Navigaziun principala

Cuntegn da la pagina

Dumonda Tomaschett (Breil) concernent "È il turissem en il Grischun digital avunda?"

Sessiun: 01.09.2017

Dapi l'onn 2014 tegna l'observatori vallesan dal turissem en egl il fenomen airbnb en Svizra. Plirs studis han mussà l'augment pli e pli impurtant dals objects e dals letgs sin la plattafurma dad airbnb en Svizra. Mez schaner 2017 eran registrads en Svizra 24 460 objects envers 6033 objects l'october 2014, quai che correspunda ad in augment da 305 %. Parallelamain è s'augmentà il dumber da letgs da 20 814 l'october 2014 sin 63 839 unitads mez schaner 2017.

Da tut ils chantuns svizzers è il Vallais il chantun che posseda ils pli blers objects e letgs dad airbnb. Cun 4014 objects e 17 876 letgs ha la purschida vallesana surpassà quella dals chantuns Turitg e Genevra. Da l'onn 2014 fin l'onn 2017 pon ins constatar en il chantun Vallais in augment da 471 % dal dumber d'objects.

En la medema perioda han er auters chatuns registrà in augment, dentant in bler pli pitschen. En il Grischun per exempel hai dà in augment da mo 79 %. Ch'il Grischun cun 7250 letgs è tuttina il chantun che po dumbrar il segund bler letgs dad airbnb suenter il Vallais, n'è betg surprendent. La differenza envers il Vallais è però frappanta.

Sco tut ils auters chantuns ha er il chantun Grischun natiralmain atgnas plattafurmas online regiunalas sur las organisaziuns turisticas. Plinavant exista la plattafurma online WarmesBett.ch ch'è vegnida fundada l'onn 2010 e che ha pudì generar l'onn 2016 gia 13 894 pernottaziuns. Talas stentas èn fitg ludaivlas e conferman la dumonda da pussaivladads da reservaziun online. Plattafurmas da reservaziun online cun fotografias dals objects èn ozendi indispensablas. Uschia stoi esser en l'interess da mintga chantun da pudair sa preschentar sin il martgà digital cun ina vasta paletta d'abitaziuns per giasts potenzials.

Il svilup global da la digitalisaziun cun paucas plattafurmas da reservaziun online activas sin il martgà global sco airbnb na dastga perquai betg vegnir emblidà. Che questas plattafurmas ans plaschan u betg, ellas correspundan a la dumonda creschenta. Questa tendenza vegn probablamain a sa sviluppar vinavant fitg svelt e las plattafurmas da reservaziun online vegnan pli e pli enconuschentas ed appreziadas en la populaziun.

Nus supplitgain pervia da quai la regenza da respunder las suandantas dumondas:

1. È er la regenza da l'avis che las plattafurmas da reservaziun online daventan adina pli impurtantas per noss chantun turistic e che d'ina gestiun activa da quellas resulta ina situaziun da win-win-win per las locaturas ed ils locaturs (pauca lavur e paucs custs), per il giast (vasta paletta da purschidas e tras quai purschidas pli attractivas) e per las destinaziuns (dapli giasts grazia ad ina buna relaziun tranter pretsch e prestaziun)?

2. È la regenza da l'opiniun che nossas destinaziuns turisticas èn activas avunda sin plattafurmas da reservaziun online enconuschentas ch'èn activas sin il martgà global sco airbnb?

3. Èn tenor la regenza las possessuras ed ils possessurs d'abitaziuns infurmads suffizientamain davart las plattafurmas da locaziun online simplas e favuraivlas dad oz ubain dovri qua in'offensiva d'infurmaziun?

Cuira, il 1. da settember 2017

Tomaschett (Breil), Engler, Grass, Albertin, Alig, Blumenthal, Bondolfi, Brandenburger, Caduff, Caluori, Casanova (Glion), Casty, Casutt-Derungs, Cavegn, Caviezel (Cuira), Crameri, Darms-Landolt, Davaz, Dosch, Epp, Fasani, Felix (Scuol), Florin-Caluori, Gunzinger, Hitz-Rusch, Holzinger-Loretz, Jeker, Kollegger, Kunfermann, Kunz (Fläsch), Lamprecht, Lorez-Meuli, Michael (Donat), Niggli-Mathis (Grüsch), Papa, Pedrini, Salis, Sax, Schneider, Stiffler (Tavau Plaz), von Ballmoos, Waidacher, Weber, Widmer-Spreiter, Wieland, Zanetti, Berther (Segnas), Cajacob, Gujan-Dönier, Natter, Schmid, Sigron, Wellig

Resposta da la regenza

La digitalisaziun dal commerzi da viadis global influenzescha fermamain l'economia da turissem. Er il turissem grischun è pertutgà dal fatg, che novas tecnologias e pussaivladads digitalas entran en il martgà e mettan en dumonda ils models da fatschenta tradiziunals. La digitalisaziun è ina schanza per il turissem grischun ed i vala da profitar dals avantatgs da la midada digitala per lung da tut la chadaina da valurisaziun.

Ina resposta cumplessiva sin la curta dumonda, sch'il turissem en il Grischun è digital avunda, cumpigliass cleramain dapli aspects che quai che las suandantas dumondas laschan sugerir. En sia resposta sa restrenscha la regenza sapientivamain sin las dumondas ch'èn vegnidas fatgas en connex cun plattafurmas da reservaziun online.

Tar la dumonda 1: En il turissem, sco er en blers auters secturs dal mintgadi privat e professiunal, èn infurmaziuns e pussaivladads d'interacziun digitalas ozendi standard. Latiers tutgan er plattafurmas da reservaziun e differentas applicaziuns mobilas che augmentan la simmetria d'infurmaziun tranter ils differents participants dal martgà e che faciliteschan pia la cumbinaziun da dumonda ed offerta. La regenza è pia er da l'avis che las plattafurmas da reservaziun online na daventan betg mo pli e pli impurtantas, mabain che quellas èn gia ina part essenziala da l'economia da turissem actuala e futura.

Tar la dumonda 2: Mintga destinaziun turistica decida cun tge purschiders – per exempel cun il center da servetsch electronic da Grischun vacanzas – e pia cun tge plattafurmas da reservaziun ch'ella collavura. Er per interpresas d'alloschament è la tscherna dal chanal da vendita ina decisiun strategica. Tgi che refusa il svilup en il sectur online, renunzia ad in chanal da distribuziun global.

Tar la dumonda 3: La regenza parta dal fatg che las possessuras ed ils possessurs d'abitaziuns che vulan dar en locaziun lur abitaziun sajan infurmads suffizientamain respectivamain ch'ellas ed els possian sa procurar en cas da basegn sezzas u sezs las infurmaziuns relevantas concernent las plattafurmas da reservaziun online. Perquai n'èsi betg necessari da lantschar ina vasta offensiva d'infurmaziun.

20 d'october 2017