Navigation

Inhaltsbereich

Dumonda Locher Benguerel concernent la collocaziun da las requirentas e dals requirents d'asil minorens betg accumpagnads en il chantun Grischun independentamain da lur status

Sessiun: 14.02.2018

Il dumber da requirentas e requirents d'asil minorens betg accumpagnads (RMBA) sa diminuescha cuntinuadamain tant sin nivel chantunal sco er sin nivel naziunal. Sin basa da la diminuziun dal dumber da fugitivas e fugitivs minorens betg accumpagnads (FMBA) n'hai dà pli naginas attribuziuns ad instituziuns per la collocaziun da FMBA dapi l'avrigl 2017. En la sessiun da december 2017 han ins discurrì ch'i vegnia tratg en consideraziun da serrar las purschidas.

Perquai ch'ils giuvenils survegnan per gronda part il status da «requirentas e requirents d'asil admess provisoricamain (RAP)» pervia da la nova pratica federala, restan els en ils centers da transit. Ins sto partir dal fatg che quests giuvenils restian en l'avegnir en il chantun Grischun per l'emprima scolaziun professiunala e per l'integraziun en il mund da lavur. Il success il pli grond pussaivel per l'integraziun sociala e professiunala vegn pussibilità, sche mesiras adattadas pon cumenzar uschè baud sco pussaivel. Las gruppas d'abitar a Favugn ed a Glion èn concepidas specificamain per l'assistenza e per l'accumpagnament dals giuvenils respectivs ed adempleschan ils standards da qualitad e da permissiun per l'assistenza da minorens en Svizra.

Er signur Peter Arbenz constatescha en ses rapport che differents uffizis e departaments dal chantun e da las vischnancas sajan cumpetents per ils RMBA ed ils FMBA, tut tenor il stadi da la procedura d'asil: «L'examinaziun da sinergias pussaivlas areguard il concept da RMBA e da FMBA valess la paina tenor mai.»

Il mument d'examinar questas sinergias para ussa dad esser urgent, avant che purschidas cumprovadas vegnan serradas. En quest connex sto vegnir resguardà l'aspect da l'assistenza independenta dal status. Sut l'aspect da questa situaziun da partenza sa tschentan las suandantas dumondas:

1. È la regenza pronta d'examinar in'assistenza dals RMBA/FMBA independentamain da lur status? Sche quai è il cas u sche quai n'è betg il cas, cun tge motivaziun?

2. Co garantescha la regenza la pretensiun fatga en l'incumbensa Caviezel, ch'è vegnida stritgada: Ina structura adequata da collocaziun e d'assistenza che correspunda als basegns spezials da las persunas pertutgadas (RMBA/FMBA) e che tegna quint plainamain da las basas legalas. En quest connex stoi vegnir observà ch'ils uffants e giuvenils vegnian assistids senza largias.

3. Tge pass concrets èn vegnids fatgs per examinar – tenor la recumandaziun en il rapport Arbenz – en moda interdepartamentala sinergias pussaivlas areguard ils concepts da RMBA/FMBA dal chantun Grischun?

Cuira, ils 14 da favrer 2018

Locher Benguerel, Bucher-Brini, Tomaschett-Berther (Trun), Atanes, Baselgia-Brunner, Casutt-Derungs, Caviezel (Cuira), Caviezel (Tavau Clavadel), Deplazes, Dermont, Jaag, Mani-Heldstab, Monigatti, Niederer, Noi-Togni, Perl, Peyer, Pfenninger, Pult, Tenchio, Thöny, Tomaschett (Breil)

Resposta da la regenza

Tar la dumonda 1: Independentamain dal status da dimora sa tschenta la dumonda davart la structura da la collocaziun e da l'assistenza gia da princip pervia da la diminuziun dals dumbers da persunas minorennas betg accumpagnadas en il sectur d'asil. Ensemen cun il departament d'economia publica e fatgs socials (DES) è il departament da giustia, segirezza e sanadad (DGSS) actualmain londervi d'eruir ils avantatgs ed ils dischavantatgs d'ina tala assistenza. Consequentamain è la regenza pronta d'examinar ina collocaziun da las requirentas e dals requirents d'asil minorens betg accumpagnads en il chantun Grischun independentamain da lur status.

Tar la dumonda 2: La finamira da l'uffizi da migraziun e da dretg civil (UMDC) sco er da l'uffizi dal servetsch social (USo) è quella d'accumpagnar ils giuvenils fin ad ina vita economicamain e socialmain autonoma. Tuts dus concepts prevesan differents stgalims d'intensitad per l'assistenza. En quest connex vegn adattada l'intensitad da l'assistenza tut tenor l'augment da l'autonomia.

Requirentas e requirents d'asil minorens betg accumpagnads (RMBA) vegnan assistids tras il UMDC en sias duas structuras a Trimmis ed a Tavau Laret. A tut ils scolars da l'onn supplementar a Schiers èsi reussì la stad passada d'entrar en la purschida transitorica Palottis. Tut ils RMBA cun interess sportivs fan part d'ina uniun da sport e nizzegian fitg gugent las purschidas multifaras. En cas da basegn survegnan tut ils RMBA las terapias psicologicas necessarias, adina en preschientscha d'in translatur intercultural. La maioritad da las persunas da passa 18 onns ch'eran entradas en Svizra sco RMBA, viva en gruppas d'abitar en il center da transit a Trimmis. Giuvenils u persunas giuvnas creschidas che cumenzan cun in emprendissadi dastgan far midada, sch'els èn autonoms avunda e sch'els giavischan er sezs quai. Cumplementarmain a la collocaziun ed a l'assistenza dals giuvenils è er il process d'integraziun dal post spezialisà per l'integraziun dal UMDC ina premissa impurtanta per in svilup da success. Quel vegn concepì consequentamain tenor ils basegns individuals dals RMBA. Tut las persunas minorennas che n'èn betg pli obligadas d'ir a scola vegnan plinavant assistidas gia oz – independentamain da lur status – tras collavuraturas e collavuraturs dal post spezialisà per l'integraziun. Tras la purschida da furmaziun 15+ a Cazas, che porscha orientaziuns specificas, e tras las purschidas transitoricas a Schiers ed a Cazas vegnan messas las basas da scola per entrar en il sistem da la furmaziun professiunala.

Persunas minorennas betg accumpagnadas cun status da fugitiv (FMBA) vegnan assistidas da la fundaziun "Gott hilft" e da la Casa Depuoz (organisaziuns), fin che l'emprima scolaziun è terminada. Las organisaziuns han ina incarica da prestaziun per porscher assistenza a FMBA. En l'emprima fasa vegnan ils giuvenils assistids ed accumpagnads durant 24 uras da las collavuraturas e dals collavuraturs da las organisaziuns. Suenter circa 1 onn e mez midan ils giuvenils en gruppas d'abitar accumpagnadas, nua ch'els vivan autonomamain. Per l'integraziun linguistica e professiunala profitan ils giuvenils da las purschidas che vegnan messas a disposiziun tras il post spezialisà per l'integraziun.

Tar la dumonda 3: Ensemen cun lur posts da servetsch sclereschan ils dus departaments DES e DGSS las pussaivladads e las variantas per ina structura d'abitar independenta dal status. En quest connex vegni examinà, sch'i fissan avant maun eventualas sinergias per ils concepts da RMBA / FMBA. Per quest intent han gì lieu pliras sesidas tranter il DGSS / UMDC ed il DES / USo. Ils resultats vegnan ad esser avant maun la stad 2018.

2 da matg 2018