Sin basa da l'art. 1 da la lescha federala dals 30 da settember 2011 davart l'agid a las scolas autas e davart la coordinaziun en il sectur da las scolas autas svizras (LASA; CS 414.20) procuran la confederaziun ed ils chantuns cuminaivlamain per la coordinaziun, per la qualitad e per la cumpetitivitad dal sectur da las scolas autas en tut la Svizra.

Per ch'ina instituziun da scolaziun dal sectur da las scolas autas dastga sa numnar «universitad», «scola auta spezialisada» u «scola auta da pedagogia», pretenda l'art. 29 al. 1 LASA in'accreditaziun instituziunala. Per survegnir per las studentas ed ils students contribuziuns da la confederaziun e dals chantuns, dovri ultra da quai in dretg da contribuziun. Las cundiziuns correspundentas èn formuladas en l'art. 45 al. 1 LASA. Tenor l'art. 46 LASA decida il cussegl federal davart il dretg da contribuziun da la scola auta tadlond ordavant la radunanza plenara. La radunanza plenara è in organ da la conferenza universitara svizra, da la quala fan part ina commembra u in commember dal cussegl federal sco er mintgamai ina commembra u in commember da las regenzas da tut ils chantuns (art. 7 en cumbinaziun cun l'art. 11 al. 1 LASA).

Tar la dumonda 1: Scolas autas che han l'accreditaziun instituziunala dovran in dretg da contribuziun per survegnir contribuziuns da la confederaziun e dals chantuns (art. 45 al. 1 LASA). L'art. 3 al. 1 da l'ordinaziun dals 23 da november 2016 tar la lescha davart l'agid a las scolas autas e davart la coordinaziun en il sectur da las scolas autas svizras (O-LASA; CS 414.201) prescriva ch'ils purtaders da scolas autas stoppian inoltrar la dumonda al departament federal d'economia, furmaziun e retschertga (DEFR).

Tar la dumonda 2: Suenter ch'il cussegl svizzer d'accreditaziun ha infurmà ils 21 da zercladur 2018 che la scola auta da tecnica ed economia Cuira (SATE Cuira) saja renconuschida en quai che concerna il dretg da contribuziun, ha la regenza dumandà la confederaziun cun il conclus dals 3 da fanadur 2018, protocol nr. 544, da renconuscher il dretg da contribuziun da la SATE Cuira.

Tar la dumonda 3: Tenor l'art. 46 al. 2 LASA consultescha il cussegl federal la radunanza plenara avant che decider. A chaschun da quella audiziun vegn il represchentant dal Grischun a rinforzar la posiziun da noss chantun.

Tar la dumonda 4: Per sustegnair la dumonda dal dretg da contribuziun èn vegnidas prendidas en spezial las suandantas mesiras:

– La delegaziun grischuna dal cussegl naziunal e dal cussegl dals chantuns è vegnida infurmada davart la decisiun dal cussegl federal planisada concernent la renconuschientscha dal dretg da contribuziun da la SATE Cuira.

– Il cussegl da scola auta da la scola auta spezialisada da la Svizra orientala (SASSO) ha decidì unanimamain cun il conclus dals 17 da november 2016 che la SATE Cuira sa laschia accreditar instituziunalmain en moda autonoma e ch'il chantun Grischun inoltreschia pia al cussegl federal ina dumonda da renconuscher il dretg da contribuziun. Dal cussegl da scola auta da la SASSO fan actualmain part las directuras ed ils directurs da l'educaziun publica dals chantuns Appenzell Dadens, Appenzell Dador, Glaruna, Grischun, Schaffusa, Son Gagl, Sviz e Turgovia sco er dal Principadi da Liechtenstein.

– Il president dal cussegl da scola auta da la SASSO e parsura dal departament da furmaziun dal chantun Son Gagl, president da la regenza Stefan Kölliker, ha tramess – sin basa dal conclus dal cussegl da scola auta da la SASSO – l'avust 2018 supplementarmain ina brev da sustegn al schef dal DEFR, cusseglier federal Johann Schneider-Ammann, che tematisescha il conclus da la regenza menziunà en la resposta 2.

19 d'october 2018