Navigation

Inhaltsbereich

Sessiun: 14.02.2018

Per che la cassa da pensiun dal Grischun saja fitta per l'avegnir, stuess ella s'occupar cun ils svilups ils pli novs en l'industria da finanzas e betg manchentar la tendenza envers ina strategia d'investiziun che tegna quint dal clima. Per savair nua che la cassa da pensiun stat actualmain è ina circulaziun transparenta d'infurmaziuns da gronda impurtanza.

Cun la midada dal clima provocada da l'uman stat la cuminanza mundiala davant ina gronda sfida. Per che nus possian tegnair l'augment da la temperatura en il rom dals 1,5 (maximalmain 2) grads concludids cun la cunvegna davart il clima da Paris, che la Svizra ha ratifitgà, dovri sforzs sin tut ils plauns. L'artitgel 2.1c da la cunvegna davart il clima fixescha ch'ils currents finanzials stoppian esser cumpatibels cun la finamira dad 1,5 fin 2 grads. Vitiers vegn ch'il regulatur decisiv per la Svizra en il sectur dal clima vegn bain ad esser sia plazza da finanzas. Perquai che en Svizra vegnan administrads passa 6000 milliardas francs. Quai è 10 giadas dapli che la prestaziun economica svizra dal product naziunal brut. En cas da decisiuns d'investiziun ston er las consequenzas per la midada dal clima vegnir resguardadas sistematicamain. Perquai èsi d'ina impurtanza essenziala ch'ils acturs publics en il sectur da finanzas contribueschian lur part ad in svilup che tegna quint dal clima. Quai è pussaivel senza perditas finanzialas: Investiziuns favuraivlas al clima han schizunt ina meglra performanza rectifitgada concernent las ristgas che investiziuns convenziunalas (cf. uffizi federal d'ambient [UFAM; 2016]: Strategias d'investiziun favuraivlas al clima e performanza).

Il studi dal UFAM (2017) ha mussà che las cassas da pensiun svizras finanzieschan ina stgaudada dal clima da 4 fin 6 grads – pia lunsch davent da quels 2 grads en mira ch'èn vegnids fixads da la cunvegna davart il clima da Paris. En spezial ovras electricas a charvun èn fitg nuschaivlas per il clima, pervia da quai sto quest purtader d'energia svanir uschè svelt sco pussaivel or dal mix mundial d'energia. Quai fa ch'igl è fitg ristgà d'investir en charvun: Or da ponderaziuns da rendita e da ristga han per exempel la cassa da pensiun svizra la pli gronda, la PUBLICA, ed ultra da quai er la cassa da pensiun dal chantun Turitg (BVK) desinvestì areguard il charvun.

Entant ch'i vegnan promovidas mesiras politicas favuraivlas al clima cun meds finanzials publics fissi ultra da quai ina cuntradicziun, sch'il maun public sustegness il cuntrari cun sia strategia d'investiziun. I vala qua da cuntanscher ina coerenza en la politica. Ina basa e premissa perquai è da stgaffir dapli transparenza concernent ils effects da las investiziuns d'instituts da finanzas publics per il clima.

1. È er la regenza da l'avis ch'igl è impurtant or d'ina vista generala sociala ch'ils effects da las investiziuns da la cassa da pensiun per il clima vegnian publitgads en moda transparenta? Sche gea, co vegn quai garantì e quant gronds èn ils effects da las investiziuns da la cassa da pensiun dal Grischun per il clima?

2. È er la regenza da l'avis ch'igl è impurtant or d'ina vista generala da l'economia da manaschi che las ristgas finanzialas da las investiziuns da la cassa da pensiun, che resultan da la midada dal clima (ristgas climaticas), vegnian publitgadas en moda transparenta per pudair reagir en moda proactiva sin eventualas ristgas da la stabilitad (grad da cuvrida)? Sche gea, co vegn quai garantì e quant grondas èn las ristgas climaticas?

3. Sustegna la regenza sut quest aspect la desinvestiziun da la cassa da pensiun dal Grischun areguard interpresas che fan la gronda part da lur svieuta cun affars concernent la producziun da charvun, da gas, d'atom u dad ieli mineral? Sche gea, co vegn quella garantida? Sche na, pertge vegn refusada questa desinvestiziun?

4. Co pensa la regenza da garantir che la cassa da pensiun dal Grischun tegnia sias investiziuns en il rom da la strategia da sbassament da maximalmain 2 grads, sche pussaivel dad 1,5 grads?

5. Tge basas legalas (leschas, ordinaziuns) stuessan vegnir midadas per garantir la transparenza da las investiziuns da la cassa da pensiun dal Grischun concernent ils effects per il clima (Tge effects per il clima han las investiziuns?) e concernent las ristgas climaticas (Quant gronds èn ils effects da la midada dal clima e quant bunas èn las mesiras cunter quests effects per il svilup da la valur finanziala dals daners da la prevenziun professiunala?)?

Cuira, ils 14 da favrer 2018

Deplazes, Atanes, Baselgia-Brunner, Bucher-Brini, Cahenzli-Philipp, Caviezel (Cuira), Dermont, Dosch, Epp, Jaag, Joos, Kappeler, Kollegger, Kunfermann, Locher Benguerel, Monigatti, Perl, Peyer, Pfenninger, Pult, Tenchio, Thöny, von Ballmoos

Resposta da la regenza

La dumonda sveglia l'impressiun che la regenza possia influenzar directamain la direcziun resp. la strategia d'investiziun da la cassa da pensiun dal Grischun (CPGR). Quai n'è betg il cas. La refurma da las structuras en la lescha federala davart la prevenziun professiunala per vegls, survivents ed invaliditad (LPP) è vegnida messa en vigur pass per pass ils onns 2011 e 2012. Ina da las finamiras da la revisiun è stada quella da depolitisar las instituziuns da prevenziun da dretg public da la Svizra. En l'art. 51a LPP èn vegnidas fixadas las incumbensas betg transmissiblas e betg delegablas da l'organ suprem d'ina instituziun da prevenziun. Questa regulaziun n'ha laschà nagin spazi per surpigliar incumbensas directivas tras la regenza u tras il parlament. En la CPGR è la cumissiun administrativa (CA) l'organ suprem en il senn dal dretg federal. Sa basond sin il dretg chantunal ed en concordanza cun il dretg federal fixescha il cussegl grond oz mo pli il salari assicurà e las contribuziuns da spargn en la lescha davart la cassa da pensiun dal Grischun. Per tut las autras incumbensas è responsabla la CA (cf.: missivas, carnet nr. 14/2012 fin 2013, p. 902 ss.).

Cun la scheffa dal departament da finanzas e vischnancas sco represchentanta dals patruns è la regenza però represchentada en la cumissiun administrativa. En vista a l'impurtanza da la CPGR per las collavuraturas e per ils collavuraturs dal maun public e per il chantun sez resguarda la regenza la participaziun en la cumissiun sco impurtanta e gista. Sco represchentanta dals patruns posseda ella ina vusch en quest gremi da 10 persunas. La cumissiun consista da 5 represchentanzas dals patruns e da 5 represchentanzas dals lavurants. Conclus vegnan prendids tras maioritad simpla.

La CPGR ha realisà gia baud sia responsabladad per investiziuns cumpatiblas cun il clima ed agì correspundentamain. Dapi passa 10 onns construescha ella mo pli en il standard Minergie u Minergie P, indrizs fotovoltaics sin il tetg e sistems da sondas geotermicas per intents da stgaudar èn savens inclus. Ella posseda oz chasas da pliras famiglias a Zernez, Igis, Favugn, Puntraschigna, Tusaun, Malans e Cuira (Nordstrasse, Giacomettistrasse, Tittwiesenstrasse) che han tuttas almain il standard Minergie. Cun quest confess per ina moda da construir optimada en quai che reguarda l'energia presta ella dapi onns ina contribuziun impurtanta ad investiziuns cumpatiblas cun il clima. Tut quests edifizis funcziunan dal tuttafatg senza carburants fossils.

Il december 2010 ha la PCGR infurmà per l'emprima giada en moda cumplessiva davart la purschida d'uschenumnadas investiziuns da la facultad duraivlas. L'examinaziun n'è però betg sa limitada al tema da la "cumpatibilitad cun il clima". Plinavant èn investiziuns en secturs ch'engrevgeschan la natira e l'ambient ed investiziuns en categorias refusadas da la societad vegnidas integradas en l'analisa. Da quel temp ha l'expert scusseglià da talas investiziuns cun il motiv che l'univers limità d'investiziuns chaschunia ina performanza plitost bassa, ch'ils custs sajan pli auts envers products passivs e che la volatilitad da talas investiziuns saja pli gronda.

L'onn 2017 è la CPGR puspè sa fatschentada cun il tema da la "strategia d'investiziun favuraivla al clima". La CA ha incumbensà la direcziun d'examinar cun tge consequenzas ch'i sto vegnir fatg quint en cas d'ina midada dal portfolio d'aczias sin uschenumnads criteris ESG (environment, social e governance). Criteris ESG resguardan er dumondas concernent l'ambient sco per exempel l'emissiun da gas cun effect da serra e l'adempliment da las finamiras dal clima. Questa examinaziun è en curs. Ils resultats correspundents vegnan preschentads a la CA anc l'onn 2018. Las persunas responsablas da la CPGR na vegnan betg a perder ord egl la finamira legala suprema, numnadamain d'administrar la facultad uschia ch'i po vegnir realisada ina rendita che correspunda al martgà, e quai tar ina repartiziun adequata da las ristgas. La segirezza da las investiziuns gioga ina rolla essenziala en quest connex.

Tar la dumonda 1: Per la regenza è la politica dal clima generalmain impurtanta, ina vista focussada unicamain sin la CPGR è memia restrenschida. Las prescripziuns da rendaquint che valan per la cassa da pensiun fan grondas pretensiuns a la transparenza en la rapportaziun. Questa obligaziun ademplescha la CPGR cumplainamain cun ses rapport da gestiun annual. La CPGR lavura per gronda part cun investiziuns collectivas. La cumpetenza da tscherner ils titels da tals fonds n'è betg chaussa da l'investider. Fin ussa n'èsi betg stà pussaivel da survegnir ina mesiraziun da las consequenzas per il clima da questas investiziuns collectivas.

Tar la dumonda 2: Ord vista da l'economia da manaschi èn impurtantas tut las ristgas finanzialas, betg mo quellas da la midada dal clima. In'analisa isolada da las ristgas finanzialas mo or da l'optica da la midada dal clima n'è betg inditgada ed er betg pussaivla.

Tar las dumondas 3 e 4: La regenza n'è betg responsabla per la politica d'investiziun da la CPGR. Pervia da quai na vul ella er betg s'exprimer en chaussa. La CA ha però gia dà l'incumbensa d'examinar correspundentamain il portfolio. Cur che tut las infurmaziuns davart ils custs, davart las ristgas e davart las probabilitads da rendita d'ina midada dal portfolio èn avant maun, vegn ella a decider, sch'ina sortida (parziala) da las investiziuns collectivas actualas duai succeder.

Tar la dumonda 5: La basa legala per la strategia d'investiziun da cassas da pensiun svizras è formulada en il dretg federal (LPP ed OPP 2). Là na stattan naginas prescripziuns liantas concernent investiziuns da vaglias "duraivlas" u "cumpatiblas cun il clima". Sche talas èn raschunaivlas, sto decider il legislatur federal.

13 d'avrigl 2018