Navigation

Inhaltsbereich

Sessiun: 04.12.2018

Dapi la rumida da la scena da drogas averta sco il Platzspitz ed il Letten è la politica da drogas sa midada en Svizra. Er sche quai fiss giavischabel, ma in'abstinenza cumpletta n'è per bleras persunas dependentas da drogas displaschaivlamain betg realisabla. Chantuns precursurs sco Turitg e Basilea-Citad han realisà ils ultims onns la politica naziunala da las 4 pitgas cun concepts progressivs e stgaffì posts da contact e da consultaziun cun locals da consum per persunas dependentas da drogas. En il chantun Lucerna vegn ina tala purschida schizunt realisada da la baselgia catolica (lavur sin via da la baselgia) en il senn da l'amur per il proxim.

En il chantun Grischun n'è la politica da drogas strusch sa sviluppada vinavant durant ils ultims 20 onns. L'uniun per l'agid da survivenza porscha in post da contact e da consultaziun, nua che persunas a l'ur da la societad ch'èn bain en gamba (!) chattan in suttetg ed in past. En l'ambulatori Neumühle pon persunas fermamain dependentas da drogas vegnir tractadas cun opioids sco diafin (heroin), metadon ed ulteriurs medicaments. En ils servetschs psichiatrics dal Grischun stattan ultra da quai a disposiziun plazzas da terapia. Percunter manca dal tuttafatg la purschida d'in local da consum.

Las consequenzas per la sanadad e per la societad (indebitament, decadenza, esser senza dachasa, infecziuns, COPD e.u.v.) pervia dal consum da drogas malnettas chaschunan custs orrents per il sectur da sanadad e per las vischnancas, augmentan la miseria, isoleschan las persunas pertutgadas e procuran regularmain per mortoris. Ultra da quai vegn engrevgià fermamain il spazi public tras polluziun, tras la vendita publica da drogas, tras il consum en la publicitad e tras ils utensils da quest consum che vegnan laschads enavos. Cun ina purschida accumpagnanta en furma d'in post da contact cun in local da consum pon vegnir cuntanschidas, sco che las experientschas dals chantuns menziunads sco exempels mussan, distgargias e meglieraziuns en tut quests secturs.

Perquai incumbenseschan las sutsegnadras ed ils sutsegnaders la regenza cun la suandanta mesira:

  • stgaffir e garantir in u plirs posts da contact e da consultaziun cun in local da consum per persunas dependentas da drogas en il chantun Grischun.

Cuira, ils 4 da december 2018

Rettich, Caluori, Hohl, Atanes, Berther, Bettinaglio, Bigliel, Bondolfi, Brandenburger, Brunold, Buchli-Mannhart, Cahenzli-Philipp, Casty, Cavegn, Caviezel (Cuira), Censi, Clalüna, Danuser, Degiacomi, Della Cà, Deplazes (Cuira), Deplazes (Rabius), Dürler, Ellemunter, Epp, Fasani, Felix, Florin-Caluori, Gasser, Geisseler, Giacomelli, Gugelmann, Hardegger, Hartmann-Conrad, Hitz-Rusch, Hofmann, Holzinger-Loretz, Horrer, Jenny, Jochum, Kappeler, Kienz, Kohler, Kunfermann, Lamprecht, Locher Benguerel, Maissen, Märchy-Caduff, Marti, Michael (Castasegna), Müller (Favugn), Natter, Niggli-Mathis (Grüsch), Noi-Togni, Papa, Perl, Pfäffli, Preisig, Rüegg, Salis, Schneider, Schwärzel, Tanner, Thomann-Frank, Thöny, Thür-Suter, Tomaschett-Berther (Trun), Ulber, von Ballmoos, Wellig, Widmer (Favugn), Widmer-Spreiter (Cuira), Wieland, Wilhelm, Zanetti (Sent), Zanetti (Landquart), Bürgi-Büchel, Decurtins-Jermann, Gujan-Dönier, Spadarotto

Resposta da la regenza

En la politica da drogas s'orientescha il Grischun a la strategia naziunala davart la dependenza ed al model cumprovà da 4 pitgas: "prevenziun, terapia/reintegraziun, reducziun da donns/agid da survivenza e repressiun". Ina purschida da prevenziun da toxicomania e d'agid en cas da toxicomania che correspunda al basegn vegn messa a disposiziun en il chantun sin basa da la lescha davart l'agid per persunas toxicomanas en il chantun Grischun (DG 500.800).

Las suandantas purschidas èn avant maun en il chantun en ils secturs terapia/reintegraziun e reducziun da donns/agid da survivenza:

-    Per incumbensa dal chantun maina l'uniun per l'agid da survivenza dal Grischun in post da contact e da consultaziun a Cuira. Quel porscha – ultra da la structura dal di e da la cussegliaziun nunbirocratica – er in dormitori d'urgenza ed ina cuschina per persunas senza tetg e per persunas basegnusas. Plinavant porscha l'uniun ina intermediaziun da lavur, in abitar assistì ed in accumpagnament extern d'abitar. Sin tut l'areal da l'uniun èsi scumandà da prender cun sai u da consumar alcohol e drogas illegalas.

-    L'ambulatori Neumühle a Cuira è en il Grischun il center per tractaments che sa basan sin opiats. Quels cumpiglian il tractament cun prescripziun da heroin sco er ulteriurs tractaments cun substanzas da substituziun. Ultra da quai vegnan mess a disposiziun in tractament ed in'assistenza medicala, curativa e psicosociala sco er ina cussegliaziun per dumondas da dependenza.

-    Ils servetschs psichiatrics dal Grischun (SPGR) porschan plazzas da terapia per persunas cun dependenzas, en spezial en il center da dependenza Danis da la clinica Beverin a Cazas.

-    Il servetsch social per dumondas da dependenza a Cuira ed ils servetschs socials regiunals en las ulteriuras regiuns dal chantun porschan ina cussegliaziun per dumondas da dependenza ed ina cussegliaziun sociala per persunas pertutgadas e per lur confamigliars.

-    Per incumbensa dal chantun porscha la Crusch blaua dal Grischun ina cussegliaziun spezialisada en cas d'ina dependenza d'alcohol per persunas pertutgadas e per lur confamigliars.

La scena da drogas sa mida permanentamain. La scena visibla en il parc municipal da la citad da Cuira è enconuschenta. Là sa trategnan differentas gruppas d'umans cun in problem da dependenza. Per l'ina èn quai umans che han en emprima lingia ina dependenza d'alcohol. En cas excepziunals n'han questas persunas nagin suttetg e vegnan tgiradas per regla gia dapi in tschert temp dal servetsch social per dumondas da dependenza, da la Crusch blaua, da l'uniun per l'agid da survivenza u dal medi da chasa. Per l'autra sa tracti d'umans che fan ina terapia da substituziun e che consumeschan supplementarmain substanzas legalas u illegalas. Pervia da lur malsogna da dependenza vegnan questas persunas accumpagnadas en dumondas medicinalas, terapeuticas u psicosocialas – almain per part – dal servetsch social per dumondas da dependenza, da l'uniun per l'agid da survivenza, da l'ambulatori Neumühle u d'in medi da chasa. La finala datti anc ina gruppa d'umans che refusa las purschidas da sustegn avant maun, sajan quai terapias, cussegliaziuns per dumondas da dependenza, lavur sociala, purschidas nunbirocraticas da structuras dal di u autras purschidas d'agid. En cas da las duas gruppas da persunas menziunadas sco ultimas han ins constatà en circuls d'expertas e d'experts (uniun per l'agid da survivenza, servetsch social per dumondas da dependenza, ambulatori Neumühle, polizia) in augment dal consum da cocain en il parc municipal durant ils ultims onns. Il consum da cocain chaschuna adina puspè ina "atmosfera da tensiun" en la scena ed i vegnan constatads tar las persunas pertutgadas adina pli savens problems da sanadad e socials pervia da la malsogna da dependenza. Ina survista cumpletta dals problems e da la situaziun actuala en tut il chantun n'exista però betg.

Experientschas concernent posts da contact e da consultaziun che han in local da consum èn fin ussa avant maun mo da las citads pli grondas sco per exempel Basilea, Turitg, Berna u Lucerna. In rapport dal chantun Basilea-Citad – che ha ina politica da drogas cumplessiva, lantschada gia l'onn 1991 – mussa che posts da contact e da consultaziun per persunas dependentas da drogas na chaschunan betg ch'il commerzi ed il consum da drogas illegalas svaneschan dal tuttafatg dal spazi public. Sco consequenza da quai èn vegnidas realisadas a Basilea ulteriuras mesiras en il punct da contact dals secturs reducziun da donns e repressiun. Latiers tutgan purschidas en il sectur da la lavur sociala visitanta sco p.ex. street worker (explicaziun dal concept da la politica da drogas dal chantun Basilea-Citad, rapport da la cumissiun da sanadad e dals fatgs socials dal cussegl grond, zercladur 2002). Sin basa da las experientschas ch'èn vegnidas fatgas en las citads numnadas qua survart stoi vegnir examinà, sche "posts da contact e da consultaziun per persunas dependentas da drogas" èn per il Grischun ina soluziun che maina a la finamira e ch'è realisabla. En spezial ston vegnir sclerids ils lieus pussaivels, ils gestiunaris pussaivels, ils custs ch'èn da spetgar ed eventualas alternativas. Eventualas mesiras per meglierar la situaziun da persunas dependentas da drogas ston vegnir adattadas al context dal chantun Grischun, per ch'ellas possian sviluppar lur effect. Cun elavurar talas mesiras stuessan vegnir observadas tut las quatter pitgas da la politica da drogas.

Sa basond sin questas consideraziuns propona la regenza al cussegl grond da midar questa incumbensa sco suonda:

Integrond ils acturs relevants e las persunas decisivas (en spezial persunas pertutgadas, persunas da la cussegliaziun e da la terapia per dumondas da dependenza, da la lavur sociala, da la lavur cun giuvenils e da la polizia) elavura la regenza entaifer ils proxims 12 mais in rapport davart la situaziun vertenta e davart il basegn d'agir pussaivel cun recumandaziun e cun lur custs.

27 da favrer 2019