Navigation

Inhaltsbereich

Dumonda Peyer concernent las consequenzas da las midadas en l'artitgel 93 da la constituziun federala (iniziativa "No Billag")

Sessiun: 17.10.2017

Previsiblamain il mars 2018 vegni votà davart l'uschenumnada iniziativa "No Billag". Quella ha en mira pliras midadas en l'artitgel 93 da la constituziun federala, il qual furma la basa per la purschida da radio e televisiun publica en Svizra.
L'iniziativa vul scumandar da dastgar incassar sin plaun federal taxas da recepziun per radio e televisiun. Empè da quai duai la confederaziun vender concessiuns da radio e televisiun a l'ingiant. En spezial vegn stritgà l'art. 93 al. 2 Cst. ch'era formulà fin ussa sco suonda: "Il radio e la televisiun contribueschan a la furmaziun ed al svilup cultural, a la furmaziun libra da l'opiniun sco er al divertiment. Els resguardan las atgnadads dal pajais ed ils basegns dals chantuns. Els represchentan ils eveniments a moda correcta e reflecteschan adequatamain la diversitad da las opiniuns."

Las sutsegnadras ed ils sutsegnaders èn da l'avis che questa iniziativa ha differentas consequenzas rigurusas per il Grischun. Betg mo la purschida da radio e televisiun dad oz per las minoritads rumantschas e talianas fiss nunpussaivla da mantegnair. Pertutgads da l'iniziativa fissan natiralmain er ils emetturs da radio e televisiun da SRF che vegnan duvrads stediamain er en il Grischun, sco er Radio Südostschweiz e TV Südostschweiz. RSO e TSO survegnan mintga onn radund 6,7 milliuns francs da las entradas da taxas. Tar Radio Südostschweiz vegnan cuvrids stgars la mesadad, tar TV Südostschweiz quasi 70 pertschient dals custs tras las entradas da taxas. Radiotelevisiun Svizra Rumantscha survegn mintga onn circa 25 milliuns francs.

Per ils standards da qualitad, l'independenza publicistica e la diversitad d'opiniuns e da cultura che vegnan resguardads ozendi sco chaussas natiralas avess l'acceptaziun da l'iniziativa consequenzas negativas catastrofalas. Tras il scumond d'incassar taxas e tras la vendita a l'ingiant da concessiuns smanatscha ina commerzialisaziun cumplaina da la purschida da radio e televisiun, tant pli ch'i n'è betg pussaivel en la pitschna Svizra – cun ses quatter martgads parzials anc pli pitschens – da manar in center da medias electronicas che cuvra ils custs. Uschia ha er il cussegl federal constatà en ses rapport davart il servetsch public publitgà l'onn 2016, che mo gist 21,4 pertschient da la purschida dad SSR sin il martgà ha pudì vegnir refinanzià. Perfin ils formats da sport e da divertiment che han fitg grond success na pon betg vegnir producids en ina moda che cuvra approximativamain ils custs. La cuntrada da medias en il Grischun cun la purschida trilingua da la SSR publica, ma er dals purschiders privats che vegnan medemamain finanziads per gronda part tras taxas, vegniss modifitgada dal tuttafatg. En il sectur electronic resultassan champs nuncultivads. Ultra da quai na purtass l'iniziativa sut il stritg nagins respargns per las consumentas ed ils consuments, mabain in augment dals pretschs, damai ch'ellas ed els stuessan cumprar la purschida da radio e televisiun da purschiders privats cumplainamain commerzials che n'èn betg suttamess a princips democratics. In exempel: Tgi che vul mo guardar ils gieus da la liga naziunala tudestga en la televisiun pajada (pay-tv), paja dapli che quai che la taxa cumplaina da radio e televisiun custa en Svizra per mintga attatg.

Las sutsegnadras ed ils sutsegnaders han la ferma persvasiun ch'i fiss nunpussaivel da mantegnair sin basa privata e cun vender las concessiuns a l'ingiant ina purschida adequata er mo approximativa en las trais linguas chantunalas. En quest sectur dal servetsch public fiss il Grischun il chantun che perdess il bler.

Perquai dumondan las sutsegnadras ed ils sutsegnaders la regenza il suandant:

1. Co giuditgescha la regenza la valitaziun da las sutsegnadras e dals sutsegnaders areguard las consequenzas nuschaivlas da l'iniziativa per il Grischun?

2. Tge fa la regenza per sensibilisar la populaziun grischuna per questa tematica avant la proxima votaziun?

Cuira, ils 17 d'october 2017

Peyer, Darms-Landolt, Pfäffli, Albertin, Atanes, Baselgia-Brunner, Bondolfi, Bucher-Brini, Buchli-Mannhart, Burkhardt, Caduff, Cahenzli-Philipp, Caluori, Casty, Cavegn, Caviezel (Cuira), Caviezel (Tavau Clavadel), Clalüna, Della Vedova, Deplazes, Dermont, Dosch, Epp, Fasani, Foffa, Hardegger, Hartmann, Hitz-Rusch, Holzinger-Loretz, Jaag, Jeker, Kollegger, Kunfermann, Lamprecht, Lorez-Meuli, Michael (Donat), Michael (Castasegna), Monigatti, Niederer, Niggli-Mathis (Grüsch), Noi-Togni, Papa, Pedrini, Perl, Pfenninger, Pult, Salis, Schneider, Steck-Rauch, Stiffler (Tavau Plaz), Tenchio, Thomann-Frank, Thöny, Tomaschett (Breil), Tomaschett-Berther (Trun), Troncana-Sauer, von Ballmoos, Weidmann, Widmer-Spreiter, Zanetti, Berther (Segnas), Bonderer, Cajacob, Candrian, Degiacomi, Föhn, Padrun-Valentin, Pfister, Ruckstuhl

Resposta da la regenza

Tar la dumonda 1:
Rapports regiunals: Cun ils programs da la SSR en tut las trais linguas chantunalas (RTR, RSI, SRF) e cun quels da Radio Südostschweiz e da TV Südostschweiz dispona il Grischun oz d'ina purschida solida en il sectur da las medias electronicas. Uschia èn garantids rapports audiovisuals adequats e – sco premissa indispensabla per la furmaziun da l'opiniun democratica – ina diversitad da las funtaunas en il sectur dal schurnalissem d'infurmaziun sin plaun local, regiunal e chantunal. Gist per il Grischun cun sia diversitad linguistica, culturala, politica regiunala, ma er economica è ina cuntrada da medias intacta da fitg grond'impurtanza. Las medias duain accumpagnar, reflectar, ordinar e commentar las sfidas cuminaivlas. Sche la "iniziativa No Billag" vegniss acceptada, fissan ils rapports regiunals da radio e da televisiun eliminads entaifer curt temp praticamain dal tuttafatg en tut las trais regiuns linguisticas dal Grischun (RSO, TSO, Radio SRF 1, 2 Kultur, 3, 4, Musikwelle e.u.v., SRF 1, 2 ed Info a la televisiun, RSI Rete Uno, Rete Due, Rete Tre, La 1, La 2 sco er las emissiuns da Radio Rumantsch e da Televisiun Rumantscha). La pretensiun ch'ina purschida quantitativamain e qualitativamain sumeglianta sa laschia refinanziar al martgà, è absolutamain nunrealistica en chantuns muntagnards e rurals da la Svizra e cunzunt en il chantun triling Grischun. Da princip èn medias publicas ina pitga indispensabla ed a medem temp in'acquisiziun preziusa, ch'è vegnida sviluppada vinavant durant decennis, per ina democrazia cun instruments democratics directs bain sviluppads. Cun l'iniziativa vegnan eliminadas las medias publicas. La Svizra fiss uschia l'emprim e l'unic pajais en l'Europa democratica che scumandass a sasez da sustegnair uffizialmain medias publicas.

Cultura e lingua: L'infurmaziun da las medias publicas da la Svizra cumpiglia ultra da l'infurmaziun er secturs sco la furmaziun, l'integraziun, la promoziun da la coesiun sco er il divertiment. Ina rolla impurtanta gioga plinavant l'incumbensa en il sectur da la cultura. En la cuntrada mediala dal Grischun gida en spezial RTR dapi var 90 onns a mantegnair ed a promover la ritgezza culturala dal chantun. Mo gia ils 11 000 tocs da musica indigena che sa chattan en ils archivs dad RTR, che creschan ad in crescher, e ch'ins po tadlar regularmain, furman in vair stgazi da cultura grischuna. Grazia a la cunvegna da branscha "Pacte de l'audiovisuel" èsi pussaivel da coproducir mintga onn tschintg fin sis films cun la cinematografia indigena. Il cas spezial dad RTR ha ultra da quai ina dimensiun politica da linguas: Ultra da la scola è RTR in dals motors ils pli ferms da la lingua rumantscha. Cun purschidas per tut las gruppas da vegliadetgna, en spezial er per uffants, cun programs en tut ils idioms e da tuttas variantas, n'è RTR betg mo il center dal mintgadi da la Rumantschia, mabain er in actur impurtant en connex cun la promoziun da la chapientscha interrumantscha. Ultra da quai èn SRG, RSO e TSO lieus da scolaziun per in grond dumber da schurnalistas e schurnalists grischuns.

Percepziun dals temas grischuns en las ulteriuras parts da la Svizra: Grazia al schurnal regiunal da Radio SRF, al biro regiunal dad SRF-TV, al team da correspundentas e correspundents dad RSI a Cuira sco er dad RTR cun programs quotidians en spezial sin SRF vegnan temas grischuns adina puspè recepids en tut la Svizra. Pervia da la tecnologia da diffusiun digitala èsi plinavant er pussaivel da retschaiver Radio Südostschweiz e TV Südostschweiz en tut la Svizra.

Factur economic: Da las entradas da las taxas vegnan mintga onn var 32 milliuns francs en il Grischun. Da quels survegnan Radio e TV Südostschweiz (circa 63 plazzas da lavur) var 7 milliuns francs e las purschidas dad SRF, dad RSI e dad RTR (circa 180 plazzas da lavur) var 25 milliuns francs. Il service public medial da la SRG e dals emetturs concessiunads privats procura pia ch'ina part considerabla da las taxas va puspè enavos a l'economia svizra resp. grischuna. Er sche l'intent turistic na tutga betg directamain tar l'incarica da prestaziun dals emetturs concessiunads dal Grischun, profiteschan las destinaziuns turisticas dal Grischun sco er il mastergn adina puspè da l'effect collateral: Maletgs da noss chantun chattan regularmain la via sin ils visurs en tut la Svizra.

Tar la dumonda 2:
La regenza s'exprima davart projects naziunals mo, sch'il Grischun è spezialmain pertutgà u en il rom da decisiuns da conferenzas (CDEP, CDCGP e.u.v.). Pertutgà spezialmain è il Grischun questa giada senza dubi. La regenza constatescha ch'il Grischun, sco sulet chantun triling, è pertutgà en moda zunt particulara da la "iniziativa No Billag". Gia ils 7 da november 2017 ha la regenza perquai constatà explicitamain ed in corpore ch'ella recumonda da refusar la "iniziativa No Billag".

21 da december 2017