Cuntegn da la pagina

Incumbensa Caduff concernent il program d'incubaturs per il Grischun

sessiun: 14.02.2018

Per l'existenza d'ina economia publica è in current cuntinuant d'innovaziuns indispensabel. Senza questas innovaziuns na po in'economia publica cun in aut nivel d'enconuschientschas insumma betg exister en la concurrenza internaziunala.

La promoziun da l'economia dal chantun Grischun, sco che nus l'enconuschain oz, n'è betg buna da promover e da sustegnair en la dimensiun pretendida l'innovaziun en il chantun Grischun. Il focus da la promoziun da l'economia è oz il sustegn da las interpresas existentas sco er la domiciliaziun da novas interpresas. Il sustegn d'interpresas giuvnas innovativas manca per gronda part. Ina pussaivladad per sustegnair interpresas giuvnas èn uschenumnads "incubaturs".

Da princip èn incubaturs – ord la perspectiva da la politica economica – instituziuns che vulan crear in ambient positiv per interpresas giuvnas e che sustegnan ils fundaturs a realisar lur projects. In ambient positiv per incubaturs vegn creà tras ina maschaida da prestaziuns en ils secturs da l'infrastructura da las interpresas (p.ex. locals da biro), dal support dals affars sco er d'ina rait da contacts, tranter auter cun finanziaders.

La derasaziun creschenta e l'impurtanza pli e pli gronda dals incubaturs sa mussa er en lur dumber. Sin l'entir mund è il dumber d'incubaturs stà l'onn 1990 circa 1000. L'onn 2000 devi gia circa 3200 talas instituziuns, da las qualas mintgamai in terz eran domiciliadas en ils Stadis Unids da l'America ed en l'Europa. L'augment è stà progressiv cunzunt durant ils onns suenter la crisa finanziala ed economica. Uschia è il dumber d'incubaturs creschì da 5000 l'onn 2007 a 7000 l'onn 2012.

Ils incubaturs pon vegnir repartids en instituziuns profitablas (for-profit) e betg profitablas (non-profit). En connex cun las instituziuns publicas surpiglian citads, regiuns, chantuns u instituziuns sumegliantas la responsabladad per la gestiun. Incubaturs academics vegnan endrizzads d'universitads, da scolas autas u d'instituts da perscrutaziun. Tuts dus tips d'incubaturs, tant ils publics sco er ils academics, èn incubaturs betg profitabels.

Incubaturs privats ston plitost vegnir attribuids al sectur profitabel. Els sa basan sin persunas privatas, sin instituziuns e sin interpresas. Incubaturs ch'appartegnan ad ina interpresa han lur origin en ina interpresa e vegnan administrads da quella. Incubaturs independents privats èn sut la responsabladad da persunas privatas u er da gruppas da persunas e d'interpresas, senza che l'incubatur stoppia vegnir attribuì directamain ad ina tscherta interpresa. Ultra da quai datti er furmas maschadadas, tar las qualas instituziuns dal maun public e privat collavuran en in incubatur.

Las sutsegnadras ed ils sutsegnaders incumbenseschan la regenza d'examinar il concept d'incubaturs per il Grischun e da suttametter al cussegl grond ils resultats dals scleriments en ina furma adattada.

Cuira, ils 14 da favrer 2018

Caduff, Dudli, Albertin, Berther (Mustér), Blumenthal, Buchli-Mannhart, Caluori, Casanova (Glion), Casty, Casutt-Derungs, Cavegn, Caviezel (Cuira), Crameri, Darms-Landolt, Dermont, Dosch, Epp, Felix (Haldenstein), Foffa, Geisseler, Jeker, Joos, Kappeler, Kollegger, Lorez-Meuli, Mani-Heldstab, Märchy-Caduff, Müller, Niggli-Mathis (Grüsch), Papa, Paterlini, Pedrini, Peyer, Pult, Sax, Schneider, Stiffler (Tavau Plaz), Tenchio, Tomaschett (Breil), Tomaschett-Berther (Trun), Zanetti, Berther (Segnas), Lombardi, Stäbler

Resposta da la regenza

Er la regenza è da l'avis ch'interpresas giuvnas sajan da gronda impurtanza per la creschientscha d'ina economia publica. Ils ultims decennis è resultada ina purschida d'iniziativas per promover interpresas giuvnas quasi en l'entira Svizra. Ils incubaturs èn in element da questa promoziun. En tut la Svizra existan oz passa 70 incubaturs. Il dumber dals incubaturs en Svizra s'augmenta vinavant. Incubaturs porschan differents programs, q.v.d. ina differenta maschaida da prestaziuns en ils secturs da l'infrastructura d'interpresas (p.ex. locals da biro, laboratoris, lavuratoris), da la cussegliaziun per concepir ina interpresa, dal coaching dals interprendiders giuvens sco er da la colliaziun en ina rait cun l'industria, cun la scienza, cun la perscrutaziun e cun partenaris da finanziaziun. Ils differents concepts sa cloman centers da fundaziun, tecnoparcs, centers d'innovaziun, centers da tecnologia, acceleraturs, impact hubs e.u.v. Intgins stattan a disposiziun a tut ils geners d'interpresas giuvnas, auters èn focussads sin tschertas tematicas. Ils tecnoparcs èn orientads fermamain a las interpresas giuvnas da tecnologia. Ils set tecnoparcs da la Svizra – trais da quels en il chantun Turitg – èn colliads en l'uniun Allianza da tecnoparcs e porschan als commembers in access facilità a lur rait en la scienza, en la perscrutaziun ed en l'industria.

En il Grischun exista dapi l'onn 1999 in incubatur privat a Grüsch, che vegn manà da la "Fundaziun grischuna INNOZET". L'INNOZET ha domicilià cun success interpresas giuvnas che derivan dals conturns da la Firma TRUMPF Svizra SA (Trumpf). Perquai che la firma Trumpf dovra sezza las localitads, sto INNOZET tschertgar a media vista in nov lieu da staziunament. En collavuraziun cun INNOZET ha il chantun elavurà in concept general per in tecnoparc Grischun, in incubatur orientà a la tecnologia. Il concept tecnoparc ha l'intenziun da vegnir integrà en l'Allianza dals tecnoparcs. Sin basa dal concept general ha la regenza decidì ils 14 da november 2017 da princip da realisar il tecnoparc Grischun. L'uffizi per economia e turissem è vegnì incumbensà d'elavurar – en collavuraziun cun ina terza part adattada – in concept detaglià per realisar il project tecnoparc Grischun e da suttametter quel a la regenza.

Cun la nova lescha per promover il svilup economic en il chantun Grischun (LSE, DG 932.100) posseda il chantun Grischun la basa legala per sustegnair cun emprests u cun contribuziuns in incubatur tant sco agen project sco er sco project qualifitgà d'ina terza part. Cun la LSE è er vegnida stgaffida la pussaivladad per promover particularmain projects innovativs cunzunt er da start-ups. La promoziun dal chantun sa basa tranter auter sin il princip da la teoria da la basa d'export.

Il schaner 2018 è vegnì preschentà a la publicitad il center d'innovaziun InnoQube ch'è previs a Cuira. Quest center planisescha er in program d'incubaturs per interpresas giuvnas. Questa iniziativa privata da la InnoQube Swiss SA sco er ulteriurs projects che prevesan autras furmas per sustegnair interpresas giuvnas, sco p.ex. il InnHub a la Punt ch'è actualmain en la fasa da concepziun, vegnan beneventads zunt fitg dal chantun. Per savair, sche singuls programs d'incubaturs ch'èn vegnids iniziads sin basa privata, sa laschan cumbinar cun il project da tecnoparc previs da la regenza, dovri anc ulteriurs scleriments.

Grazia a la promoziun d'interpresas giuvnas tras incubaturs en il chantun Grischun vegni spetgà che la scena da start-ups survegnia dinamica tras ideas innovativas che vegnan sviluppadas vinavant en il Grischun e che vegnan lantschadas sin il martgà. Quai rinforza tant il Grischun sco lieu d'innovaziuns sco er l'economia grischuna en sia totalitad.

Sa basond sin questas consideraziuns propona la regenza al cussegl grond d'acceptar questa incumbensa.

26 d'avrigl 2018