Navigaziun principala

Cuntegn da la pagina

Dumonda Derungs concernent las consequenzas d'ina adattaziun da l'imposiziun da taglia sin la valur da l'atgna locaziun per il chantun Grischun

sessiun: 23.10.2018

L'avust 2018 è la cumissiun per economia e taxas dal cussegl dals chantuns (CET-CC) sa cunvegnida cun ina clera maioritad da fixar las valurs directivas d'ina refurma da l'imposiziun da taglia sin la valur da l'atgna locaziun, ed ella ha incumbensà l'administraziun d'elavurar in sboz preliminar per abolir la valur da l'atgna locaziun. Precedida a quest conclus era ina iniziativa parlamentara ch'era vegnida acceptada da tuttas duas cumissiuns per economia dal parlament federal. Evidentamain èn las schanzas per ina midada da sistem uschè bunas sco anc mai.

Sut quest aspect vulan las sutsegnadras ed ils sutsegnaders savair da la regenza:

1.     Tge consequenzas avess la refurma previsa cun las valurs directivas da la CET-CC per las finanzas dal chantun e da las vischnancas?

2.     Tenor la proposta da la refurma èn las abitaziuns secundaras exceptadas per il mument da la midada da sistem, perquai sa tschenta la dumonda: Quant gronda è actualmain la part dals proprietaris d'abitaziuns secundaras vi da las taglias sin las entradas dal chantun e tge dimensiun han quellas en las vischnancas?

3.     Tge consequenzas fissan da spetgar per las entradas fiscalas dal chantun e da las vischnancas, sche las abitaziuns secundaras vegnissan medemamain liberadas da l'imposiziun da taglia?

Cuira, ils 23 d'october 2018

Derungs, Widmer (Favugn), Kunz (Cuira), Alig, Berther, Berweger, Bettinaglio, Bondolfi, Brandenburger, Brunold, Buchli-Mannhart, Cahenzli-Philipp, Caluori, Cantieni, Casty, Casutt-Derungs, Cavegn, Caviezel (Tavau Clavadel), Clalüna, Crameri, Danuser, Deplazes (Rabius), Dürler, Ellemunter, Engler, Epp, Erhard, Fasani, Felix, Flütsch, Föhn, Gasser, Giacomelli, Grass, Gugelmann, Hartmann-Conrad, Hitz-Rusch, Hohl, Holzinger-Loretz, Jenny, Jochum, Kappeler, Kienz, Kohler, Kunfermann, Kunz (Fläsch), Lamprecht, Loepfe, Loi, Maissen, Märchy-Caduff, Marti, Michael (Donat), Michael (Castasegna), Mittner, Müller (Susch), Natter, Niggli-Mathis (Grüsch), Papa, Paterlini, Preisig, Rettich, Ruckstuhl, Rüegg, Rutishauser, Sax, Schmid, Schneider, Schwärzel, Tanner, Thomann-Frank, Tomaschett-Berther (Trun), von Ballmoos, Waidacher, Weidmann, Wellig, Widmer-Spreiter (Cuira), Wieland, Zanetti (Sent), Bürgi-Büchel, Nicolay, Stocker

Resposta da la regenza

Per l'imposiziun da taglia sin la valur da l'atgna locaziun datti duas soluziuns, cun las qualas ins po cuntanscher in tractament giuridic egual tranter ils proprietaris d'abita­ziuns ed ils locataris. Sche la valur da l'atgna locaziun vegn suttamessa a la taglia sco entrada, pon er ils custs ch'èn necessaris per obtegnair l'entrada (tschains da debits e mantegniment d'immobiglias) vegnir deducids sco custs per realisar il gu­dogn. Sch'i vegn desistì d'imponer taglias sin la valur da l'atgna locaziun, na po er vegnir deducì nagut, perquai ch'ils tschains da debits ed ils custs da mantegniment na servan betg pli ad obtegnair l'entrada. L'annullaziun da l'imposiziun actuala da taglia sin la valur da l'atgna locaziun avess – tenor il sistem – per consequenza ch'er las deducziuns appartegnentas vegnissan stritgadas.

La cumissiun per economia e taxas dal cussegl dals chantuns (CET-CC) ha inoltrà ina iniziativa parlamentara per midar il sistem tar l'imposiziun da taglia sin la proprie­tad d'abitaziuns (numer da fatschenta 17.400). Il text da l'iniziativa cumpiglia mo la proprietad d'abitar duvrada sez al lieu da domicil, l'uschenumnada emprima abita­ziun. Per las abitaziuns secundaras duai vegnir mantegnida l'imposiziun actuala da taglia sin la valur da l'atgna locaziun. La CET-CN ha acceptà questa iniziativa. Sin quai ha la CET-CC cumenzà ad elavurar in project, ed ha incumbensà l'administra­ziun federala da taglia da far ulteriurs scleriments pertutgant eventualas deducziuns per custs da mantegniment, per mesiras per spargnar energia e per tschains da debits.

La malsegirezza la pli gronda da la soluziun futura è quella en connex cun la pus­saivladad da deducir ils tschains da debits. En il dretg vertent n'è la deducziun dals tschains da debits betg normada sco deducziun dals custs per realisar il gudogn, mabain sco deducziun generala (art. 33 lit. a LTFD ed art. 36 lit. a LT). Ils tschains da debits pon pia er vegnir deducids, sch'ils emprests respectivs n'èn betg vegnids du­vrads per obtegnair l'entrada, mabain per intents da consum. Cun la midada da si­stem ch'ins vul cuntanscher vegnan ins a stuair decider, sche tut ils tschains da de­bits che pertutgan l'emprima abitaziun duain vegnir stritgads u sch'i duai dar excep­ziuns per novs acquistaders. Ultra da quai ston ils tschains da debits che resultan en connex cun obtegnair la facultad (abitaziuns secundaras, auters retgavs da facultad) pudair vegnir deducids vinavant, e la finala vegnan ins a stuair valitar la dumonda dals tschains da debits sin ils credits da consum.

Tar la dumonda 1: En il stadi actual da la procedura da legislaziun n'èn betg enconu­schents ils custs che pon vegnir deducids e cunzunt betg la regulaziun areguard ils tschains da debits. Uschia na pon er betg vegnir fatgas calculaziuns expressivas.
L'annullaziun da la valur da l'atgna locaziun sin las emprimas abitaziuns, dals custs da mantegniment appartegnents e da tut ils tschains da debits chaschunass entra­das supplementaras en il chantun d'ina dimensiun dad 8 milliuns francs. Per il plaun communal na datti naginas calculaziuns.

Tar la dumonda 2: La regenza na presuma betg che la valur da l'atgna locaziun sin las abitaziuns secundaras vegnia stritgada, senza ch'i vegnian integradas a medem temp soluziuns substitutivas en il dretg federal.
Sin plaun chantunal muntan ils retgavs da la taglia sin las entradas per abitaziuns secundaras a 37 milliuns francs, en cumparegliaziun cun tut las taglias sin las en­tradas da 362 milliuns francs. Las calculaziuns pertutgan l'onn fiscal 2016. Per il plaun communal na datti naginas calculaziuns.

Tar la dumonda 3: Sin plaun chantunal crudassan davent las taglias sin las entradas per abitaziuns secundaras en la summa da 37 milliuns francs. Per il plaun communal na datti naginas calculaziuns.

5 da december 2018