Navigation

Inhaltsbereich

Dumonda Claus concernent daners dal NAF per infrastructuras da traffic multimodalas

Sessiun: 02.09.2017

Projects da traffic en citads ed en aglomeraziuns pon per il solit vegnir realisads mo cun il sustegn da la confederaziun. Cun il nov fond per las vias naziunalas ed il traffic d'aglomeraziun NAF è la cofinanziaziun tras la confederaziun segirada a lunga vista. La realisaziun ha lieu sco fin ussa sur ils programs d'aglomeraziun. Il proceder concret incl. criteris è prescrit fin ussa en la directiva da l'uffizi federal da svilup dal territori (ARE) concernent l'examinaziun e la cofinanziaziun dals programs d'aglomeraziun da la terza generaziun.

Ils programs d'aglomeraziun èn in instrument da planisaziun central e duain meglierar – sin plaun intercommunal, per part er interchantunal ed internaziunal – ils sistems da traffic da las aglomeraziuns e coordinar il svilup dal traffic e dals abitadis. Uschia duai vegnir garantida in'optimaziun dals sistems da traffic da las aglomeraziuns e lur coordinaziun cun il svilup dals abitadis. En il rom dals programs d'aglomeraziun vegnan sustegnidas – tenor il fegliet infurmativ davart il NAF «Rinforzament dal traffic d'aglomeraziun» dal departament federal per ambient, traffic, energia e communicaziun (DATEC) dals 12 da december 2016 (pagina 3) – er «plattafurmas multimodalas» ed uschia infrastructuras, nua che plirs meds da transport vegnan ensemen.

En quest connex supplitgain nus la regenza da respunder las suandantas dumondas:

1. Ha la regenza l'intenziun da dumandar da vart dal chantun daners federals correspundents or dals programs d'aglomeraziun (quarta generaziun, finanziaziun a partir da l'onn 2023) per realisar uschenumnadas plattafurmas da traffic multimodalas, en noss cas soluziuns per la viafier (Viafiers federalas / Viafier retica) e per la via?

2. Prevesa la regenza d'investir en general en la realisaziun da plattafurmas da traffic multimodalas cun resguardar il traffic «mez public» (autocars en il traffic occasiunal, bus interurbans, taxis, models da sharing) en il senn da la promoziun dal turissem ed a favur da la creaziun da valurs?

3. Èn gia avant maun concepts da finanziaziun per eventualas investiziuns correspundentas?

Cuira, ils 2 da settember 2017

Claus, Della Vedova, Casanova-Maron (Domat), Caviezel (Tavau Clavadel), Engler, Gunzinger, Heiz, Hitz-Rusch, Holzinger-Loretz, Jenny, Kunz (Cuira), Kuoni, Marti, Pfäffli, Steck-Rauch, Stiffler (Cuira), Troncana-Sauer, Waidacher, Wieland, Natter

Resposta da la regenza

Remartgas introductivas
Cun "plattafurmas multimodalas" èn manegiads puncts per midar tranter differents meds da traffic sco er tranter meds da traffic dal traffic public. Latiers tutgan pia purschidas da mobilitad sco park&ride, bike&ride, kiss&ride, stans da taxi, staziuns da bus sco er stabiliments per midar tranter bus e viafier. Talas purschidas èn realisadas oz gia en divers lieus en il chantun, ed ellas vegnan sviluppadas vinavant en cas ch'ils basegns sa midan. L'ulteriur svilup è primarmain ina incumbensa planisatorica dal chantun, da las regiuns e da las vischnancas che vegn prendida per mauns en enclegientscha cun gruppas d'interess e cun instituziuns pertutgadas spezialmain.

Tar la dumonda 1:
Per l'aglomeraziun da Cuira èn vegnids inoltrads fin ussa dus programs d'aglomeraziun (programs da l'emprima e da la segunda generaziun). Programs da la terza generaziun n'èn betg vegnids inoltrads, perquai che numerusas mesiras dals emprims dus programs n'eran betg anc realisadas sin plaun communal e perquai ch'ins veseva mo in potenzial limità per novas mesiras. Sin basa da quai na sa laschavan ils custs da planisaziun considerabels per sviluppar in terz program d'aglomeraziun betg giustifitgar. En vista als programs vegnints da la quarta generaziun duai vegnir examinà, sch'i duai – suenter l'interrupziun – danovamain vegnir elavurà in program d'aglomeraziun. En quest connex stoi cunzunt vegnir sclerì il suandant:
- Quant enavant vegnan a sa midar las pretensiuns da la confederaziun envers ils programs d'aglomeraziun pervia da la revisiun da la lescha davart la planisaziun dal territori (LPT 1)? La directiva correspundenta da la confederaziun vegn elavurada l'onn 2018.
- Quant grond è il potenzial per mesiras adattadas en l'aglomeraziun?
- Quant gronda è la prontezza da las regiuns e da las vischnancas da sa participar cun resursas finanzialas e persunalas a l'elavuraziun ed a la realisaziun d'in program? Sche la prontezza da las regiuns e da las vischnancas n'è betg avant maun, na fa in program d'aglomeraziun nagin senn, cunquai che las mesiras ston vegnir planisadas e purtadas da las vischnancas.
- Co s'organiseschan ins tranter las regiuns, las 16 vischnancas ed il chantun? A chaschun dals programs anteriurs n'era l'aglomeraziun betg anc repartida sin trais regiuns.

Sch'i vegniss decidì – sin basa da questa examinaziun – da sa participar puspè ad in program, vegnissan natiralmain er examinadas mesiras en connex cun plattafurmas da traffic multimodalas, ed eventualmain vegniss dumandada la confederaziun da sa participar a la finanziaziun.

Tar la dumonda 2:
Infrastructuras tar ils centers da midada dal traffic public vegnan sche necessari cofinanziadas sur la lescha da viafier en il rom da las pussaivladads legalas. Per il "traffic mez public" existan percunter mo pussaivladads da finanziaziun fitg limitadas da vart dal chantun. En il rom d'in program d'aglomeraziun pudessan dentant vegnir stgaffidas las premissas per pudair sustegnair cun daners federals per part er infrastructuras che servan al traffic mez public.

Tar la dumonda 3:
Ils concepts da finanziaziun ed ils preventivs correspundents dependan da las mesiras. Igl è l'incumbensa d'in eventual program d'aglomeraziun d'eruir questas mesiras.

20 d'october 2017