Navigaziun principala

Cuntegn da la pagina

Dumonda Paterlini concernent la reducziun da birocrazias en ils fatgs da sanadad!

Sessiun: 22.10.2019

Dapi passa 20 onns creschan ils custs da sanadad e cun els las premias da las cassas da malsauns onn per onn en l'entira Svizra. Er il svilup dals custs en las chasas da persunas attempadas e da tgira enconuscha mo ina direcziun. Ils svilups generals dals salaris, l'augment da las pretensiuns da qualitad areguard la construcziun ed il manaschi sco er auters svilups chaschunan custs supplementars per las abitantas ed ils abitants da las chasas, per las cassas da malsauns e per las vischnancas.

I èn numerusas prestaziuns che ston vegnir furnidas a favur da las abitantas e dals abitants da las chasas. Bleras da quellas per­via da las revisiuns parzialas da la lescha per promover la tgira da persunas malsaunas e da las ordinaziuns appartegnentas. I dat dentant er prestaziuns che n'han nagin connex direct cun in'assistenza qualitativamain buna da las abitantas e dals abi­tants da las chasas.

Quai n'èn betg prestaziuns en il sectur da la tgira, dal servetsch da chasa e da l'hotellaria, mabain prestaziuns en l'administraziun, sco per exempel il rendaquint, la moda e maniera da la revisiun sco er mesiras per garantir la qualitad.

Tenor l'art. 27 al. 1 da la lescha per promover la tgira da persunas malsaunas sco er tenor l'art. 2 al. 1 da l'ordinaziun tar la lescha per promover la tgira da persunas malsaunas (OLTM) dal chantun Grischun ston las chasas da tgira far il rendaquint tenor ils princips da la fundaziun Swiss GAAP RRQ. Quai cumbain che questas prescripziuns èn previsas per manaschis cun passa 50 plazzas a temp cumplain, cun ina summa da bilantscha da 10 miu. e cun ina svieuta annuala da 20 miu. Tranter las 53 chasas da tgira en il chantun hai numerus manaschis pitschens che han per part main che 20 letgs e che na cuntanschan lunschor betg las grondezzas numnadas.

Sumegliant èsi cun las prescripziuns chantunalas concernent la moda e maniera da la revisiun. Tut las chasas ston far ina revisiun ordinaria. Igl è ina revisiun pli extendida e consequentamain pli chara, e quai per chasas cun main che 20 letgs! Quai cumbain ch'il dretg d'obligaziuns prescriva ina revisiun ordinaria per manaschis cun passa 50 plazzas a temp cumplain, cun ina summa da bilantscha da 10 miu. e cun ina svieuta annuala da 20 miu., sche almain duas da las grondezzas numnadas èn surpassadas.

Sut quest aspect vulan las sutsegnadras ed ils sutsegnaders savair da la regenza:

1.     Tge motivs ha la regenza d'insister sin la birocrazia numnada?

2.     Tge niz direct porta la birocrazia descritta a las abitantas ed als abitants da chasas fitg pitschnas?

3.     Tge avantatgs han las vischnancas, che ston surpigliar ils deficits, tras las prescripziuns chantunalas descrittas?

Cuira, ils 22 d'october 2019

Paterlini, Engler, Hohl, Baselgia-Brunner, Berther, Berweger, Bettinaglio, Brandenburger, Brunold, Buchli-Mannhart, Cahenzli-Philipp, Cavegn, Crameri, Danuser, Degiacomi, Della Cà, Deplazes (Rabius), Derungs, Dürler, Epp, Felix, Gartmann-Albin, Gasser (Cuira), Gort, Gugelmann, Hardegger, Hitz-Rusch, Holzinger-Loretz, Horrer, Hug, Jenny, Jochum, Kienz, Kohler, Kunfermann, Kunz (Fläsch), Kuoni, Locher Benguerel, Loepfe, Maissen, Michael (Donat), Müller (Susch), Natter, Papa, Perl, Preisig, Ruckstuhl, Rüegg, Rutishauser, Salis, Sax, Schmid, Schneider, Schutz, Thomann-Frank, Thür-Suter, Tomaschett-Berther (Trun), Ulber, von Ballmoos, Waidacher, Weber, Wellig, Widmer (Favugn), Widmer-Spreiter (Cuira), Zanetti (Sent), Fasani-Horath, Patzen, Sturzenegger

Resposta da la regenza

Ils 13 da zercladur 2008 ha l'assamblea federala concludì la lescha federala davart la reordinaziun da la finanziaziun da la tgira. Il cussegl federal ha mess en vigur questa lescha per il 1. da schaner 2011. Sin quai ha il cussegl grond concludì ils 26 d'avust 2010 ina revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas, LTM; DG 506.000). En il rom da questa revisiun parziala èn vegnidas realisadas las prescripziuns federalas sin plaun chan­tunal. Il cussegl grond ha reglà da nov la finanziaziun restanta dals custs per presta­ziuns da tgira e per prestaziuns da la tgira acuta e transitorica tras las persunas che retiran las prestaziuns sco er tras il chantun e tras las vischnancas en il sectur ambu­lant e staziunar.

Sin quai è er l'ordinaziun tar la lescha per promover la tgira da persunas malsaunas e l'assistenza da persunas attempadas e da persunas che basegnan tgira (ordina­ziun tar la lescha per promover la tgira da persunas malsaunas, OLTM; DG 506.060) vegnida suttamessa ad ina revisiun parziala. Questa revisiun parziala da la OLTM è vegnida elavurada cun la participaziun dals acturs pertutgads principalmain, numna­damain la federaziun grischuna "chasas ed ospitals" (FCO), la federaziun grischuna da spitex (FGRS), la cuminanza d'interess da las tgirunzas e dals tgirunzs diplomads che lavuran sin agen quint sco er la gruppa regiunala da la cussegliaziun per mam­mas e per babs (CMB).

En il sectur da las chasas da tgira è vegnida resguardada la gronda part dals gia­vischs inoltrads dals represchentants da la FCO. Unicamain il rendaquint ed il paja­ment mensil da las contribuziuns chantunalas da prestaziun n'han betg pudì vegnir resguardads pervia da la mancanza da resursas da persunal tar l'uffizi da sanadad. Il rendaquint ha lieu mintga quartal per tut ils furniturs da prestaziuns subvenziunabels.

En il sectur staziunar èsi stà da reglar en spezial il proceder per fixar ils custs renco­nuschids sco er las modalitads en connex cun las contribuziuns da prestaziun dal maun public. Las prescripziuns da rendaquint èn necessarias per pudair fixar resp. calcular en moda adequata ils custs renconuschids, la participaziun maximala da las abitants e dals abitants da las chasas als custs sco er las contribuziuns chantunalas e communalas da prestaziun.

Tar la dumonda 1: Dapi la reordinaziun da la finanziaziun da la tgira paja il maun public contribuziuns considerablas a favur da la finanziaziun restanta dals custs per prestaziuns da tgira e per prestaziuns da la tgira acuta e transitorica (chantun e visch­nancas) sco er a favur da prestaziuns supplementaras che sa refereschan a singuls subjects (chantun). Tras in rapport tenor Swiss GAAP RRQ e tras las pre­scripziuns da revisiun resultan ils suandants avantatgs per las vischnancas e per il chantun:

-          transparenza dals quints annuals e meglra cumparegliabladad;
-          basa fidabla per realisar il sistem da finanziaziun tenor prestaziun;
-          basa da datas necessaria per la calculaziun dals custs sco basa per fixar annualmain ils custs renconuschids, la participaziun maximala da las abitants e dals abitants da las chasas als custs sco er las contribuziuns chantunalas e communalas da prestaziun.

Tar la dumonda 2: Il niz direct per las abitantas ed ils abitants da las chasas è quel ch'ils custs restants, ch'ellas ed els ston surpigliar, vegnan calculads correctamain.

Tar la dumonda 3: Ultra dals avantatgs numnads sut il punct 1 resultan per las visch­nancas – ma er per las chasas da tgira resp. per lur purtadras – a media ed a lunga vista ils suandants avantatgs, malgrà che l'introducziun da las prescripziuns da ren­da­quint pretendidas chaschuna al cumenzament lavur e custs supplementars:

-          instrument directiv fidabel per valitar las ristgas finanzialas (situaziun da la facul­tad, da las finanzas e dal retgav);
-          standardisaziun e documentaziun da las regulaziuns e dals process (manual);
-          meglra posiziun per contractar cun ils finanziaders (assicuraders e maun public);
-          rendaquint modern cun in effect che promova correspundentamain la reputaziun.

8 da schaner 2020