Zum Seiteninhalt

Incumbensa Bondolfi concernent la cumposiziun da la gruppa da project che vegn incumbensada cun l'elavuraziun dal concept per promover la cultura en il chantun Grischun

sessiun: 14.02.2018

Tenor la lescha chantunala davart la promoziun da la cultura concluda il cussegl grond sin dumonda da la regenza mintga 4 onns in concept cumplessiv per promover la cultura en il chantun (art. 4 LPC). L'ordinaziun respectiva fixescha che la strategia per promover la cultura vegnia elavurada en collavuraziun cun las organisaziuns culturalas dal Grischun e cun la cumissiun da cultura. Il concept per promover la cultura furma la basa per decisiuns futuras da la politica culturala e duai preschentar la situaziun actuala en spezial en ils differents secturs da la promoziun da la cultura, definir accents concrets per la promoziun entaifer ils proxims 4 onns e mussar mesiras per cuntanscher quests accents (art. 2 e 3 OPC).

Il cumenzament da schaner è vegnida preschentada la gruppa da project ch'è vegnida incumbensada d'elavurar il concept per promover la cultura. A questa gruppa da project n'appartegna nagin represchentant da la scena da cultura dal Grischun talian. Questa situaziun è nuncuntentaivla ed inadequata, perquai ch'ella na reflectescha ni l'identitad culturala dal chantun ni las differentas sensibilitads u la diversitad dal chantun.

Ils arguments che cussegl guvernativ Martin Jäger ha explitgà durant la sessiun da favrer 2018 dal cussegl grond, tenor ils quals la lingua taliana saja represchentada adequatamain en la gruppa da project, na persvadan betg. I na va betg per savair talian, mabain per enconuscher detagliadamain la realitad culturala dal Grischun talian, per ch'ils interess da questa part da noss chantun possia vegnir represchentada adequatamain entaifer la gruppa da project. L'enconuschientscha dal talian è segiramain bainvegnida, na basta però betg per garantir la protecziun dals interess da questa identitad culturala specifica. En in chantun triling n'è la preschientscha dal Grischun talian en la gruppa da project betg sco ultim er ina dumonda da la sensibilitad politica e da la garanzia da la coesiun interna. Sco ultim periclitescha l'absenza dal Grischun talian en la gruppa da project er la legitimaziun democratica ed il consentiment dal parlament ch'è necessari per il concept per promover la cultura che la gruppa da project vegn a proponer.

Las sutsegnadras ed ils sutsegnaders incumbenseschan perquai la regenza da reponderar anc ina giada la cumposiziun da la gruppa da project e da la cumplettar cun ina represchentanza commensurada ed adequata dal Grischun talian.

Cuira, ils 14 da favrer 2018

Bondolfi, Noi-Togni, Michael (Castasegna), Albertin, Atanes, Blumenthal, Brandenburger, Caluori, Casanova (Glion), Casanova-Maron (Domat), Casty, Casutt-Derungs, Cavegn, Caviezel (Tavau Clavadel), Clalüna, Claus, Clavadetscher, Crameri, Della Vedova, Dosch, Epp, Fasani, Felix (Scuol), Florin-Caluori, Foffa, Geisseler, Giacomelli, Hartmann, Heinz, Heiz, Hitz-Rusch, Holzinger-Loretz, Joos, Kasper, Kollegger, Märchy-Caduff, Marti, Monigatti, Nay, Papa, Paterlini, Pedrini, Pfäffli, Salis, Sax, Schneider, Tenchio, Tomaschett (Breil), Troncana-Sauer, Vetsch (Pragg-Jenaz), Weidmann, Wieland, Zanetti, Berther (Segnas), Lombardi

Resposta da la regenza

L'art. 5 da la lescha davart la promoziun da la cultura dals 15 da favrer 2017 (LPC; DG 494.300) prevesa d'elavurar in concept cumplessiv per promover la cultura en il chantun Grischun. Quest concept vegn concludì dal cussegl grond mintga 4 onns sin proposta da la regenza. Tenor l'ordinaziun davart la promoziun da la cultura dals 12 da december 2017 (OPC; DG 494.310) vegn il concept per promover la cultura elavurà en collavuraziun cun las organisaziuns culturalas dal Grischun e cun la cumissiun da cultura. Suenter la perioda da concept da quatter onns datti in'evaluaziun. Ils resultats vegnan resguardads per il concept per promover la cultura che sto vegnir elavurà da nov per la proxima perioda da 4 onns.

Cun ses conclus nr. 10 dals 9 da schaner 2018 ha la regenza fixà l'organisaziun dal project per la fasa 1 per elavurar il concept per promover la cultura. En quest connex è vegnida designada ina gruppa da project da 7 persunas. Duas da quellas persunas represchentan mintgamai las organisaziuns culturalas dal Grischun e la cumissiun chantunala da cultura.

Cun l'incumbensa qua avant maun supplitgeschan las deputadas ed ils deputads sutsegnaders la regenza d'examinar anc ina giada la cumposiziun da la gruppa da project e da la cumplettar cun ina represchentanza dal Grischun talian.

Cun il conclus nr. 130 dals 27 da favrer 2018 ha la regenza elegì cun Aixa Andreetta, San Vittore, per immediat in terz commember da la cumissiun chantunala da cultura en la gruppa da project.

Sa basond sin questas consideraziuns propona la regenza al cussegl grond da stritgar questa incumbensa.

13 d'avrigl 2018