Cuntegn da la pagina

Dumonda Wilhelm concernent la surdada directa dals provisoris dal convict

sessiun: 13.06.2019

La construcziun e la locaziun dals provisoris en connex cun la sanaziun dal convict custan circa 2,6 milliuns francs. Schebain che questa summa surpassa cleramain la limita superiura ch'è vegnida fixada en l'art. 14 da la lescha da submissiun per ina surdada directa (0,3 milliuns francs), n'è l'incumbensa betg vegnida publitgada, mabain vegnida surdada directamain ad ina firma. En l'emissiun "Schweiz aktuell" dals 18-03-2019 metta il spezialist Peter Hettich, professer da dretg public a l'universitad da Son Gagl, en dubi che – tenor l'art. 3 da l'ordinaziun chantunala da submissiun – i deva avunda motivs legitims per ina surdada directa dals provisoris. En il rapport da medias menziunà ha ina posiziun da la regenza davart las reproschas mancà, empè da quai ha l'administraziun prendì posiziun.

Per quest motiv supplitgeschan las sutsegnadras ed ils sutsegnaders la regenza da respunder las suandantas dumondas:

1.     Pertge n'è la regenza betg s'exprimida en il rom dal rapport surmenziunà davart la dumonda da la surdada directa dals provisoris dal convict?

2.     Tge tenuta ha la regenza pertutgant las reproschas da l'expert prof. Hettich, il qual ha mess en dubi la legalitad da la surdada directa per construir e per dar en locaziun ils provisoris en connex cun la sanaziun dal convict?

3.     Quant savens èn vegnidas surdadas durant ils ultims 5 onns incumbensas chantunalas appellond a las disposiziuns excepziunalas per la surdada directa, schebain che la summa admessa era surpassada? Tge incumbensas concretas èn eventualmain stadas pertutgadas da quai e co è vegnida motivada la surdada directa?

4.     Ha la regenza – en connex cun incumbensas futuras en la dimensiun da passa 300 000 francs – l'intenziun d'interpretar las disposiziuns excepziunalas per la surdada directa en moda pli restrenschida?

5.     È er la regenza da l'opiniun ch'ina interpretaziun generusa da las disposiziuns excepziunalas per ina surdada directa (sco en il cas dals provisoris dal convict) frainian la concurrenza e l'innovaziun e promovian la ristga ch'il chantun favuriseschia en moda betg tolerabla singulas firmas?

Puntraschigna, ils 13 da zercladur 2019

Wilhelm, Bigliel, Bettinaglio, Atanes, Baselgia-Brunner, Cahenzli-Philipp, Caluori, Caviezel (Cuira), Della Cà, Deplazes (Cuira), Dürler, Felix, Flütsch, Gasser, Hofmann, Holzinger-Loretz, Horrer, Kappeler, Locher Benguerel, Müller (Susch), Müller (Favugn), Niggli (Samedan), Niggli-Mathis (Grüsch), Noi-Togni, Perl, Preisig, Rettich, Rutishauser, Schwärzel, Stiffler, Thöny, von Ballmoos, Waidacher, Widmer (Favugn), Pajic

Resposta da la regenza

Ils alloschis provisorics èn ina part dal project general "sanaziun totala dal convict". Per la renovaziun dal convict è vegnida publitgada uffizialmain ina concurrenza selectiva per prestaziuns globalas (tenor la cunvegna da la OMC davart las acquisiziuns publicas) l'onn 2016. Cun il conclus dals 22 da november 2016 (prot. nr. 1026) ha la regenza surdà – cun resalva da l'approvaziun dal credit tras il cussegl grond – l'incarica per prestaziuns globalas per renovar architectonicamain il convict ad in consorzi indigen cun l'architect Pablo Horvath (project victur "Pli pauc è dapli") per l'import total da circa 24,8 milliuns francs. Questa incarica è vegnida extendida – cun il conclus da la regenza dals 8 d'avust 2017 (prot. nr. 661) – en il rom d'ina surdada directa per circa 2,7 milliuns francs, e quai per ils alloschis provisorics che vegnan duvrads temporarmain durant la sanaziun architectonica dal convict. Decisivas per questa extensiun directa da l'incarica da basa èn stadas las lavurs da coordinaziun, da preparaziun e d'installaziun che han stuì vegnir prestadas da l'impressari general en connex cun ils provisoris, sco er sia responsabladad generala per ils termins, per la qualitad e per ils custs.

Ils provisoris acquistads sin basa da locaziun èn in nov product innovativ d'in interprendider regiunal da construcziun en lain. Il lain sco material da construcziun è ecologic ed ils moduls èn d'ina auta effizienza energetica. La soluziun en furma d'ina locaziun permetta da duvrar vinavant (utilisaziun successiva) ils moduls suenter la fin da la sanaziun dal convict, e chaschuna perquai pitschens custs per il chantun. Ils scleriments pertutgant il martgà, ch'il chantun aveva fatg quella giada, han mussà ch'il nov product è cleramain pli favuraivel che la locaziun da containers d'abitar tradiziunals. La persistenza giavischada dal chantun po vegnir cuntanschida exemplaricamain cun la soluziun tschernida. En il credit d'impegn da 31,4 milliuns francs ch'il cussegl grond aveva approvà per la sanaziun totala dal convict, eran cuntegnids e cumprovads ils custs per ils provisoris (guarda quint annual 2016, p. 64 ss.).

Tar la dumonda 1: Las collavuraturas ed ils collavuraturs da las medias da la televisiun svizra èn sa drizzads cun lur dumonda a l'uffizi da construcziun auta ch'è cumpetent per realisar il project. Tenor il proceder usità en connex cun dumondas da las medias ha l'architect chantunal dà las infurmaziuns en sia qualitad sco persuna da contact uffiziala da l'uffizi da construcziun auta.

Tar la dumonda 2: Resguardond tut ils aspects relevants per l'acquisiziun considerescha la regenza il proceder tschernì anc adina sco correct e giuditgescha l'extensiun da l'incarica sco correspundenta a las disposiziuns dal dretg da submissiun.

Tar la dumonda 3: Durant ils ultims 5 onns (2014-2018) ha l'administraziun chantunala realisà – tenor la statistica chantunala da surdadas e sa basond sin la disposiziun excepziunala da l'art. 3 da l'ordinaziun chantunala da submissiun (Osub; DG 803.310) – 188 giadas ina surdada directa, da la quala la summa sa chattava sur la limita per surdadas directas. Per gronda part sa tractavi d'extensiuns d'incaricas che avevan stuì vegnir surdadas al purschider oriund, pervia da dependenzas entaifer il project u pervia d'autras particularitads. Ma ils posts d'acquisiziun applitgeschan er las ulteriuras disposiziuns excepziunalas che figureschan en l'art. 3 Osub e ch'èn deducidas da la cunvegna da la OMC, sch'i dat in basegn motivà. Uschia pon esser relevants motivs d'urgenza (p.ex. crudada da grippa Molina-Buseno), motivs da segirezza (p.ex. indriz per detectar cun dronas en la praschun Tignez) u schelta mancanta (p.ex. retratga da sal tar las salinas svizras) per ina surdada directa che surpassa las limitas decisivas.

Tar la dumonda 4: Er en l'avegnir vegn il chantun ad examinar individualmain il tip da procedura che sto vegnir tschernì ed a fixar quel resguardond las prescripziuns dal dretg da submissiun. Las disposiziuns excepziunalas previsas dal legislatur duain vegnir applitgadas vinavant en moda restrictiva.

Tar la dumonda 5: Las regulaziuns excepziunalas dal dretg da submissiun permettan ina surdada commensurada ed adequata en cas spezials. Ellas na vegnan betg applitgadas adina dals posts d'acquisiziun, mabain appelladas en moda fitg restrictiva. Il privel da franar generalmain la concurrenza u l'innovaziun n'exista pia betg.

29 d'avust 2019