Navigation

Inhaltsbereich

Sessiun: 17.10.2017

Dapi l'aboliziun dal curs minimal da l'euro maina il turissem alpin in cumbat pli dir che mai cunter cundiziuns generalas betg midablas, quai che signifitga grondas sfidas per pudair operar cun success. Malgrà las purschidas ed ils products innovativs, malgrà servetschs d'auta qualitad e malgrà ina situaziun politica stabila è la purschida turistica en Svizra – cunzunt per giasts dal territori europeic – per in terz pli chara ch'en ils pajais da concurrenza vischins Austria, Germania, Italia e Frantscha.

La quintessenza da metter il focus da l'elavuraziun dal martgà pli fitg sin ils giasts svizzers e sin il martgà svizzer per cumpensar ils giasts mancants dal territori da la UE, funcziuna mo per part. Per l'ina sa sviluppa ina nova generaziun, per la quala i n'è betg pli usit da far sport d'enviern. Per l'autra è la repartiziun da las vacanzas da sport d'enviern svizras manglusa entaifer ils chantuns svizzers e n'è betg coordinada cun las premissas e cun ils potenzials dal turissem.

La fixaziun da las vacanzas da scola è chaussa dals singuls chantuns. Unicamain il concordat davart la coordinaziun da la scola da l'onn 1970 oblighescha ils chantuns da porscher almain 38 emnas da scola per onn e da cumenzar l'onn da scola tranter mez avust e mez october (art. 2). Per fixar las vacanzas da sport gioga il tschaiver ina rolla en intgins chantuns. Il Plan d'instrucziun 21 na fa naginas prescripziuns davart las vacanzas da scola. L'organisaziun da las vacanzas da scola è unicamain chaussa dals chantuns.

Tut tenor la constellaziun dals dis da Pasca sa repartan las vacanzas da sport d'enviern svizras dals singuls chantuns en il meglier cas sin 6 emnas il favrer ed il mars ed en il mender cas – sco quest onn – sin 4 emnas il favrer. Il curt interval da 4 emnas ha per consequenza che:

1. la dumonda concentrada surpassa las purschidas d'alloschament disponiblas e giasts svizzers potenzials reservan lur vacanzas da sport d'enviern en ils pajais vischins Austria, Frantscha u Italia.

2. la gastronomia da muntogna cuntanscha – cun las resursas disponiblas – en reguard qualitativ e quantitativ ils cunfins da sias capacitads.

3. las scolas per sport da naiv na pon garantir ni la qualitad d'instrucziun giavischada ni las capacitads d'instrucziun cun ils magisters scolads che stattan a disposiziun.

4. las pistas èn surchargiadas per exercitar il sport confurm a la funcziun ed èn pervia da quai isadas baud.

5. las reservaziuns anticipadas n'èn betg u strusch planisablas, perquai che las vacanzas da sport d'enviern sa midan d'in cuntin e sa cruschan.

Sche la repartiziun da las vacanzas da sport d'enviern vegn coordinada, èsi pussaivel da prolungar la stagiun d'enviern ed ella na dependa betg d'in pèr paucas fins d'emna da stagiun auta. Tras in'occupaziun pli guliva pon resultar pretschs pli favuraivels, e la cumpetitivitad dals lieus da sport d'enviern svizzers vegn uschia rinforzada.

Tenor rapports da medias han divers chantuns, la federaziun svizra dal turissem sco er la partida turistica svizra inoltrà mez da l'onn 2016 ina pretensiun correspundenta a la conferenza svizra dals directurs chantunals da l'educaziun publica (CDEP). Il Basilais Christoph Eymann, anteriur president da la CDEP, ha ina tenuta positiva envers l'idea da la branscha turistica.

Ina moziun correspundenta u ina intervenziun sin plaun federal n'è betg vegnida inoltrada fin ussa.

Las sutsegnadras ed ils sutsegnaders incumbenseschan la regenza da s'arranschar cun ils chantuns svizzers da sport d'enviern (Vallais, Vad, Berna, Sursilvania, Uri, Son Gagl, Tessin) e:

• d'entrar en tractativas cun la conferenza svizra dals directurs chantunals da l'educaziun publica (CDEP) cun la finamira da coordinar las vacanzas da sport d'enviern svizras ils mais da favrer e da mars repartì sin 6 emnas, e quai – sche pussaivel – independentamain da Pasca e dals dis da tschaiver.

Cuira, ils 17 d'october 2017

Tomaschett (Breil), Grass, Jaag, Albertin, Blumenthal, Buchli-Mannhart, Burkhardt, Caduff, Cahenzli-Philipp, Caluori, Casty, Casutt-Derungs, Cavegn, Clalüna, Crameri, Darms-Landolt, Dermont, Dosch, Engler, Epp, Fasani, Giacomelli, Gunzinger, Jeker, Jenny, Kunfermann, Kunz (Cuira), Lamprecht, Lorez-Meuli, Märchy-Caduff, Michael (Donat), Müller, Niederer, Noi-Togni, Papa, Paterlini, Sax, Schneider, Stiffler (Tavau Plaz), Thomann-Frank, Vetsch (Pragg-Jenaz), von Ballmoos, Waidacher, Zanetti, Berther (Segnas), Nicolay, Ruckstuhl

Resposta da la regenza

Per fixar las vacanzas da scola ed uschia er las vacanzas da sport d'enviern èn cumpetents ils chantuns e lur vischnancas. Entant che tut las vacanzas da scola han lieu en intgins chantuns dapertut il medem mument, divergeschan las datas da vacanzas en auters chantuns da vischnanca a vischnanca.

La conferenza svizra dals directurs chantunals da l'educaziun publica (CDEP) fa regularmain in'enquista davart las vacanzas da scola en ils chantuns e publitgescha las datas sin sia pagina d'internet. Tenor questas datas èn stadas resp. èn las vacanzas da sport d'enviern 2017–2019 en la gronda part dals chantuns tranter las emnas chalendaras 5 e 10. L'onn 2018 cumenzan las vacanzas da sport d'enviern per las scolaras ed ils scolars da Glaruna, Schaffusa e Turgovia per exempel en l'emna chalendara 5. En particularmain blers chantuns han las vacanzas da sport d'enviern lieu en l'emna chalendara 7. En il chantun Grischun ha ina gronda part da las scolaras e dals scolars vacanzas en l'emna chalendara 9. En l'emna chalendara 10 suondan lura las scolaras ed ils scolars d'Uri e dal Vallais Sura.

Qua tras resulta – sco descrit en l'incumbensa – l'utilisaziun suboptimala da las resursas resp. las surcapacitads e las sutcapacitads en il decurs da la stagiun da sport d'enviern. La regenza è pia medemamain da l'avis ch'i saja raschunaivel d'analisar la situaziun resp. ils basegns ensemen cun ils ulteriurs chantuns da sport d'enviern, cun l'intent da lura pudair far sche pussaivel ina intervenziun cuminaivla en la CDEP.

Sa basond sin questas consideraziuns propona la regenza al cussegl grond dad acceptar questa incumbensa.

10 da schaner 2018