L'utilisaziun da laina sco materia prima per producir energia ha ina lunga tradiziun en il chantun forestal Grischun. Cun las pussaivladads da producir electricitad or da biomassa en general ed or da laina en spezial è la Regenza s'occupada gia en il "Rapport d'electricitad 2012" (missiva da la Regenza dals 5 da zercladur 2020, carnet nr. 6/2012-2013, 309 e 349 ss.), e dapi lura è ella s'approfundada ulteriuramain en il tema.

Tar la dumonda 1: En il chantun Grischun importa la producziun d'electricitad annuala bundant 8000 uras da gigawatt (GWh). La gronda part da quellas, numnadamain quasi 98 pertschient, vegn producida cun forza idraulica. La part da la producziun d'electricitad or da biomassa resp. or da laina importa 1,5 pertschient en il Grischun. Tut en tut cuvra l'energia da laina circa 7 pertschient dal consum total d'energia dal chantun Grischun.

Tar la dumonda 2: L'onn 2015 han l'Uffizi da guaud e privels da la natira (UGP), l'Uffizi per la natira e l'ambient (UNA) e l'Uffizi d'energia e da traffic (UEnTr) incumbensà in studi per definir il potenzial d'ina producziun persistenta d'energia or da laina. Tenor quest studi importa il potenzial brut annual d'energia or da laina circa 900 GWh en il chantun e sa cumpona da laina da guaud (680 GWh), da laina da champagna (77 GWh), da laina restanta (23 GWh) e da laina duvrada (120 GWh). Da l'entir potenzial vegn duvrada oz bundant la mesadad sco laina d'energia. Uschia resta in grond potenzial da laina d'energia. Tenor il studi pudessan vegnir tratgas a niz mintga onn supplementarmain circa 420 GWh. Quai correspunda a la dubla quantitad da laina dal chantun Grischun, che la Axpo Tegra SA consumescha actualmain.

Pervia da la problematica da la pulvra fina fai senn da construir plitgunsch stabiliments pli gronds, tar ils quals lavaders da gas da chamin èn economicamain supportabels. Per pudair utilisar raschunaivlamain la chalur persa duessan ils stabiliments plinavant vegnir regulads cun chalur. Latiers tutga ina clientella fidada sco cuminanzas da stgaudament u industrias cun consum da chalur industriala.

Tar la dumonda 3: En il futur vegn la producziun d'electricitad or d'energia da laina probablamain a survegnir dapli impurtanza. Perquai che l'efficacitad electrica è vaira pitschna tar tut las metodas da producziun d'electricitad or da laina (tranter 10 – 25 pertschient da la prestaziun termica), è l'utilisaziun da la chalur persa però stringentamain necessaria – per exempel en ina corporaziun da chalur u sco chalur industriala per process d'industria – per cuntanscher in'auta efficacitad totala. Sch'ina cumbinaziun cun ina producziun da chalur exista, pudess l'utilisaziun da laina sco biomassa per producir electricitad esser interessanta per las proprietarias ed ils proprietaris da guaud resp. per las persunas che han il dretg d'utilisar il guaud. Resguardond las cundiziuns economicas èsi però da partir dal fatg, che spirs tagls da laina d'energia na dastgassan er proximamain betg esser rentabels.

Dal rest poi vegnir renvià al fatg, ch'il chantun Grischun promova finanzialmain (en il rom dals programs da promoziun tenor la Lescha chantunala d'energia dal chantun Grischun [LEG; DG 820.200]) l'utilisaziun da laina sco biomassa per producir energia resp. per prender mesiras ch'effectueschan in respargn da CO₂. Qua appartegnan stgaudaments da fessels e da pellets sco er stgaudaments da laina automatics. Plinavant vegnan concedidas contribuziuns per colliar cun ina corporaziun da chalur, sche la prestaziun da stgaudar da la corporaziun da chalur è pli gronda che 70 kW e sch'ina part d'almain 75 pertschient da questa prestaziun vegn cuvrida cun energia regenerabla.

5 da mars 2020