Cuntegn da la pagina

Dumonda da la fracziun da la PS concernent la restricziun dals dretgs fundamentals durant il WEF 2018

sessiun: 12.02.2018

Demonstraziuns paschaivlas tutgan tar ina democrazia. Ellas èn in med per exprimer libramain l'opiniun ed uschia in dretg fundamental. Demonstraziuns tutgan er tar la scuntrada annuala dal WEF a Tavau. Gist là, nua che la populaziun è exclusa da las discussiuns en il center da congress, dovri la pussaivladad per exprimer libramain l'opiniun sin via. Suenter il WEF da quest onn èn vegnidas tschentadas las suandantas dumondas en las medias: "Nua è restada la libertad d'exprimer sia opiniun a Tavau?". Tut en tut tschintg demonstraziuns n'èn betg vegnidas permessas. Mo singulas acziuns èn vegnidas permessas e quai sut cundiziuns abstrusas. In'acziun cunter la politica da Donald Trump ha per exempel dastgà consister mo da tschintg persunas che stuevan adina avair ina distanza da 100 meters ina da l'autra.

In'ulteriura da questas acziuns da protesta legalas è vegnida impedida tras intervenziuns da la polizia. Socialistas giuvnas e socialists giuvens che han organisà ina protesta d'ina singula persuna cun livestream, perquai che la demonstraziun cunter Donald Trump n'era betg vegnida permessa, èn vegnids arrestads da la polizia chantunala senza motivs vesaivels. Ed er in schurnalist da la NZZ, che n'ha betg vulì stizzar sias registraziuns fatgas cun ina camera, è – tenor rapports en las medias – vegnì arrestà cun far sia lavur.

Sco motiv per la decisiun da betg permetter la demonstraziun a Tavau ha la vischnanca da Tavau fatg valair la gronda quantitad da naiv. Ma quai na declera betg las cundiziuns e las arrestaziuns menziunadas qua survart. Ultra da quai è la plazza da demonstraziun prendida en mira stada deliberada da la naiv il di che la demonstraziun fiss stada planisada. La previsiun da l'aura dal glindesdi aveva preditg quai. L'impressiun n'ha betg pudì vegnir eliminada che la vischnanca da Tavau saja vegnida messa sut squitsch tar sia decisiun (p.ex. en connex cun las tractativas currentas concernent ina prolungaziun dal contract).

Dretgs fundamentals ston vegnir concedids. Ni il squitsch dal WEF ni d'in auter stadi naziunal n'èn legitimads da restrenscher en il Grischun la libertad d'exprimer sia opiniun. En quest senn drizzan las sutsegnadras ed ils sutsegnaders las suandantas dumondas a la regenza:

1. Hai dà da vart dal chantun objecziuns che pledavan cunter la realisaziun da las demonstraziuns betg permessas? Sche gea, tgeninas?

2. Co giuditgescha la regenza la refusa rigurusa (e sia motivaziun) da pliras dumondas per demonstraziuns paschaivlas e libras da violenza a l'ur da la scuntrada annuala 2018 dal World Economic Forums?

3. Enconuscha la regenza auters motivs che quels da la gronda quantitad da naiv che han pledà cunter la concessiun da la permissiun? Sche gea, tgenins?

4. Quantas arrestaziuns èn vegnidas registradas durant il WEF, che n'avevan la finala nagin causal penal sco basa?

5. Tge tenuta ha la regenza envers las arrestaziuns intransparentas, per exempel dal schurnalist da la NZZ e da la giuventetgna socialista da la Svizra?

Cuira, ils 12 da favrer 2018

Caviezel (Cuira), Locher Benguerel, Atanes, Baselgia-Brunner, Bucher-Brini, Cahenzli-Philipp, Jaag, Monigatti, Noi-Togni, Perl, Peyer, Pfenninger, Pult, Thöny

Resposta da la regenza

Per la regenza ha il dretg fundamental d'exprimer libramain l'opiniun ina impurtanza centrala. Fin ussa ed er al WEF da quest onn è ella s'engaschada che demonstraziuns a Tavau pon vegnir realisadas en il rom dal pussaivel e vegnan permessas. Las dumondas vegnan respundidas sco suonda:

Tar la dumonda 1: La giunta dal WEF da la regenza aveva s'exprimida davart la dumonda da demonstraziun da la PS/giuventetgna socialista en quel senn che la permissiun per la demonstraziun planisada sin la plazza possia – en reguard a la situaziun da quellas uras – vegnir concedida ord vista da la polizia da segirezza.

Tar la dumonda 2: La giunta dal WEF da la regenza aveva communitgà sia posiziun ord vista da la polizia da segirezza. La cumpetenza da giuditgar dumondas da demonstraziun resguardond tut las circumstanzas decisivas è chaussa da la vischnanca. Cun in recurs a la dretgira administrativa pon decisiuns da la vischnanca vegnir suttamessas ad in'examinaziun giudiziala. I n'è pia betg chaussa da la regenza da giuditgar la decisiun da la vischnanca, essend ch'il chantun aveva prendì posiziun mo davart in aspect parzial. Dal rest avevan las relaziuns localas (quantitad da naiv, pussaivladads da rumir la naiv, traffic e.u.v.) che stuevan vegnir giuditgadas da l'autoritad locala, q.v.d. dal cussegl pitschen, giugà ina rolla decisiva en il cas qua avant maun.

Tar la dumonda 3: Il chantun aveva, sco gia menziunà, communitgà a la vischnanca sia posiziun ord vista da la polizia da segirezza. La regenza na po betg commentar il process da giuditgar la situaziun e da decider da la vischnanca.

Tar la dumonda 4: Durant la dieta annuala 2018 dal WEF n'hai dà naginas arrestaziuns. Pliras persunas èn però vegnidas manadas al post da polizia da Tavau per verifitgar l'identitad. Tenor la lescha da polizia dal chantun Grischun sa tracti en quests cas da fermanzas.

Tar la dumonda 5: Las commembras ed ils commembers da la giuventetgna socialista da la Svizra avevan sa participads ad ina demonstraziun betg permessa ed eran s'avischinads a la zona da segirezza. Tenor las ordinaziuns da la polizia ch'èn vegnidas communitgadas publicamain ils 6 da december 2017 era l'entrada en la zona da segirezza reservada a persunas autorisadas. Persunas ch'emprovan d'entrar illegalmain en la zona da segirezza u che sa trategnan en tala senza autorisaziun, vegnan per regla fermadas, per che ulteriuras mesiras polizialas possian vegnir examinadas. Correspundentamain avevan las forzas d'acziun il cumond da manar persunas che emprovan d'entrar illegalmain en la zona da segirezza u che sa trategnan en tala al post da polizia da Tavau. Quest cumond avevan exequì las forzas da segirezza.

Pervia da problems da communicaziun e pervia da circumstanzas disfortunadas è il schurnalist da la NZZ daventà part da questa fermanza. En la retrospectiva e cun l'enconuschientscha da las circumstanzas concretas avessan ils scleriments ch'èn stads necessaris en quel connex pudì vegnir fatgs en moda pli simpla.

2 da matg 2018