Cuntegn da la pagina

Incumbensa Kohler concernent il mecanissem per las vischnancas per cumpensar il minus d'entradas fiscalas chaschunà da la RFFA

sessiun: 22.10.2019

En la sessiun d'avust 2019 ha il cussegl grond tractà la revisiun parziala da la lescha da taglia per il chantun Grischun. Quest project sa basa sin in'adattaziun da la lescha chantunala da taglia a la nova armonisaziun dal dretg fiscal federal e prevesa tranter auter ina reducziun da las taglias sin il gudogn per persunas giuridicas. Il minus d'entradas fiscalas che resulta da quai pertutga er las vischnancas.

Durant la procedura da consultaziun han il cussegl naziunal ed il cussegl dals chantuns midà l'art. 196 al. 1bis LTFD, che prevesa ch'ils chantuns indemniseschian adequatamain las vischnancas. Cun la concepziun concreta dal project RFFA propona la regenza dal chantun Grischun che l'indemnisaziun vegnia prestada sur la gulivaziun da resursas en il rom da la gulivaziun da finanzas chantunala. Questa midada da la basa da calculaziun per la gulivaziun da resursas vegn tractada dal cussegl grond pir pli tard.

En la missiva scriva la regenza: "La cumpensaziun sur la gulivaziun da finanzas demussa en general, sch'ins resguarda tut las vischnancas, il resultat giavischà. Ma ella n'ha nagin connex direct cun il minus d'entradas fiscalas d'ina singula vischnanca che resulta da la reducziun da la taglia sin il gudogn." L'indemnisaziun da las vischnancas sto però avair – tenor il project federal – in connex direct cun il minus d'entradas fiscalas tenor il project RFFA e las vischnancas pertutgadas duessan vegnir indemnisadas per lur minus d'entradas fiscalas tenor in model ch'è d'elavurar da nov.

Per ina realisaziun differenziada dal dretg federal incumbensain nus la regenza sco suonda:

Al cussegl grond sto vegnir preschentada ina proposta che prevesa l'indemnisaziun tenor l'art 196 al. 1bis LTFD a favur da mintga vischnanca annualmain en la relaziun da ses minus concret d'entradas fiscalas pervia da la reducziun da la tariffa da la taglia sin il gudogn da 5,5% a 4,5% (art. 87 al. 1 LT) cun ils minus concrets d'entradas fiscalas da tut las vischnancas pervia da questa reducziun da la tariffa da la taglia sin il gudogn.

L'indemnisaziun sto vegnir calculada mintga onn da nov sin basa dal minus effectiv d'entradas fiscalas pervia da la reducziun menziunada da la tariffa da la taglia sin il gudogn per vischnanca sco er da la mesadad dal plus effectiv d'entradas fiscalas dal chantun che deriva da la taglia federala directa. Uschenavant che quai è necessari, sto vegnir suttamessa al cussegl grond in'adattaziun correspundenta da la lescha davart la gulivaziun da finanzas intercommunala (LGF).

Sche quai è util tenor l'avis da la regenza, sto vegnir proponì in model da durada limitada che vegn remplazzà, sche ses temp è passà, tras ina cumpensaziun sur la gulivaziun da resursas.

Cuira, ils 22 d'october 2019

Kohler, Marti, Aebli, Berther, Berweger, Caluori, Casty, Cavegn, Caviezel (Tavau Clavadel), Crameri, Ellemunter, Florin-Caluori, Giacomelli, Hardegger, Hitz-Rusch, Kienz, Kunfermann, Lamprecht, Märchy-Caduff, Natter, Papa, Ruckstuhl, Rüegg, Schneider, Thür-Suter, von Ballmoos, Widmer (Favugn), Zanetti (Sent)

Resposta da la regenza

Cun la lescha federala davart la refurma fiscala e la finanziaziun da la AVS (RFFA) ch'è vegnida acceptada dal suveran ils 19 da matg 2019 e messa en vigur per il 1. da schaner 2020 ha il legislatur surpiglià l'art. 196 al. 1bis en la lescha federala davart la taglia federala directa (LTFD; CS 642.11). Tenor questa disposiziun vegnan ils chan­tuns obligads d'indemnisar las vischnancas adequatamain per las perditas che resul­tan da la RFFA. La concepziun concreta da questa indemnisaziun surlascha il legis­latur federal als chantuns.

Cun realisar la RFFA en il dretg chantunal ha la regenza proponì – suenter avair tschertgà intensivamain in model adattà – da far questa indemnisaziun sur la guli­vaziun da finanzas intercommunala, uschia ch'i n'è betg necessari da midar ina lescha (missiva tar la revisiun parziala da la lescha chantunala da taglia, carnet nr. 3 / 2019 – 2020, p. 82 ss.). Questa proposta è vegnida discutada qua e là en la debat­ta dal cussegl grond, è però restada senza cuntraproposta, uschia che l'indemnisa­ziun vegn a vegnir realisada a partir da l'onn da gestiun 2021 sur la gulivaziun da finanzas intercommunala, concretamain sur in augment dals meds finanzials per la gulivaziun da resursas da var 7 milliuns francs.

L'incumbensa Kohler pretenda ina indemnisaziun sin basa dal minus effectiv tar las entradas pervia da la reducziun da la taglia sin il gudogn. Ella sa basa sin ina con­templaziun statica e survesa che l'intent da la reducziun da la taglia sin il gudogn è oravant tut stada quella da mantegnair interpresas existentas, da pussibilitar ulteriu­ras investiziuns da questas interpresas ed (en ina dimensiun pli pitschna) dad attrair novas interpresas. In engrondiment considerabel d'ina interpresa existenta u la domi­ciliaziun d'ina nova interpresa cun gudogns considerabels e cun taglias sin il gudogn relevantas avess ussa per consequenza che minus d'entradas betg avant maun stuessan vegnir cumpensads er sin quests gudogns supplementars. Sche tut il parc industrial "Vial" vegniss per exempel occupà ils proxims onns, chaschunass quai in spustament marcant vers Domat dals meds totals ch'èn da distribuir or da la taglia federala directa. Il medem vala per las societads da domicil, per las societads da holding e per las societads maschadadas ch'existan oz e che perdessan lur status fiscal privilegià. Sche questas interpresas, ch'èn per gronda part domiciliadas a Cuira, duessan mantegnair lur sedia en il lieu actual e pajar da nov la taglia sin il gudogn cumplainamain a Cuira, stuessan vegnir prestads pajaments d'indemnisa­ziun er sin questas taglias sin il gudogn supplementaras. Quest spustament da las entradas supplementaras or da la taglia federala directa sin ils lieus d'interpresas ferms refusa la regenza. El n'è ni materialmain correct ni vulì dal legislatur federal.

La cumpensaziun finanziala tranter las vischnancas succeda sur la gulivaziun da finanzas. La lescha davart la gulivaziun da finanzas en il chantun Grischun (DG 730.200) è vegnida messa en vigur il 1. da schaner 2016 en la furma actuala e vegn actualmain suttamessa ad ina controlla da l'efficacitad. Adattaziuns che fissan eventualmain necessarias per tarar en moda pli specifica la gulivaziun da resursas pon vegnir realisadas en quest rom. Ma i duai vegnir impedì ch'i vegnia stgaffì in ulteriur sistem da gulivaziun cumplitgà che chaschunass in augment da la birocrazia. La tractativa da questa fatschenta en il cussegl grond è planisada per la sessiun d'october 2020.

L'incumbensa Kohler propona sco pretensiun eventuala in model a temp limità per midar alura a la cumpensaziun sur la gulivaziun da resursas. En quest connex vegni survesì ch'i stuess pir anc vegnir stgaffida ina basa legala cun in cuntegn che n'è betg enconuschent per la regulaziun da cumpensaziun pretendida e che quella na fiss betg pronta per l'emprim onn da cumpensaziun 2021.

Pervia da quai n'è ina regulaziun transitorica betg pussaivla gia per motivs dal temp. Sa basond sin questas explicaziuns propona la regenza al cussegl grond da refusar questa incumbensa.

20 december 2019