L'iniziativa parlamentara concernent la midada da la lescha davart il cussegl grond (LCG) tuna sco suonda:
Sut il titel «6. Correspundenza tranter la regenza ed il cussegl grond» vegn introducì suenter l'art. 68a il suandant nov alinea:
6.5. Missivas da la regenza
Art. 68b La regenza preschenta en missivas davart sbozs da leschas detagliadamain, sche – en il cas affirmativ – quant enavant che l'agen sboz da lescha va pli lunsch che las prescripziuns stringentas dal dretg federal respectivamain che las normaziuns legalas respectivas dals chantuns Son Gagl, Tessin e Vallais. En quest connex observa ella en spezial regulaziuns che restrenschan la libertad individuala u economica.
Motivaziun:
Suenter che leschas deliberadas ed ordinaziuns relaschadas èn avant maun sto il parlament adina puspè prender enconuschientscha dal fatg ch'il chantun Grischun ha regulaziuns pli severas che quellas previsas da la lescha federala e d'auters chantuns. I po vegnir constatà che regulaziuns pli severas pon chaschunar dischavantatgs economics en il sectur da cunfin cun auters chantuns, en spezial cun ils chantuns Son Gagl e Tessin. Ultra da quai è il chantun da muntogna Vallais adattà sco referenza sin basa da sia grondezza e da sia topografia. Per ch'ina legislaziun formulada en moda memia severi na chaschunia betg dischavantatgs betg vulids per la populaziun, per la mastergnanza e per l'industria, duai vegnir stgaffida transparenza; ina transparenza che pussibilitescha al parlament – en sia cumpetenza legislativa – da refusar regulaziuns pli severas u però da las acceptar sapientivamain.
Il titel «6.4. Ordinaziuns da la regenza» ed il «art. 68a» n'èn anc betg vegnids deliberads dal cussegl grond, mabain èn l'object da l'iniziativa parlamentara Vetsch (Pragg-Jenaz) concernent l'introducziun d'in veto d'ordinaziun.
Cuira, ils 12 da zercladur 2018
Vetsch (Pragg-Jenaz), Wieland, Bondolfi, Alig, Bleiker, Buchli-Mannhart, Burkhardt, Caluori, Casanova-Maron (Domat), Casty, Casutt-Derungs, Cavegn, Caviezel (Tavau Clavadel), Claus, Crameri, Davaz, Dosch, Dudli, Engler, Felix (Scuol), Giacomelli, Gunzinger, Hardegger, Heiz, Hitz-Rusch, Holzinger-Loretz, Hug, Jenny, Kasper, Koch (Igis), Komminoth-Elmer, Kunz (Fläsch), Kunz (Cuira), Kuoni, Lamprecht, Lorez-Meuli, Mani-Heldstab, Marti, Mathis, Michael (Castasegna), Müller, Nay, Niggli-Mathis (Grüsch), Papa, Pfäffli, Salis, Schutz, Stiffler (Tavau Plaz), Stiffler (Cuira), Thomann-Frank, Toutsch, Troncana-Sauer, Valär, Waidacher, Weber, Weidmann, Widmer-Spreiter, Berther (Segnas)