Cun l'instrument da la facilitaziun fiscala po la regenza augmentar l'attractivitad dal chantun sco lieu per interpresas novas u per interpresas existentas che midan essenzialmain lur activitad manaschiala. La finamira è quella da promover investiziuns e la creaziun da plazzas da lavur cun reducir la chargia fiscala, per animar a lunga vista il Grischun sco lieu economic. La facilitaziun fiscala signifitga en quest connex ina renunzia ad entradas che po vegnir resguardada sco investiziun en ina interpresa nova ed en plazzas da lavur. La facilitaziun fiscala è in instrument simpel ed efficazi che chaschuna mo lura entradas pli pitschnas, sche l'interpresa favurisada ha success e cuntanscha in gudogn. Sche quai n'è betg il cas, consista la ristga per il chantun mo d'ina renunzia a la taglia sin il chapital; taglias sin il gudogn na resultan en quests cas tuttavia naginas.

Las dumondas concretas pon vegnir respundidas sco suonda.

Tar la dumonda 1: L'autezza da las facilitaziuns fiscalas concedidas resp. las entradas pli pitschnas correspundentas dependan dals gudogns che las interpresas realiseschan durant l'onn fiscal. Perquai pon ellas vegnir eruidas mo per onns fiscals passads ch'èn gia vegnids taxads cun vigur legala. Per quest motiv vegnan preschentads qua ils facturs fiscals e las summas fiscalas, a las qualas il Grischun ha renunzià l'onn fiscal 2015 pervia da la facilitaziun fiscala:

Tar la dumonda 2: Per motivs dal secret fiscal (art. 122 da la lescha da taglia) na po la repartiziun regiunala da las facilitaziuns fiscalas betg vegnir rendida enconuschenta. En differents cas permettessan las indicaziuns da trair conclusiuns da tge interpresa concreta ch'i sa tracta.

Tar la dumonda 3: En il potenzial da resursas vegnan registrads mo il gudogn ed il chapital che vegnan taxads effectivamain. I na po betg vegnir ditg quant aut ch'ils facturs fiscals correspundents fissan senza ina facilitaziun fiscala, perquai ch'igl è avert, sche l'interpresa fiss insumma sa decidida per il Grischun sco domicil e sch'ils gudogns correspundents fissan insumma vegnids realisads en il Grischun. Sche la facilitaziun fiscala influenzescha las domiciliaziuns d'interpresas, na po la dumonda da ses effects sin la gulivaziun da las resursas betg vegnir respundida.
Sche l'opiniun avess da dominar che la facilitaziun fiscala n'haja nagina influenza sin la domiciliaziun d'interpresas – quai che na correspunda ni a l'opiniun da la regenza ni a la realitad economica – stuess l'art. 5 (facilitaziun fiscala) vegnir stritgà or da la lescha da taglia, perquai ch'el generass – or da questa optica – mo entradas pli pitschnas.

7 da favrer 2018