Navigation

Inhaltsbereich

Sessiun: 17.04.2018

Il sistem dal dretg fiscal grischun sin midada da proprietad en la lescha davart las taglias communalas e davart las taglias da baselgia sa basa sin ina moda da consideraziun economica cumplessiva (guardar missiva, p. 216). Ina midada da proprietad unicamain da dretg civil, tras la quala l'autorisaziun economica da disponer dal bain immobigliar na vegn betg midada, n'è pia betg in causal suttamess a la taglia sin midada da proprietad. Sco exempel en chaussa numna la missiva il transferiment d'in bain immobigliar da l'acziunari sulet a sia societad.

Cun la sentenzia dals 10 da schaner 2017, decisiun A 16 21, ha la dretgira administrativa dal chantun Grischun dentant surprendentamain giuditgà che la moda da consideraziun economica cumplessiva vegnia remplazzada tras ina moda da consideraziun tenor il dretg civil, uschespert ch'i sajan participadas da tuttas duas varts persunas giuridicas vi da l'act giuridic en discussiun (consideraziun 3d). En la decisiun numnada ha ina societad-biadia – che appartegneva a 100% a sia societad-mamma, la quala appartegneva da sia vart a 100% a sia societad-tatta – vendì sia immobiglia d'hotel a la societad-tatta. Cumbain ch'i n'ha dà economicamain nagina midada da proprietad, ha la vischnanca suttamess quest fatg a la taglia sin midada da proprietad, e la dretgira administrativa ha protegì questa decisiun.

Sco motivaziun ha la dretgira explitgà che questa pratica saja d'attribuir a sia veglia giurisdicziun, che saja vegnida surpigliada dal cussegl grond. «Sch'il legislatur vuleva surpigliar la pratica che valeva gia avant il relasch da la lescha davart las taglias communalas e davart las taglias da baselgia, sto quai vegnir resguardà er durant la valaivladad da la lescha menziunada, uschia ch'in act giuridic, vi dal qual èn participadas da tuttas duas varts persunas giuridicas, vegn giuditgà cun considerar er vinavant mo las parts contractantas directamain participadas, betg dentant las persunas associadas che stattan davosvart u eventuals conglomerats da firmas, eventualas societads da holding u da concern». Tenor la dretgira saja quai perquai chaussa dal legislatur da curreger questa pratica.

Las sutsegnadras ed ils sutsegnaders acceptan questa intimaziun da la dretgira ed incumbenseschan perquai la regenza da midar il dretg fiscal sin midada da proprietad uschia, che midadas economicas da proprietad en il senn descrit qua survart èn liberadas da la taglia sin midada da proprietad entaifer structuras da concern e da holding e ch'i vegn pia realisada la moda da consideraziun economica cumplessiva.

Cuira, ils 17 d'avrigl 2018

Kunz (Cuira), Hug, Crameri, Blumenthal, Bondolfi, Brandenburger, Burkhardt, Caduff, Caluori, Casanova-Maron (Domat), Casty, Casutt-Derungs, Claus, Davaz, Dudli, Engler, Felix (Scuol), Giacomelli, Hardegger, Heiz, Hitz-Rusch, Holzinger-Loretz, Jenny, Joos, Kasper, Koch (Igis), Kunz (Fläsch), Marti, Nay, Niggli (Samedan), Niggli-Mathis (Grüsch), Papa, Paterlini, Pedrini, Pfäffli, Salis, Sax, Schutz, Steck-Rauch, Stiffler (Cuira), Tenchio, Thomann-Frank, Tomaschett (Breil), Troncana-Sauer, Valär, Vetsch (Claustra Vitg), Vetsch (Pragg-Jenaz), Waidacher, Weber, Weidmann, Gugelmann, Natter, Pfister, Wellig

Resposta da la regenza

La taglia communala sin midada da proprietad è reglada oz definitivamain en la lescha davart las taglias communalas e davart las taglias da baselgia (LTCTB; DG 720.200). Las vischnancas èn libras da decider, sch'ellas vulan incassar ina taglia sin midada da proprietad, ellas fixeschan ina tariffa da taglia da maximalmain 2 pertschient en la lescha communala da taglia, ed ellas èn responsablas per incassar la taglia sin midada da proprietad.

La taglia sin midada da proprietad è ina taglia da correspundenza giuridica. Sco midada da proprietad vala mintga transferiment da la cumpetenza effectiva ed economica da disponer d'in bain immobigliar. Questa consideraziun economica s'effectuescha er a favur dals pajataglias, tras quai che midadas da proprietad da dretg civil n'èn betg suttamessas a la taglia sin midada da proprietad, sche l'autorisaziun economica vi dal bain immobigliar respectiv na sa mida betg. Cun stgaffir la LTCTB è il legislatur ì en quest reguard sapientivamain pli lunsch che auters legislaturs chantunals. Questa decisiun da princip na duai oz betg vegnir messa en dumonda.

La dretgira administrativa grischuna ha giuditgà la dumonda da las midadas da proprietad tranter societads colliadas cun guardar adina sin las parts contractantas ed (en cas da persunas giuridicas) betg sin las persunas pertutgadas che stevan davosvart (cf. sentenzia da la dretgira administrativa A 13 55 consideraziun 4. b). Uschia è la midada da proprietad tranter l'acziunari e la societad anonima ch'el dominescha bain ina midada da proprietad da dretg civil, betg dentant ina midada da proprietad economica, uschia ch'i na resulta nagina taglia sin midada da proprietad. En cas d'in transferiment d'ina immobiglia tranter duas societads affiliadas è percunter er vegnida affirmada ina midada da proprietad economica, perquai ch'ins sto considerar las duas parts contractantas e betg lur acziunaris (Pratica da la dretgira administrativa 2014, nr. 16, consideraziun 4 b = sentenzia da la dretgira administrativa A 13 55).

Er tenor l'avis da la regenza correspunda questa pratica da la dretgira administrativa al cuntegn da la LTCTB ed a la voluntad dal legislatur, cur ch'el ha stgaffì questa norma. En il cas concret contestà ha la dretgira administrativa decidì che la vendita d'ina immobiglia da la societad-biadia a la societad-tatta effectueschia tant ina midada da proprietad da dretg civil sco er ina midada da proprietad economica e ch'in causal da taglia sin midada da proprietad stoppia uschia vegnir affirmà. Ord vista da la giurisdicziun preschentada pudess ins tuttavia er defender l'opiniun ch'ina midada da maun economica saja da refusar, perquai che la societad-tatta pudeva disponer economicamain da l'immobiglia gia avant, sur ils dretgs da participaziun. La dretgira administrativa renviescha dentant ad ina midada da la lescha.

La regenza è pronta da prevair ina regulaziun legala per la constellaziun numnada. Questa regulaziun vegn dentant a sa restrenscher a cas, nua ch'ina midada da proprietad economica po vegnir refusada ord l'optica dals subjects da taglia involvids. Ina consideraziun economica cumplessiva entaifer il concern na po betg esser materialmain correcta, ed ina tala regulaziun na fiss er betg pratitgabla en cas da structuras interchantunalas u schizunt internaziunalas cumplexas. A las vischnancas vegnissan adossads custs administrativs sproporziunads. Da medema maniera sco quai che la consideraziun economica a quint dals pajataglias na po betg stabilir causals da taglia sco ch'i para e plascha, na po ella er betg giustifitgar excepziuns sco ch'i para e plascha.

Sin fundament da questas explicaziuns propona la regenza al cussegl grond d'acceptar parzialmain questa incumbensa, vul dir limità a la correctura da la giurisdicziun contestada concretamain.

21 da zercladur 2018