Navigaziun principala

Cuntegn da la pagina

Dumonda Tenchio concernent la posiziun giuridica da «gruppas da gieu» che tgiran uffants en il chantun Grischun

sessiun: 06.12.2017

Purschidas da la tgira d'uffants cumplementara a la famiglia èn suttamessas ozendi ad in grond dumber da prescripziuns legalas, en spezial areguard la qualitad da la tgira d'uffants (en emprima lingia pretensiuns envers la scolaziun dal persunal engaschà), per vegnir renconuschidas dal chantun, per survegnir contribuziuns correspundentas e per insumma pudair vegnir manadas cun ina permissiun.

Cunzunt a Cuira e conturns, ma er en l'ulteriur territori dal chantun Grischun, porschan actualmain bleras persunas/instituziuns durant l'avantmezdi ed il suentermezdi (mintgatant incl. maisa da mezdi) servetschs da tgira per uffants che na van anc betg a scola per pretschs fixs sut il titel «gruppa da gieu», senza che quellas stuessan observar pretensiuns dal chantun concernent la qualitad da la tgira d'uffants u senza ch'ellas fissan suttamessas a la surveglianza dal chantun. Da quests purschiders na vegni er betg pretendì d'annunziar talas purschidas u da dumandar ina permissiun per quellas. Las «gruppas da gieu» na vegnan betg mo duvradas – sco pli baud savens – per paucas uras, mabain permettan er mintgatant als geniturs dad ir a lavurar. Tenor l'art. 14 al. 1 da la lescha chantunala davart ils uffants confidads dovri ina permissiun tranter auter er per recepir uffants e giuvenils, sch'i vegnan purschidas quatter u dapli plazzas per educar u per tgirar persunas minorennas durant il di.

Sulettamain la circumstanza ch'i na vegn mintgatant betg purschida ina maisa da mezdi, na po betg esser il criteri decisiv per betg suttametter la purschida a l'obligaziun da dumandar ina permissiun, er perquai ch'ils uffants vegnan tgirads mintgatant durant l'entir avantmezdi e suentermezdi, pia che questa circumstanza per il bainstar da l'uffant pretenda che las purschidas extendidas – cuntrari a pli baud – duain correspunder a pretensiuns minimalas envers la qualitad da la tgira d'uffants.

Las sutsegnadras ed ils sutsegnaders tschentan las suandantas dumondas en connex cun las «gruppas da gieu» menziunadas:

a) Èsi correct che las purschidas da «gruppas da gieu» odiernas na ston betg vegnir annunziadas, na dovran nagina permissiun e n'èn betg suttamessas ad ina surveglianza chantunala?
Sche gea, pertge?

b) È la regenza pronta da procurar ch'i vegnia statuì en l'avegnir in'obligaziun da dumandar ina permissiun per «gruppas da gieu» cun ina purschida da tgira extendida, per ch'i valian tschertas pretensiuns da qualitad e disposiziuns da surveglianza er per quellas?
Sche gea, co e fin cura?

Cuira, ils 6 da december 2017

Tenchio, Waidacher, Locher Benguerel, Atanes, Bondolfi, Bucher-Brini, Cahenzli-Philipp, Caluori, Casty, Caviezel (Cuira), Della Vedova, Engler (Tavau Vitg), Epp, Fasani, Hitz-Rusch, Holzinger-Loretz, Jaag, Kunfermann, Märchy-Caduff, Monigatti, Noi-Togni, Papa, Perl, Peyer, Pult, Steiger, Stiffler (Cuira), Tomaschett-Berther (Trun), Troncana-Sauer, Widmer-Spreiter, Berther (Segnas), Pfister

Resposta da la regenza

Uffants e giuvenils dovran ina protecziun speziala e ston vegnir promovids en lur svilup ad umans independents e socialmain responsabels. La finamira da las purschidas per famiglias, per uffants e per giuvenils è quella da garantir la protecziun, il bainesser e l'integraziun sociala dals uffants e dals giuvenils. Las purschidas sustegnan las famiglias, ils uffants ed ils giuvenils, independentamain da la schlattaina, da la derivanza sociala, da l'appartegnientscha u d'impediments. En ina canorta d'uffants sco purschida da la tgira d'uffants cumplementara a la famiglia vegnan ils uffants da la vegliadetgna prescolara e scolara tgirads regularmain. Las purschidas promovan l'integraziun sociala e linguistica sco er il svilup dals uffants en la gruppa. L'assistenza po esser dividida en unitads d'in mez u d'in entir di. L'assistenza sustegna la cumpatibilitad da la professiun cun la famiglia. En ina gruppa da gieu han ils uffants tranter 3 onns e la vegliadetgna da scolina la pussaivladad d'emprender a far gieus, per regla durant paucas uras per emna. Las abilitads socialas dals uffants vegnan promovidas ed els emprendan a s'orientar en ina gruppa. La gruppa da gieu n'è betg primarmain fatga per la tgira d'uffants cumplementara a la famiglia.

L'art. 13 al. 1 lit. b da l'ordinaziun davart il plazzament d'uffants per la tgira e l'adopziun (OPUA; CS 211.222.338) fixescha ch'i dovra ina permissiun per manar ina instituziun, sche plirs uffants sut 12 onns vegnan recepids regularmain per l'assistenza durant il di (canortas d'uffants e chaussas sumegliantas). En l'art. 14 al. 1 lit. b da la lescha davart ils uffants confidads (DG 219.050) ha il chantun Grischun precisà ils criteris per l'obligaziun da dumandar ina permissiun. Per recepir uffants e giuvenils dovri ina permissiun, sch'i vegnan assistids durant il di u durant la notg il medem mument quatter u dapli uffants da la vegliadetgna prescolara u da la vegliadetgna da scola. Tenor l'art 14 al. 2 da la lescha davart ils uffants confidads èn servetschs che guardan d'uffants en instituziuns da vacanzas e da temp liber, en gronds negozis ed en centers da cumpra exceptads da l'obligaziun da dumandar ina permissiun.

Las purschidas per l'assistenza regulara d'uffants durant il di èn ozendi fitg multifaras. Ellas cumpiglian ultra da l'assistenza tras geniturs da di er centers dal di per uffants, canortas, maisas da mezdi, gruppas da gieu e servetschs che guardan d'uffants. En la lescha n'èsi betg vegnì fixà, tge furmas da purschidas da la tgira en chasas da dimora che ston vegnir suttamessas a l'obligaziun. Per la dumonda, sche l'obligaziun da dumandar ina permissiun vala per ina purschida da la tgira en ina chasa da dimora, èn decisivs la purschida sco tala, il dumber d'uffants esters che vegnan assistids il medem mument, la durada da la purschida d'assistenza (uras per emna) sco er la regularitad da l'assistenza. La designaziun da la purschida n'è qua betg relevanta.

Purschidas sco gruppas da gieu èn purschidas nunbirocraticas che vegnan savens installadas e manadas en moda autonoma. Questas purschidas n'èn per regla betg primarmain destinadas a la tgira d'uffants sco tala, mabain plitgunsch a la socialisaziun prescolara dals uffants. La purschida è savens limitada a paucas uras per emna. Tenor la pratica da blers onns, che vegn er applitgada en la gronda part dals chantuns, na tutgan questas purschidas betg sut l'art. 13 al. 1 lit. b OPUA resp. sut l'art. 14 da la lescha davart ils uffants confidads e na dovran perquai betg ina permissiun. Quai na vala dentant betg, sch'ina gruppa da gieu metta a disposiziun la medema purschida sco ina canorta d'uffants; en quest cas stuess la purschida vegnir qualifitgada sco tala.

Tar la dumonda a: Las gruppas da gieu n'han per regla betg la medema purschida sco las canortas d'uffants e na pon da princip betg vegnir consideradas sco purschidas da la tgira d'uffants cumplementara a la famiglia. Ultra da quai vegnan las purschidas – en cas da gruppas da gieu – messas a disposiziun ed utilisadas durant in temp cleramain limità, per regla durant paucas uras. Ellas n'èn perquai betg suttamessas a l'obligaziun da dumandar ina permissiun tenor la OPUA resp. tenor la lescha davart ils uffants confidads. Sche la purschida da la gruppa da gieu è dentant pli extendida e cumparegliabla cun quella d'ina canorta d'uffants, exista – independentamain da la designaziun – l'obligaziun da dumandar ina permissiun.

Tar la dumonda b: La regenza è pronta d'examinar ils proxims 2 onns – en concordanza cun la OPUA e cun la lescha davart ils uffants confidads – ils criteris che valan per l'obligaziun da dumandar ina permissiun.

14 da mars 2018