Navigaziun principala

Cuntegn da la pagina

Incumbensa Collenberg concernent l'adattaziun da las disposiziuns executivas tar la lescha d'ustaria (DG 945.110)

Sessiun: 12.02.2019

Tenor l'art. 12 da las disposiziuns executivas tar la lescha d'ustaria (DG 945.110) ston dumondas da survegnir ina permissiun per il commerzi en detagl cun bavrondas destilladas vegnir inoltradas a l'uffizi per la segirezza da victualias e per la sanadad d'animals avant l'avertura u la surpigliada d'in manaschi u avant la realisaziun d'ina occurrenza. A questa procedura èn sutta­messas er occurrenzas pitschnas cun paucas visitadras e paucs visitaders. Per exempel dovri ina permissiun per ina pitschna festa dal vitg. Medemamain pertutgadas da la procedura èn societads da musica u uniuns da chant che offran savens anc ba­vrondas suenter lur concerts.

En bleras vischnancas dal chantun Grischun organiseschan uniuns – cun agid da bleras persunas voluntaras – occurrenzas e gidan uschia a promover la cultura e la convivenza. Las occurrenzas èn multifaras ed han er grondezzas fitg differentas. L'or­ganisaziun d'occurrenzas è savens ina sfida finanziala per las uniuns. Las organisaturas ed ils organisaturs ston sa fatschentar cun bleras dumondas e cun blers custs, sco per exempel la segirezza. Bleras occurrenzas pon perquai vegnir realisadas mo cun agid da sponsurs e da donaturs. Pervia da la lavur, pervia da las sfidas finanzialas e pervia dals obstachels birocratics datti adina damain persunas ch'èn prontas da s'engaschar en uniuns a favur d'occurrenzas. Quest svilup ha consequenzas negativas per il chantun Grischun cun sia cultura multifara e per la convivenza.

Las uniuns èn perquai engraziaivlas, sche obstachels e custs birocratics vegnan reducids. In obstachel birocratic e char è la procedura per survegnir la permissiun da realisar in'occurrenza tenor las disposiziuns executivas tar la lescha d'ustaria.

Las sutsegnadras ed ils sutsegnaders incumbenseschan perquai la regenza:

1.     da liberar occurrenzas pitschnas che vegnan organisadas d'uniuns, da l'obligaziun da dumandar ina permissiun per il commerzi en detagl cun bavrondas destilladas

2.     u d'abolir las taxas da procedura per las uniuns.

Cuira, ils 12 da favrer 2019

Collenberg, Brunold, Epp, Alig, Berther, Bondolfi, Caluori, Cantieni, Casutt-Derungs, Cavegn, Crameri, Della Cà, Deplazes (Cuira), Deplazes (Rabius), Derungs, Fasani, Florin-Caluori, Föhn, Gasser, Geisseler, Hohl, Kohler, Kunfermann, Lamprecht, Loi, Maissen, Märchy-Caduff, Müller (Susch), Niggli-Mathis (Grüsch), Paterlini, Perl, Ruckstuhl, Sax, Schmid, Tomaschett (Breil), Widmer-Spreiter (Cuira), Zanetti (Sent), Zanetti (Landquart), Buchli (Tenna), Jegen, Ulber Daniel

Resposta da la regenza

Las sutsegnadras ed ils sutsegnaders èn da l'avis che la permissiun per consegnar bavrondas destilladas a chaschun d'occurrenzas tenor la legislaziun d'ustaria saja in obstachel birocratic e char. Pervia da quai pretendan els che l'obligaziun da duman­dar ina permissiun vegnia abolida per occurrenzas pitschnas organisadas d'uniuns ubain che las taxas per la procedura da permissiun vegnian abolidas per uniuns.

Per il commerzi en detagl cun bavrondas destilladas exista – tenor l'art. 41a da la lescha federala davart las bavrondas destilladas (LAlc; CS 680) – in'obligaziun da dumandar ina permissiun sco er in'obligaziun da pajar taglia. L'obligaziun da duman­dar ina permissiun e l'obligaziun da pajar taglia vegnan pia regladas en moda lianta da la confederaziun per il chantun. Sco bavrondas destilladas vala l'alcohol etilic en mintga furma (spirituosas); betg cumpigliads n'èn cunzunt gervosa e vin. Sco com­merzi en detagl vegn chapida mintga consegna da bavrondas destilladas, cun ex­cepziun da la consegna a titel betg professiunal en il circul privat.

Per tut las occurrenzas, a las qualas vegnan consegnadas bavrondas destilladas, na pon pia – sin basa dal dretg federal – vegnir fatgas naginas excepziuns da l'obli­ga­ziun da dumandar ina permissiun. Insumma fiss in tractament spezial different d'uniuns e d'occurrenzas pitschnas ordvart problematic areguard la permissiun per motivs da l'egualitad giuridica. Dal rest saja menziunà che las disposiziuns davart las bavron­das destilladas servan cunzunt er a la prevenziun da dependenzas.

Areguard il giavisch alternativ (aboliziun da las taxas da procedura per uniuns) stoi vegnir menziunà ch'i sto vegnir incassada ina taglia sin bavrondas destilladas e che l'autezza da tala sa drizza tenor il gener e tenor l'impurtanza dal manaschi (art. 41a al. 6 LAlc). La summa ch'è da pajar è ina taglia (e betg ina taxa) e sto vegnir incas­sada tenor ils criteris da la confederaziun. Tenor l'art. 17 da la lescha d'ustaria per il chantun Grischun (LU; DG 945.100) vegn la taglia incassada correspundentamain tar ils manaschis sin basa da las quantitads cumpradas, e per occurrenzas vegn in­cassada mo ina pauschala da maximalmain 200 francs. Tenor la pratica vegn incas­sada per occurrenzas pli pitschnas ina summa pauschala minimala da 50 francs. Taxas per la procedura d'incassament e da permissiun per cuvrir ils custs administra­tivs na vegnan betg messas a quint, perquai ch'ils custs per las incumbensas chan­tu­nalas en il sectur da las bavrondas destilladas van a quint dals retgavs da las taglias. I na resta pia nagin spazi per incassar taxas. Dal retgav net restant vegn duvrà 1/3 per intents d'utilitad publica e 2/3 per la promoziun dal turissem (art. 18 LU).

Sin fundament dal dretg federal n'è ina liberaziun cumpletta da la taglia pia betg pus­saivla. Ed anc sche quai fiss pussaivel, na fiss ina liberaziun mo d'uniuns betg cum­patibla cun la prescripziun da l'egualitad giuridica, cunquai ch'er autras organisaturas ed auters organisaturs realiseschan occurrenzas pitschnas. Ultra da quai stuessi ve­gnir desistì d'ina renunzia a la taglia u d'ina ulteriura reducziun da tala cunzunt per motivs da la prevenziun da dependenzas.

I duai anc vegnir menziunà che la procedura concernent la permissiun per il com­mer­zi en detagl e concernent l'imposiziun da la taglia è ina procedura fitg concisa. La du­monda da permissiun vida per il commerzi en detagl vegn consegnada da la visch­nanca ensemen cun la dumonda per ina permissiun da manar in'ustaria. La dumon­da sto vegnir emplenida ed inoltrada a l'uffizi per la segirezza da victualias e per la sanadad d'animals. Lura vegn concedida la permissiun cun l'imposiziun da la taglia per l'occurrenza u per l'onn current. Gia cun la revisiun da la LU per il 1. da schaner 2008 èsi vegnì tegnì quint commensuradamain da la distgargia administrativa en il sectur da las bavrondas destilladas. En il rom da las finamiras dad e-government vegn er questa procedura da permissiun a far part da la liquidaziun da process d'autoritads che vegn ad avair lieu sin via electronica e senza palpiri.

Sa basond sin questas consideraziuns propona la regenza al cussegl grond da refu­sar questa incumbensa.

18 d'avrigl 2019