Ils ultims onns ha la regenza fatg diever da sia libertad d'agir per evitar e per eliminar ina birocrazia e reglamentaziun nunnecessaria. Las mesiras ch'èn vegnidas prendi­das fan effect, e quai betg pir dapi ch'il "artitgel da birocrazia" è vegnì relaschà l'onn 2012. Numerusas regulaziuns ch'èn relevantas per l'economia sa basan però sin la legislaziun federala e na pon betg vegnir influenzadas directamain dal chantun. Quai è vegnì consolidà gia durant la sessiun d'october 2015 en il rom da las debattas da­vart l'incumbensa Epp concernent la deregulaziun e las distgargias administrativas sco er davart la dumonda Felix concernent l'effect dal "artitgel da birocrazia", art. 84 al. 4 da la constituziun chantunala. En connex cun la dumonda Claus concernent la limitaziun temporara da relaschs (sunset legislation) e l'examinaziun dal dumber da regulaziuns inoltrada durant la sessiun d'october 2016 ha la regenza constatà, ch'il chantun haja prendì differentas mesiras per garantir la durabilitad da l'acziun "EFLAD" ch'è vegnida realisada avant ca. 20 onns: En spezial l'examinaziun prelimi­nara obligatorica da tut ils projects chantunals legislativs areguard l'observaziun dals princips dal EFLAD, il relasch da directivas legislativas cun prescripziuns formalas e materialas per ina buna legislaziun e la purschida d'ina scolaziun e furmaziun supple­mentara giuridica per tut las collavuraturas e tut ils collavuraturs che s'occupan da projects legislativs. Vi da quai n'è sa midà nagut. Plinavant vegn realisada per mintga project legislativ ina valitaziun da las consequenzas da la regulaziun (VCR), e la re­genza giuditgescha en il rom d'ina examinaziun speziala da la necessitad che vegn fatga al cumenzament da mintga project legislativ, sch'i basegna ina regulaziun. Ultra da quai datti tar l'uffizi per economia e turissem in spurtegl unic per domiciliaziuns ed expansiuns. L'incumbensa Crameri concernent la simplificaziun e l'acceleraziun da la procedura per la permissiun da construcziun è vegnida exequida en la sessiun d'october 2018 (revisiun da la LPTGR). Cun la digitalisaziun, en spezial cun l'e-government, vegn persequitada vinavant la finamira da simplifitgar e da concen­trar las proceduras ed ils contacts cun las autoritads. Sin fundament da sia respon­sabladad directiva incumbensescha la regenza ultra da quai adina cler e net l'admi­nistraziun da far diever activamain da las pussaivladads da la deregulaziun e da la debirocratisaziun.

Tar la dumonda 1: La regenza è fitg conscienta da la tematica. Sco menziunà ve­gnan prendidas mesiras, sche la libertad d'agir è avant maun. Er ils uffizis sa stentan d'agir e d'operar en moda nunbirocratica. L'index da libertad dad Avenir Suisse è dal rest adattà mo limitadamain sco indicatur per questa tematica. 10 da 17 indicaturs economics mesiran valurs directivas da la politica fiscala e finanziala che la regenza na po betg influenzar directamain. Ultra da quai sa preschenta noss chantun fitg bain tar blers indicaturs ch'èn relevants per la regulaziun, p.ex. tar la regulaziun dal mar­tgà da lavur, tar la durada fitg curta da la procedura per la permissiun da construc­ziun, tar la decentralisaziun u tar il dumber d'emploiadas e d'emploiads dal chantun. Intgins puncts tutgan tar l'autonomia da las vischnancas (scumond dal consum d'al­cohol, uras d'avertura da las fatschentas), entant che auters resultan da debattas po­liticas (taglia da baselgia per interpresas, monopols chantunals). Tenor il studi scien­tific "Mesiraziun da la qualitad da la legislaziun en il chantun Grischun" dal zercladur 2015 è noss chantun – en cumparegliaziun cun il rest da la Svizra – restrictiv en con­nex cun il relasch e cun la midada da leschas e d'ordinaziuns. El ha relativamain paucas regulaziuns, ed er areguard l'activitad regulatorica è el sut la media dals chantuns svizzers. Quest success sa basa sin ina cultura da legislaziun che vegn sviluppada dapi blers onns cun agid d'instruments per garantir la qualitad e ch'è caracterisada da retegnientscha e d'autorestricziun.

Tar las dumondas 2 e 3: Qua vegni renvià als instruments menziunads qua survart. La regenza vegn a procurar vinavant che la concepziun e la realisaziun da las dispo­siziuns legalas sajan favuraivlas per l'economia.

Tar la dumonda 4: I dat differentas pussaivladads per franar regulaziuns (cf. rapport dal cussegl federal per ademplir il postulat Caroni, 15.3421). L'evaluaziun da talas pussaivladads, er da "one-in-one-out" (OIOO), è fitg cumplexa, dovra bler temp e chaschuna gronds custs. La regenza applitgescha in sistem simpel ed efficazi che duai vegnir mantegnì consequentamain. En il rom da l'execuziun da dretg federal datti dentant clers cunfins. Sin fundament dal rapport menziunà na poi er betg vegnir ditg, schebain il chantun cuntanschess las finamiras cun OIOO. En quai che pertutga la confederaziun avess OIOO bain in tschert effect, ma ils effects secundars u ils privels fissan considerabels.

18 d'avrigl 2019