Navigation

Inhaltsbereich

Sessiun: 12.06.2018

La revisiun da la lescha d'asil, concludida l'onn 2016, vul accelerar las proceduras d'asil e meglierar l'integraziun da las persu­nas che tschertgan protecziun. La nova procedura d'asil entra en vigur la primavaira 2019. A partir da lura vegnan realisadas las proceduras en moda accelerada, ed ina maioritad da las dumondas d'asil vegn terminada da nov en proceduras d'in tact svelt en centers federals d'asil. Persunas en l'uschenumnada procedura da Dublin vegnan repatriadas directamain davent dal center federal d'asil (sch'i existan cunvegnas da readmissiun) e na vegnan – cuntrari ad oz – betg pli repartidas als chantuns. Al Grischun vegnan uschia attribuidas cunzunt persunas cun in dretg da dimora u persunas en proceduras currentas, sche lur dumonda d'asil basegna ulteriurs scleriments. Perquai ch'ina decisiun d'asil duess esser avant maun pli svelt, po e duai la pro­moziun da l'integraziun cumenzar pli baud cumpareglià cun il sistem vegl, quai che duess avair a vista pli lunga effects posi­tivs per ils custs da l'agid social sco er per la convivenza sociala.

Las sutsegnadras ed ils sutsegnaders fan las suandantas dumondas en chaussa:

1.     Tge consequenzas ha la restructuraziun per la collocaziun e per l'assistenza da las requirentas e dals requirents d'asil en il Grischun?

2.     Vegni a dar adattaziuns tar las incumbensas dals centers da transit, en spezial en il sectur da la promoziun da l'integraziun? Sche gea, en tge furma?

3.     Tge consequenzas ha la restructuraziun per il concept da gestiun dal center per l'emprima registraziun planisà al Meiers­boden?

Cuira, ils 12 da zercladur 2018

Cahenzli-Philipp, Tomaschett-Berther (Trun), Clalüna, Atanes, Baselgia-Brunner, Bucher-Brini, Casanova (Glion), Casty, Caviezel (Cuira), Della Vedova, Deplazes, Geisseler, Hardegger, Jaag, Komminoth-Elmer, Kunfermann, Locher Benguerel, Lorez-Meuli, Monigatti, Niederer, Niggli-Mathis (Grüsch), Noi-Togni, Perl, Pfenninger, Pult, Thomann-Frank, Thöny, von Ballmoos, Widmer-Spreiter, Föhn

Resposta da la regenza

Tar la dumonda 1: En il rom da la restructuraziun dals fatgs d'asil en Svizra vegnan attribuidas al chantun – a partir da l'entrada en vigur da la nova legislaziun d'asil il 1. da mars 2019 – dapli persunas en proceduras pendentas cun in dretg potenzial da restar en Svizra e dapli persunas ch'èn gia vegnidas renconuschidas sco fugitivas u admessas provisoricamain il mument da l'attribuziun. Sco oz vegnan questas persu­nas a duvrar ils emprims mais fitg bleras infurmaziuns e fitg bler sustegn per duma­gnar lur mintgadi. Fin ch'ellas pon visitar ils emprims curs da tudestg dal post spe­zia­lisà per l'integraziun, ston ellas pudair arranschar lur mintgadi en Svizra. Persunas cun ina procedura pendenta u persunas admessas provisoricamain vegnan reparti­das – suenter ina dimora al center per l'emprima registraziun a Cuira – sin in dals differents centers da transit dal chantun. Là abitan ellas, fin ch'ina decisiun definitiva è avant maun resp. fin che las persunas admessas provisoricamain èn almain per part finanzialmain independentas. L'uffizi da migraziun e da dretg civil (UMDC), ch'è responsabel en chaussa, parta dal fatg ch'il Grischun survegnia a partir dal 1. da mars 2019 dapli attribuziuns da persunas (admessas provisoricamain), che ston vegnir collocadas en las structuras da transit. Percunter spetga il UMDC damain persunas ch'èn anc en proceduras d'asil currentas e da las qualas il dretg da restar en Svizra è intschert. Co ch'il spustament sa preschenta en cifras, na po betg vegnir ditg per il mument. Sch'in u plirs centers da transit vegnan serrads en il rom da la realisaziun da la restructuraziun dals fatgs d'asil, vegn pir anc a sa mussar e de­pen­da fermamain da las dumondas d'asil fatgas en Svizra e da las attribuziuns respec­tivas als chantuns. En quest reguard vegn il UMDC ad analisar er vinavant periodi­camain e detagliadamain la situaziun actuala ed a far prognosas per la situaziun da collocaziun.

Tar la dumonda 2: Tut tenor il dumber d'attribuziuns vegni ad esser pussaivel da con­ceder dapli spazi liber a las abitantas ed als abitants en ils alloschis collectivs e – pli ditg che la dimora dura – er da reducir l'intensitad d'assistenza. Questas persunas vegnan plinavant scoladas specificamain en vista a la situaziun d'abitar individuala e preparadas per manar ina vita independenta. Il UMDC sa stenta d'avischinar er vi­navant las persunas dal sectur d'asil adequatamain e sistematicamain a questa inde­pendenza, per ch'ellas possian dumagnar il mintgadi sulettas, senza ulteriur sustegn da num, cur ch'ellas bandunan las structuras collectivas. Vitiers vegn ch'i vegnan endrizzadas en ils centers da transit – uschenavant sco pussaivel – dapli localitads adattadas per intents da scolaziun e per far lezias e pensums da chasa. Sin las pur­schidas d'integraziun specificas dal post spezialisà per l'integraziun n'ha l'adattaziun da las incumbensas dals centers da transit da princip nagina influenza, perquai che questas purschidas han lieu independentamain da la furma da collocaziun e d'assi­stenza. Perquai che las proceduras d'asil duain vegnir terminadas tras la confede­raziun en l'avegnir pli svelt grazia al nov sistem, vegnan las mesiras d'integraziun dentant a pudair cumenzar pli baud che oz.

Tar la dumonda 3: La restructuraziun n'ha da princip naginas consequenzas per il concept da gestiun dal center per l'emprima registraziun (CER), perquai ch'i vegnan attribuidas al chantun er vinavant persunas en la procedura averta (status N) u per­sunas admessas provisoricamain (status F). Il dumber da persunas attribuidas al chantun na po mai vegnir planisada exactamain ordavant. Quai vegn ad esser de­cisiv per la cumposiziun da las abitantas e dals abitants en il CER Bodenhof ch'è planisà al Meiersboden (vischnanca da Churwalden). Sco en ils centers da transit vegnan persunas cun in'admissiun provisorica preparadas er en il CER pli savens per sortir da las structuras. Il UMDC examinescha actualmain, sch'i pon vegnir stgaf­fids en il CER Bodenhof al Meiersboden secturs d'abitar spezials per emprendistas ed emprendists, per praticantas e praticants sco er per lavurantas e lavurants che vegnan occupads en il model da stgalims "Paja parziala plus", per uschia pudair garantir in ambient che promova l'emprender.

28 d'avust 2018