Navigaziun principala

Cuntegn da la pagina

Incumbensa Deplazes (Cuira) concernent cuvridas innovativas per il traffic betg motorisà

sessiun: 25.10.2018

Colliaziuns directas e d'ina buna qualitad per il traffic betg motorisà promovan da midar da l'auto al velo. Quai è fitg ludaivel e duai vegnir promovì.

Per che las vias da velo sajan attractivas per las ciclistas ed ils ciclists, ston ellas avair ina tscherta qualitad en quai che concerna la construcziun. Quai è chapaivel. Tuttina na dastga il confort betg vegnir augmentà sin donn e custs da la natira.

Sch'i vegnan construidas novas vias da velo, vegnan planisads e construids adina dapli trajects cun asfalt, schizunt trajects che sa chattan en il guaud. Las vias da velo cun cuvrida dira che han ina ladezza da 2 fin 3 meters disturban il maletg da la cuntrada e fan donn al sistem ecologic.

Perquai duessi, sche pussaivel, vegnir desistì d'asfaltar vials da velo en territoris sensibels sco guauds, prads sitgs e.u.v. Per garantir l'attractivitad dals trajects dovri cuvridas alternativas che sa cumportan cun la natira.

Las sutsegnadras ed ils sutsegnaders vulan intimar da sviluppar cuvridas alternativas ed incumbenseschan la regenza d'incaricar la Scola auta da tecnica ed economia (SATE) a Cuira da sviluppar per las colliaziuns dal traffic betg motorisà ina cuvrida innovativa che sa cumporta cun la natira, e quai en collavuraziun cun ulteriuras instituziuns e federaziuns, sco p.ex. l'institut federal da controlla da material e da perscrutaziun (EMPA), la societad svizra dals inschigners ed architects (SIA) u l'uffizi federal da vias (UVIAS).

Cuira, ils 25 d'october 2018

Deplazes (Cuira), Schwärzel, Atanes, Baselgia-Brunner, Buchli-Mannhart, Cahenzli-Philipp, Casty, Degiacomi, Della Cà, Gasser, Grass, Hofmann, Horrer, Kappeler, Kunfermann, Locher Benguerel, Müller (Favugn), Noi-Togni, Perl, Preisig, Rettich, Rutishauser, Thöny, von Ballmoos, Wilhelm, Spadarotto

Resposta da la regenza

L'utilisaziun dal velo sco med da transport ecologic, favuraivel e saun gioga ina rolla adi­na pli impurtanta en il traffic local dad oz. Dal success dal velo electric che crescha ad in crescher resultan er novas schanzas per questa furma da mobilitad. Decisiva per l'ac­ceptanza dal velo è la concepziun da l'infrastructura stradala. Sco preschentà en il plan secturial futur Velo dal chantun vegni differenzià tranter il traffic da velo da temp liber inclusiv velo da muntogna ed il traffic da velo quotidian. L'infrastructura stradala per il traffic da velo quotidian sco er ses mantegniment funcziunal ston esser concepids uschia ch'il velo po vegnir duvrà – da princip independentamain da l'aura respectiva cun plievgia e naiv – per ils basegns da mobilitad quotidians per ir a lavurar, per ir a far cumissiuns u per ir a scola.

Analogamain a la construcziun da vias vegn per regla duvrada tenor la pratica naziunala ed internaziunala – uschia per exempel en il manual actual "Planisaziun da rutas da velo" da l'uffizi federal da vias UVIAS – ina cuvrida dira d'asfalt da bitum u da betun per vias da velo dal traffic da velo quotidian. Mo ina tala cuvrida dira cun in resistenza cor­respundentamain minima per las rodas ch'è simpla da mantegnair a lunga vista garan­tescha che las ciclistas ed ils ciclists arrivan bain, en moda confortabla e netta a lur destinaziun. La ciclista u il ciclist è – auter che l'automobilista u l'automobilist – exponì fitg ferm a las relaziuns da l'aura. Ultra da quai influenzeschan il trassé e la structura dal vial directamain la prestaziun corporala ed uschia er l'acceptanza d'ina colliaziun da velo. Correspundentamain ha la qualitad dal trassé e da la cuvrida da colliaziuns da velo ina fitg gronda impurtanza. En il cas singul concret vegni examinà sin basa da las cundiziuns generalas legalas e d'eventuals inventaris da protecziun, sch'ina via da velo planisada traversa in territori sensibel. En il senn d'ina ponderaziun dals interess vegni eventual­main decidì, sch'i sto vegnir divergià da la pretensiun da las disposiziuns legalas federalas e chantunalas che pretendan ina cuvrida dira.

Igl è da gronda impurtanza per la segirezza da las persunas che dovran las vias da velo che las ladezzas decisivas da las vias da velo vegnian observadas, e quai en spezial pervia dals timuns che daventan adina pli lads e pervia da las sveltezzas dals velos electrics. Las prescripziuns correspundentas dal plan secturial futur Velo sa chattan gia al cunfin sut da las ladezzas da las vias da velo, sco ch'ellas vegnan pretendidas da las normas tecnicas respectivas.

En cas da la via da velo Cuira – Trimmis, ch'è vegnida approvada dacurt da la regenza (conclus dals 6 da november 2018, prot. nr. 841), è per exempel sa tschentada la du­monda davart la ladezza da la via da velo e davart la structura da la surfatscha en ter­ritoris sensibels. En il discurs cun posts spezialisads han pudì vegnir chattadas soluziuns ch'èn in cumpromiss acceptabel tranter la funcziunalitad quotidiana ed ils interess da l'ambient. Uschia vegn la cuvrida dira surtratga en il sectur dal guaud cun ina substanza lianta, sin la quala vegn sternì sablun grop. Uschia ha la via da velos l'apparientscha d'ina via champestra, ma garantescha tuttina la durabilitad e la planivitad pretendida. Per il traject da via en discussiun para quai dad esser raschunaivel. Ina part dal conclus d'approvaziun è l'incumbensa a l'uffizi da construcziun bassa dal Grischun d'evaluar, sco post spezialisà per il traffic betg motorisà, la funcziunalitad quotidiana per velos da que­sta surfatscha suenter in onn da gestiun (monitoring areguard la durabilitad ed areguard las frequenzas). Da las experientschas concernent il mantegniment e concernent l'utili­saziun pon vegnir gudagnadas enconuschientschas per projects futurs.

Ils materials e las cuvridas che pon vegnir tschernids en la construcziun da vias èn enco­nuschents e vegnan duvrads tenor las pretensiuns concretas. Ina incumbensa da svi­lup­par da nov ina cuvrida, senza che quella haja in connex cun in project concret d'ina via da velo, na resguarda la regenza ni sco necessaria ni sco cunvegnenta. En il senn da las ponderaziuns preschentadas resguarda l'evaluaziun da las experientschas dal project da via da velo Cuira – Trimmis gia bain avunda l'incumbensa.

Sa basond sin questas explicaziuns propona la regenza al cussegl grond da refusar questa incumbensa.

13 da december 2018