidiara da fin ussa sco er la nova soluziun cun dus purschiders (PUG resp. SPGR) u er in plazzament extrachantunal dals uffants e dals giuvenils n'èn betg optimals. Il scenari il mender pussaivel è ina concurrenza per uffants e giuvenils che han ils basegns correspundents. Quai maina a structuras parallelas, è ineffizient e vul dir la finala che betg ils basegns dals uffants e dals giuvenils pertutgads e lur provediment il meglier pussaivel cun servetschs da la psichiatria d'uffants e da giuvenils na stattan en il center.

Il fanadur 2014 ha dunna prof. dr. Susanne Walitza fatg in'expertisa per incumbensa da la regenza grischuna. En quella vegnan mussads ils scenaris pussaivels e las soluziuns ch'èn raschunaivlas per la psichiatria d'uffants e da giuvenils dal Grischun sco er lur avantatgs e dischavantatgs.

Las sutsegnadras ed ils sutsegnaders incumbenseschan perquai la regenza da reglar da nov – resguardond las recumandaziuns da l'expertisa Susanne Walitza – l'organisaziun da la psichiatria d'uffants e da giuvenils dal Grischun cun l'intent da proveder il meglier pussaivel ils pertutgads. L'autonomia per il sectur da la psichiatria d'uffants e da giuvenils ed il dretg dals uffants e dals giuvenils da survegnir in tractament ch'è adattà per lur vegliadetgna e ch'è professiunal (cun ina clera separaziun dals creschids e dals giuvenils e.a.p) ston esser garantids. I ston vegnir tratgas a niz sinergias pussaivlas en il sectur organisatoric ed administrativ, ma i sto vegnir mantegnida ina direcziun operativa independenta da vart dals medis, da la tgira e da la pedagogia. Er ston vegnir scleridas e regladas correspundentamain las dumondas dal program necessari da las localitads e da las basas legalas necessarias davart ils custs da gestiun e d'investiziun.

Cuira, il 1. da settember 2017

Locher Benguerel, Marti, Zanetti, Atanes, Baselgia-Brunner, Bucher-Brini, Cahenzli-Philipp, Casty, Casutt-Derungs, Cavegn, Caviezel (Cuira), Clalüna, Danuser, Darms-Landolt, Deplazes, Dermont, Gartmann-Albin, Hitz-Rusch, Jaag, Kunfermann, Märchy-Caduff, Monigatti, Niggli-Mathis (Grüsch), Noi-Togni, Papa, Perl, Peyer, Pfenninger, Pult, Thöny, von Ballmoos, Widmer-Spreiter, Föhn, Geisseler

Resposta da la regenza

En il rom da la revisiun totala da la lescha per promover la tgira da persunas malsaunas (LTM; DG 506.000) dals 30 d'avust 2017 ha il cussegl grond – sin dumonda da la regenza – stritgà or da la lescha la noziun "subsidiar" cun circumscriver l'incumbensa dals servetschs psichiatrics dal Grischun (SPGR) davart il provediment dals uffants e giuvenils en il chantun.

L'intent da la stritgada è quel d'intimar la psichiatria d'uffants e da giuvenils dal Grischun (PUG) ed ils SPGR da tschertgar cuminaivlamain soluziuns, co che la largia existenta en il provediment staziunar da giuvenils pudess vegnir eliminada. Temporarmain po il basegn da letgs staziunars però vegnir cuvrì cun inscriver la Clienia clinica privata Littenheid sin la glista dals ospitals dal chantun Grischun. Ord vista da la regenza po quai però mo esser ina soluziun transitorica. La finamira sto esser quella da pudair garantir il provediment psichiatric dals giuvenils dal chantun Grischun entaifer il chantun. Per realisar la staziun da giuvenils mancanta en il chantun èsi inevitabel d'approfundar la collavuraziun tranter ils dus furniturs da prestaziuns.

Cun elavurar in concept davart il provediment psichiatric per uffants e giuvenils en il chantun, che sto vegnir elavurà cuminaivlamain da la PUG e dals SPGR per quest intent, vegnan quels supplitgads da realisar las recumandaziuns da l'expertisa da prof. dr. Susanne Walitza. Per la regenza èsi incontestà en quest connex ch'igl è necessari d'avair ina clera separaziun locala dals creschids e dals giuvenils sco er ina direcziun independenta da vart dals medis, da la tgira e da la pedagogia per cuntanscher ina qualitad optimala da las structuras, dals process e dals resultats tar il tractament d'uffants e da giuvenils cun disturbis psichics. Il schef dal departament responsabel ha fatg resortir quai cleramain en la discussiun en la sessiun d'avust cun respunder votums correspundents.

In provediment il meglier pussaivel da la psichiatria d'uffants e da giuvenils en il senn da las recumandaziuns da l'expertisa "Walitza" sco er la finanziaziun da la staziun per giuvenils cun il program da las localitads necessarias che vegnan messas a disposiziun dals SPGR èn pussaivels tenor las basas legalas vertentas, sche la PUG ed ils SPGR collavuran ensemen. In basegn d'agir legislativ per quai n'è betg avant maun. La regenza ha, uschenavant che quai è inditgà, la pussaivladad e l'intenziun d'impedir en il rom da sias cumpetenzas structuras parallelas grazia a directivas correspundentas en sias finamiras da proprietad envers ils SPGR e da far prescripziuns als SPGR davart la concepziun da la collavuraziun cun la PUG.

L'incumbensa na cuntegna nagins aspects che n'èn betg gia enconuschents e prendids per mauns oz. La regenza propona perquai al cussegl grond da refusar l'incumbensa.

19 d'october 2017