Navigation

Inhaltsbereich

Sessiun: 14.06.2019

La colonia sin l'areal Cadonau a Cuira è vegnida construida ils onns 1945/46 per las emploiadas ed ils emploiads da la clinica psichiatrica dal Grischun. Ils ultims decennis n'èn vegnidas fatgas praticamain naginas investiziuns, schebain che l'areal è en possess dal chantun. Per midar quai, ha il chantun publitgà l'avrigl 2019 ina concurrenza d'investiders. La finamira da la concurrenza d'investiders è quella da chattar in nov retschavider dal dretg da construcziun che procura per ina nova utilisaziun (d'abitar) da l'areal.

L'uffizi chantunal da construcziun auta ha pia l'intenziun da laschar surbajegiar da nov la parcella 453 tras in retschavider dal dretg da construcziun (demolind l'abitadi planisà existent da valur istorica sco er architectonica). En connex cun questa concurrenza d'investiders tschentan las sutsegnadras ed ils sutsegnaders las suandantas dumondas a la regenza:

1.     Cura ed en tge furma èn las partidas da locaziun vertentas vegnidas infurmadas davart la concurrenza d'investiders previsa?

2.     Èn ils interess da las partidas da locaziun vertentas vegnids tadlads e resguardads en il rom dal process da publicaziun da la concurrenza d'investiders? Sche gea, cura ed en tge furma? Sche betg, pertge betg?

3.     Tge finamiras persequitescha la regenza – cun la concurrenza d'investiders – per concepir ils tschains da locaziun da la nova surbajegiada? È previsa ina part obligatorica d'abitaziuns da locaziun che correspundan als criteris d'utilitad publica (cf. charta correspundenta dals purtaders da chasas d'abitar d'utilitad publica e da l'uffizi federal d'abitaziuns) sco criteri en la concurrenza d'investiders?

4.     Vegn la regenza resp. il nov investider a porscher a las partidas da locaziun vertentas (er a quellas cun contracts da locaziun limitads) – sch'i dat interess – in contract da locaziun en il nov abitadi? Sche na, pertge betg resp. pertge na fa la regenza naginas prescripziuns respectivas al nov investider?

Puntraschigna, ils 14 da zercladur 2019

Horrer, Perl, Hohl, Atanes, Baselgia-Brunner, Cahenzli-Philipp, Caluori, Caviezel (Cuira), Deplazes (Cuira), Gasser, Geisseler, Hofmann, Locher Benguerel, Müller (Favugn), Preisig, Rettich, Rutishauser, Schneider, Schwärzel, Thöny, Wilhelm, Pajic

Resposta da la regenza

Las immobiglias chantunalas servan a l'administraziun e gidan ad ademplir las incumbensas statalas (facultad administrativa) ubain furman ina investiziun finanziala (facultad finanziala). Sche las immobiglias vegnan appurtadas u transferidas en la facultad finanziala, sclerescha l'uffizi da construcziun auta (UCA) la dumonda davart la valur a media fin a lunga vista da l'immobiglia respectiva, e quai tenor sia strategia da portfolio. Fatga vegn in'appreziaziun generala dals bains immobigliars, resguardond differents criteris ed interess ord vista dal chantun (tranter auter basegn, potenzial, situaziun, productivitad, impurtanza politica). Questa procedura d'evaluaziun serva a la regenza sco basa da decisiun impurtanta per vender u er per demolir eventualmain las immobiglias examinadas. Tenor las prescripziuns dal dretg da finanzas ston immobiglias chantunalas che na vegnan betg pli duvradas vegnir consegnadas a terzs a valurs che correspundan al martgà. La decisiun d'alienar la valur da facultad tutga tar la cumpetenza definitiva da la regenza (art. 34 al. 1 da la lescha da finanzas dal chantun Grischun [lescha da finanzas; LFC, DG 710.100).

L'areal Cadonau ch'è en proprietad dal chantun, è in abitadi lartg da chasas d'ina famiglia, datescha da l'onn 1945 ed è situà al pe da la clinica Waldhaus a Cuira. Il UCA mantegna dapi onns mo pli en moda fitg reducida las immobiglias da locaziun, pervia da la valitaziun dals objects ch'è vegnida fatga en il rom da la strategia chantunala d'immobiglias, ed el na fa betg pli investiziuns che augmentan la valur vi da l'inventari. Tenor in'expertisa istoric-architecturala è l'areal in abitadi interessant pertutgant l'istorgia architectonica e sociala, che na permetta strusch ina modernisaziun tenor il standard actual, pervia da sia substanza e structura architectonica nunsuffizienta. Per l'areal che sa chatta en la facultad finanziala, ha il chantun perquai l'intenziun d'obtegnair la meglra soluziun urbanistica cun agid d'ina procedura che garantescha la qualitad, ed a medem temp d'al valurisar optimalmain.

La strategia d'immobiglias dal chantun Grischun prevesa ultra da quai da betg vender immobiglias e bains immobigliars che na vegnan betg pli duvrads, che sa chattan en buns lieus e che han potenzial u valur strategica, mabain d'als ceder en il dretg da construcziun a parts interessadas. Cun agid d'ina concurrenza d'investiders da plirs stgalims tschertga il chantun actualmain – sin basa da questas prescripziuns – parts interessadas che surpiglian en il dretg da construcziun l'areal a la Cadonaustrasse per al sviluppar vinavant.

Tar la dumonda 1: Las locatarias ed ils locataris vegnan infurmads dapi var 10 onns individualmain davart las intenziuns da surbajegiar. Ils contracts da locaziun cuntegnan perquai la remartga che las chasas vegnian dadas en locaziun favuraivlamain en lur stadi actual e ch'i na sajan previsas naginas mesiras da sanaziun, perquai che l'abitadi duaja vegnir remplazzà ils proxims onns tras ina nova surbajegiada. La primavaira 2019 ha il UCA organisà in'occurrenza d'infurmaziun, en la quala el ha orientà las partidas da locaziun davart la concurrenza d'investiders planisada e davart l'ulteriur proceder areguard ils contracts da locaziun. 

Tar la dumonda 2: La concurrenza d'investiders actuala n'ha betg l'intenziun d'ademplir preferenzas persunalas da las partidas da locaziun. La procedura da publicaziun ha la finamira da sviluppar ina surbajegiada cun in'architectura d'auta qualitad ed in'urbanistica e colonisaziun exemplarica, e da surdar il dretg da construcziun sut questas premissas al meglier offerent. Uschia vegnan resguardadas commensuradamain la responsabladad culturala architectonica dal chantun e las prescripziuns dal dretg da finanzas. 

Tar la dumonda 3: Per la part d'abitaziuns da locaziun u per la concepziun dals tschains da locaziun n'èn vegnidas definidas naginas finamiras. Talas prescripziuns èn directamain relevantas per ils tschains dal dretg da construcziun e cuntradin al dretg da finanzas vertent. Plinavant n'exista nagina basa giuridica che permettess al chantun u schizunt che l'obligass da finanziar construcziuns d'abitaziuns d'utilitad publica. 

Tar la dumonda 4: Las abitaziuns da l'abitadi che vegn realisà, vegnan purschidas da l'investider sin il martgà d'immobiglias. A mintgin statti liber da s'annunziar per ina abitaziun. I na dat naginas limitaziuns. Uschia daventa obsoleta ina prescripziun da suttametter obligatoricamain in contract da locaziun a las partidas da locaziun vertentas.

29 d'avust 2019