Cuntegn da la pagina

Dumonda Troncana-Sauer concernent la realisaziun da l'incumbensa concernent emprests da daners NPR; garanzias communalas

sessiun: 13.02.2018

L'october 2016 è vegnida acceptada – cunter la voluntad da la regenza – l'incumbensa concernent la garanzia communala per emprests da daners NPR cun 72 cunter 16 vuschs e 20 abstenziuns. A chaschun da la debatta dals 19 d'october 2016 ha signur cusseglier guvernativ Parolini rendì attent che la tenuta da valurs da fonds per il svilup regiunal a lunga vista è francada en la lescha federala davart la politica regiunala. Ultra da quai ha el argumentà ch'il chantun stoppia integrar en la bilantscha la segunda mesadad da l'emprest federal sco obligaziun eventuala, sche l'incumbensa vegniss acceptada. Quai vul pia dir ch'il chantun Grischun vul distgargiar la confederaziun da mintga ristga per quests emprests NPR.

Las sutsegnadras ed ils sutsegnaders dumondan perquai:

1. Tge mesiras/midadas da lescha èn necessarias da vart dal chantun, per che questa incumbensa possia vegnir realisada?

2. Datti contracts cun la confederaziun che stuessan vegnir midads en cas d'ina realisaziun?

3. Quantas garanzias communalas existentas (dumber e summa totala) stuessan vegnir adattadas tras il chantun?

4. Cura ha la regenza l'intenziun da realisar l'incumbensa?

5. Pertge vul il chantun distgargiar la confederaziun da mintga ristga per quests emprests, schebain ch'er la confederaziun è – tenor la lescha federala – pronta da surpigliar 50 % da la ristga per ses emprest?

Cuira, ils 13 da favrer 2018

Troncana-Sauer, Sax, Albertin, Brandenburger, Burkhardt, Caduff, Caluori, Casanova-Maron (Domat), Casutt-Derungs, Cavegn, Caviezel (Tavau Clavadel), Claus, Clavadetscher, Crameri, Davaz, Della Vedova, Dosch, Fasani, Felix (Scuol), Gunzinger, Hartmann, Heiz, Hitz-Rusch, Holzinger-Loretz, Jenny, Kunz (Cuira), Kuoni, Marti, Michael (Castasegna), Nay, Niederer, Niggli (Samedan), Paterlini, Pfäffli, Salis, Schutz, Steck-Rauch, Stiffler (Cuira), Tenchio, Thomann-Frank, Tomaschett-Berther (Trun), Valär, Vetsch (Pragg-Jenaz), Weidmann, Wieland, Berther (Segnas)

Resposta da la regenza

En correspundenza cun las directivas da la lescha federala davart la politica regiunala (CS 901.0) vegnan ils chantuns intimads dapi onns da la confederaziun da realisar ina pratica da promoziun consequenta e da pretender garanzias en valurs mintgamai per l'entir emprest federal. Perquai che la concessiun d'emprests ad interpresas da teleferica cuntegna ina ristga da perdita pli gronda che per exempel tala ad infrastructuras turisticas u industrialas e perquai ch'igl è per interpresas da teleferica pli difficil da porscher garanzias en valurs, han ils chantuns stuì preschentar al SECO ina strategia da teleferica per survegnir – en il rom da la cunvegna da program – er meds finanzials federals per conceder emprests da daners NPR. Pervia da quai vegnan pretendidas en il chantun Grischun garanzias communalas per mintgamai l'entir import d'emprest sco premissa per conceder emprests da daners NPR ad interpresas da teleferica. Questas garanzias èn obligaziuns eventualas che sa reduceschan mintga onn al stadi effectiv da l'emprest.

Tenor la lescha federala sto il chantun – ultra dals meds finanzials federals – furnir ina prestaziun equivalenta. En il chantun Grischun consista quella d'ina contribuziun à fonds perdu. Pia èn ils emprests concedids en il Grischun unicamain emprests federals (e betg er chantunals). Sch'in emprest na vegn betg restituì e sch'i resulta er suenter l'utilisaziun da las garanzias nunspetgadamain ina perdita, sto la mesadad da quella vegnir surpigliada dal chantun. L'incumbensa Troncana-Sauer da l'october 2016 concernent la garanzia communala per emprests da daners NPR pretenda da limitar la garanzia communala a 50 % da l'import d'emprest e da duvrar quella unilateralmain a favur dal chantun. Quai n'è però betg pussaivel, perquai che la garanzia communala vegn dada sco garanzia per in emprest federal (e betg per garantir la contribuziun chantunala). La garanzia communala vegn pretendida, sche l'emprest da daners NPR na vegn betg restituì, e vegn duvrada per cuvrir il debit d'emprest nunpajà. Ina perdita eventuala vegniss repartida a parts egualas sin la confederaziun e sin il chantun. Correspundentamain na vegn in proceder tenor l'incumbensa Troncana-Sauer betg acceptà da la confederaziun renviond a l'art. 8 al. 3 da la lescha federala davart la politica regiunala. Dal rest vali: Sch'il chantun vuless fixar en il futur main garanzias en valurs per emprests da daners NPR, stuess vegnir resguardada stringentamain er la ristga da perdita en il giudicament da la qualificaziun e da l'autezza da la promoziun. Quai chaschunass emprests cleramain pli pitschens per singulas interpresas da teleferica.

Per realisar almain ina part da l'incumbensa Troncana-Sauer duai in'adattaziun da las directivas da promoziun dal DES pussibilitar che – sco cumplettaziun tar la garanzia communala per la mesadad da l'emprest – er autras garanzias pon vegnir acceptadas per l'autra mesadad. En cas da garanzias da banca po quest remplazzament vegnir fatg senza ulteriuras consequenzas. En cas d'in pegn immobigliar maximal en valurs sto però vegnir resguardada stringentamain la buntad da la garanzia cun calcular l'import d'emprest. Pervia da la ristga da perdita pli gronda vegn quai a chaschunar in emprest da daners NPR pli pitschen en il cas respectiv.

Tar la dumonda 1: Per realisar uschè bain sco pussaivel l'incumbensa cun resguardar ils princips NPR prevesa la regenza d'adattar las directivas da promoziun correspundentas dal departament d'economia publica e fatgs socials (DES). In'adattaziun da la lescha davart il svilup economic (LSE) e da l'ordinaziun per il svilup economic (OSE) n'è betg necessaria per quai.

Tar la dumonda 2: La cunvegna da program 2016–2019 existenta cun il SECO concernent la realisaziun da la NPR en il chantun Grischun na sto betg vegnir adattada, sch'ella vegn exequida tenor l'intenziun da la regenza.

Tar la dumonda 3: Per la fin da l'onn 2017 existan 13 emprests da daners NPR cun garanzias communalas en il sectur da las telefericas (emprests da daners NPR ad implants da transport ed ad implants da far naiv). Il saldo dals emprests da daners NPR anc betg amortisads cumplainamain importa per la fin dal l'onn 2017 13,4 milliuns francs. Oriundamain importavan quests emprests totalmain 19,4 milliuns francs.

Tar la dumonda 4: Il DES vegn ad adattar las directivas da promoziun – suenter avair consultà la regenza – probablamain en il 3. quartal da l'onn 2018 cun vigur immediata per tut ils cas da promoziun novs. Ina retroactivitad per contracts currents è exclusa.

Tar la dumonda 5: Sco mussà sto ina perdita che resta suenter che la garanzia è vegnida utilisada, vegnir finanzià adina da la confederaziun e dal chantun cur che l'emprest federal è vegnì restituì. La confederaziun premetta che la ristga da perdita è minimala grazia a las garanzias en valurs. La pratica da promoziun vertenta vegn ultra da quai applitgada uschia ch'ella po integrar d'ina vart las vischnancas en la promoziun da projects sin lur territori communal e conceder da l'autra vart grondas summas d'emprest.

26 d'avrigl 2018