Navigation

Inhaltsbereich

Incumbensa Della Vedova concernent ina candidatura dal Grischun sco lieu per realisar ils campiunadis mundials da mastergns (WorldSkills) 2023

Sessiun: 05.12.2017

Il sistem dual da la furmaziun professiunala è in factur da success decisiv per la Svizra sco lieu economic e vegn sustegnì e promovì cuminaivlamain da la confederaziun, dal chantun e da l'economia. Ils partenaris da la furmaziun professiunala sin plaun naziunal e chantunal fan dapi onns gronds sforzs per render pli enconuschenta la furmaziun professiunala e sias pussaivladads ad ina vasta publicitad. Ina pussaivladad en quest connex porschan ils campiunadis professiunals (SwissSkills, EuroSkills, WorldSkills) che rinforzan la furmaziun professiunala e la preschentan sco factur economic impurtant en la regiun, ma er sin plaun naziunal ed internaziunal.

La Svizra fa mintgamai fitg buns resultats a chaschun da quests campiunadis. Als campiunadis mundials da mastergns da quest onn ad Abu Dhabi ha la delegaziun svizra terminà uschè bain sco anc mai. L'equipa naziunala ha gudagnà gist 20 medaglias, da quellas 11 d'aur. Uschia ha la Svizra occupà il segund rang suenter la China. Ina medaglia d'aur è er ida en il chantun Grischun.

La fundaziun SwissSkills, la confederaziun ed il chantun Basilea-Citad han gì dacurt l'intenziun da candidar per la realisaziun dals campiunadis mundials da mastergns 2021 (WorldSkills) a Basilea. Suenter che la confederaziun è sa retratga, han las duas autras instituziuns concludì da desister d'inoltrar ina candidatura. Sin la pagina d'internet da la confederaziun, sut «Servetschs dal parlament», pon ins leger il suandant: «Pervia da la situaziun finanziala ha il cussegl federal decidì da betg metter a disposiziun ils meds finanzials da 30 milliuns francs per realisar ils campiunadis mundials da mastergns WorldSkills 2021 a Basilea, cumbain ch'ils daners èn previs en la missiva FPI. La cumissiun per scienza, educaziun e cultura dal cussegl naziunal n'ha betg pudì s'exprimer davart questa decisiun. Ina candidatura per ils WorldSkills 2021 n'è displaschaivlamain betg pli pussaivla. La Svizra pudess dentant candidar per la realisaziun dals WorldSkills 2023.»

Quests pleds dal cussegl federal porschan maun per ina nova candidatura. Sut quest aspect fai senn da far ponderaziuns en chaussa e d'examinar seriusamain questa nova candidatura per realisar in campiunadi mundial da mastergns «WorldSkills» en il Grischun. Cun questa occurrenza pudessan la Svizra en general ed il chantun Grischun en spezial sa preschentar ad in vast public en Svizra ed a l'exteriur sco center economic impurtant e sco lieu da furmaziun. Tut ils gremis impurtants (secretariat da stadi per furmaziun, retschertga ed innovaziun SEFRI, SwissSkills) ch'èn responsabels per questa procedura da candidatura sin plaun internaziunal, èn s'engaschads gia a chaschun da l'emprima candidatura e s'engaschan tschert er a chaschun d'ina nova candidatura.

Als ultims «WorldSkills» 2017 ad Abu Dhabi èn sa participads 1300 mastergnantas e mastergnants. Passa 100 000 visitadras e visitaders han – durant in'emna – persequità al lieu las concurrenzas en passa 51 professiuns. Il chantun Grischun è versà d'organisar occurrenzas grondas cun attracziun internaziunala. La realisaziun dal campiunadi mundial da mastergns «WorldSkills» 2023 pussibilitass tranter auter d'augmentar la valur dal concept dals alloschis temporars e modulars ch'era vegnì sviluppà gia per la candidatura per ils gieus olimpics 2022.

La regenza vegn incumbensada d'examinar ina candidatura individuala per ils campiunadis mundials da mastergns «WorldSkills» 2023 u pli tard. Sco alternativa en segunda prioritad po vegnir considerada er ina candidatura en collavuraziun cun il chantun Son Gagl e cun il principadi da Liechtenstein.

Cuira, ils 5 da december 2017

Della Vedova, Felix (Haldenstein), Heiz, Albertin, Alig, Atanes, Baselgia-Brunner, Berther (Mustér), Blumenthal, Bondolfi, Brandenburger, Bucher-Brini, Buchli-Mannhart, Burkhardt, Caduff, Cahenzli-Philipp, Caluori, Casanova (Glion), Casanova-Maron (Domat), Casty, Casutt-Derungs, Cavegn, Caviezel (Cuira), Caviezel (Tavau Clavadel), Clalüna, Clavadetscher, Danuser, Darms-Landolt, Deplazes, Dermont, Dosch, Engler (Tavau Vitg), Epp, Fasani, Florin-Caluori, Foffa, Geisseler, Giacomelli, Grass, Gunzinger, Hardegger, Hitz-Rusch, Holzinger-Loretz, Jaag, Jeker, Jenny, Joos, Kasper, Koch (Igis), Kollegger, Kunfermann, Kunz (Fläsch), Kunz (Cuira), Lamprecht, Locher Benguerel, Mani-Heldstab, Märchy-Caduff, Marti, Michael (Donat), Michael (Castasegna), Monigatti, Nay, Niederer, Niggli (Samedan), Noi-Togni, Papa, Paterlini, Perl, Peyer, Pfäffli, Pfenninger, Pult, Salis, Sax, Schneider, Schutz, Steck-Rauch, Steiger, Stiffler (Tavau Plaz), Tenchio, Thomann-Frank, Thöny, Tomaschett (Breil), Tomaschett-Berther (Trun), Troncana-Sauer, Valär, Vetsch (Claustra Vitg), Vetsch (Pragg-Jenaz), von Ballmoos, Waidacher, Weber, Weidmann, Widmer-Spreiter, Wieland, Zanetti, Berther (Segnas), Engler (Surava), Grünenfelder Hunger, Pfister, Wellig

Resposta da la regenza

Ils WorldSkills vegnan organisads mintga dus onns mintgamai en in auter lieu da concurrenza. Dapi l'emprima realisaziun da questa concurrenza professiunala l'onn 1953 è la Svizra sa participada senza interrupziun cun in team. Dal 1997 fin il 2017 è noss pajais mintgamai stà represchentà cun 33 fin 40 persunas giuvnas da professiun da fin a 22 onns. Ils onns 1997 e 2003 han ils WorldSkills gì lieu a Son Gagl. Las cifras èn sa sviluppadas sco suonda:
-
Tenor ses conclus dals 17 da schaner 2017 e tenor sia proposta al cussegl grond ha la regenza dal chantun Basilea-Citad quintà cun custs da 900 000 francs per la fasa da candidatura per in'eventuala organisaziun dals WorldSkills 2021 a Basilea-Citad. Quests custs fissan previsiblamain vegnids repartids mintgamai per la mesadad sin il chantun e sin il secretariat da stadi per furmaziun, retschertga ed innovaziun (SEFRI). Per realisar ils WorldSkills 2021 èn vegnids stimads custs dad 89 milliuns francs. Ina gronda part da questa summa avess pertutgà l'infrastructura necessaria per ils singuls champs professiunals (maschinas, iseglia e.u.v.) e fiss vegnida surpigliada da las federaziuns. Emprimas stimaziuns approximativas faschevan quint cun custs da realisaziun da 30 fin 35 milliuns francs per il maun public respectivamain d'ina contribuziun da bunamain 10 milliuns francs per Basilea-Citad. Il Cussegl federal ha decidì da betg metter a disposiziun ils meds finanzials da 30 milliuns francs.

Las cifras da Basilea-Citad pon vegnir consideradas sco valurs directivas. Tenor las indicaziuns da SwissSkills ha Basilea-Citad quintà – per la candidatura 2021 – cun ina surfatscha cuverta da 140 000 m² e cun ina surfatscha al liber da 15 000 m². Per il program da conferenza accumpagnant da WorldSkills International era previs supplementarmain il center da congress da Basilea.

La cumissiun per scienza, educaziun e cultura (CSEC) dal cussegl naziunal è s'exprimida il november 2017 praticamain unanimamain a favur da la moziun 17.3975 "Organisaziun dals WorldSkills en Svizra". Quella incumbensescha il cussegl federal d'elavurar ina candidatura per realisar ils campiunadis mundials da mastergns 2023 (WorldSkills). Sche las duas chombras ed il cussegl federal avessan da sustegnair la moziun, fissi chaussa da la fundaziun SwissSkills da prender per mauns ina candidatura correspundenta sin plaun internaziunal. Per l'onn 2023 ha gia il chantun Basilea-Citad demussà ses interess.

Ord vista da la regenza pudessan WorldSkills svegliar impuls positivs en l'entir chantun sco er rinforzar la furmaziun professiunala en il Grischun, en Svizra ed er ordaifer ils cunfins svizzers. Sche la concurrenza vegniss organisada en auta qualitad sco er en moda persistenta ed innovativa, fissi pussaivel da cuntanscher in posiziunament positiv ed in rinforzament da la reputaziun internaziunala da la Svizra e dal Grischun sco ospitant e sco organisatur e da rinforzar la cumpetitivitad economica e turistica dal Grischun. Er en vista a la midada demografica pudess ins quintar cun effects positivs per la furmaziun professiunala en il chantun grazia a l'organisaziun dals WorldSkills.

Ina candidatura individuala dal Grischun per ils campiunadis mundials da mastergns WorldSkills 2023 u pli tard ubain – sco alternativa – ina candidatura en collavuraziun cun il chantun Son Gagl e/u cun il principadi da Liechtenstein para perquai degna da vegnir examinada. En quest connex duain l'emprim vegnir examinadas las cundiziuns per ina candidatura (finanziaziun, realisabladad e lieus pussaivels).

Sa basond sin questas consideraziuns propona la regenza al cussegl grond dad acceptar questa incumbensa.

16 da favrer 2018