Sa referind a las prescripziuns da la confederaziun en l'art. 20 da la lescha federala davart l'eliminaziun dals dischavantatgs envers persunas cun impediments dals 13 da december 2002 (lescha davart l'egualitad da persunas cun impediments, LImp; CS 151.3) sco er suenter avair fatg emprovas en il rom dals projects da pilot a Tavau ed a Tusaun è vegnida concludida la realisaziun integrativa da las mesiras da la pe­dagogia speziala, ch'è vegnida francada en la lescha davart las scolas popularas dal chantun Grischun dals 21 da mars 2012 (lescha da scola; DG 421.000). La promo­ziun integrativa tutga tar las mesiras simplas che vegnan garantidas e realisadas dals purtaders da la scola regulara sin basa da l'art. 47 al. 1 da la lescha da scola ed ordinadas tenor l'art. 48 al. 1 da la lescha da scola. Sa referind a la realisaziun da l'incumbensa Claus concernent la reintroducziun da la classa d'introducziun sco er da l'incumbensa Michael (Donat) concernent la cumpetenza e l'egualitad da las fur­mas da la scolaziun en il sectur simpel da la pedagogia speziala pretenda la dumon­da qua avant maun in'analisa da la situaziun da la "realisaziun da la promoziun inte­grativa" en la scola populara grischuna. En connex cun la realisaziun da questas duas incumbensas Claus e Michael (Donat) ha l'uffizi per la scola populara ed il sport (uffizi) laschà far in'expertisa giuridica per incumbensa dal departament d'educaziun, cultura e protecziun da l'ambient (DECA). Avant che far ils proxims pass ston vegnir spetgads ils resultats da questa expertisa.

Davart las singulas dumondas po la regenza prender las suandantas posiziuns:

Tar la dumonda 1: Dapi l'entrada en vigur da la lescha da scola il 1. d'avust 2013 sustegna l'uffizi ils purtaders da scola tar la realisaziun da la lescha da scola incl. da las mesiras simplas da la pedagogia speziala en il rom da las structuras regularas. Da menziunar èn en spezial l'infurmaziun currenta davart las prescripziuns chantu­nalas, la cussegliaziun en cas da dumondas avertas, l'accumpagnament da l'ulteriur svilup da la scola al lieu sco er – en cas da basegn – il scleriment da cas singuls tras ils posts spezialisads da l'uffizi, particularmain tras l'inspecturat da scola e tras il ser­vetsch psicologic da scola. Sin basa da la lescha da scola e sin fundament da l'ap­profundaziun specifica cun las parts participadas davart differents temas da l'inte­gra­ziun èn resultadas directivas ed agids da realisaziun che gidan fin oz ils purtaders da scola a realisar ed a sviluppar vinavant cuntinuadamain lur purschidas. Tras il pro­cess da cussegliaziun da vart dals posts spezialisads da l'uffizi survegnan ils singuls purtaders da scola d'ina vart sustegn tar la realisaziun; da l'autra vart vegnan els rendids attents en cas da basegn ad adattaziuns necessarias ed a secturs da svilup. Questa cussegliaziun vegn cumplettada tras la surveglianza, che controllescha, sche las disposiziuns legalas vegnan observadas. In'analisa da la situaziun en il senn pli stretg n'è betg stada necessaria fin ussa en vista a quests fatgs. En il rom da la pro­xima revisiun parziala da la lescha da scola duai vegnir sclerì, sch'igl è necessari d'examinar la realisaziun da l'integraziun. En tge dimensiun, en tge furma e cun tge meds ch'ina tala examinaziun po e duai avair lieu en cas da basegn, sto vegnir decidì cur ch'igl è uschè lunsch.

Tar la dumonda 2: L'observaziun da las prescripziuns legalas en il sectur simpel da la pedagogia speziala è chaussa dals singuls purtaders da scola. Per ademplir lur obligaziuns en il sectur simpel da la pedagogia speziala survegnan els il sustegn da differents posts spezialisads tenor l'art. 91 da la lescha da scola. Latiers tutgan las visitas da surveglianza regularas, il giudicament e la promoziun da la scola populara sco er l'infurmaziun e la cussegliaziun da las direcziuns da scola e da las persunas d'instrucziun. En cas da reclamaziuns da vart da las persunas responsablas per l'educaziun vegn examinada la situaziun al lieu e vegnan eventualmain instradads pass correspundents. En il rom da la surveglianza examinescha l'inspecturat da scola, sch'ils singuls purtaders da scola observan las disposiziuns da la lescha da scola. Tar il DECA n'èn avant maun naginas annunzias da surveglianza correspun­dentas da vart da la surveglianza da scola. Uschia pon ins partir dal fatg ch'ils pur­taders da scola observian las disposiziuns legalas.

14 d'avust 2019