Il zercladur 2018 ha la Regenza deliberà la Strategia dad e-government dal Grischun 2019 fin 2023. Questa strategia furma la basa strategica per sviluppar vinavant la digitalisaziun en l'administraziun chantunala. Quai duai permetter da tgirar in contact ch'è independent dal lieu e cumadaivel per ils utilisaders cun l'administraziun e da furnir servetschs sin via automatisada ed electronica. Cun agid da las tecnologias digitalas serva la Strategia dad e-government er a render pli effizients ils process administrativs ed ad optimar la qualitad dals servetschs. La Strategia dad e-government dal Grischun sa basa sin ils princips da la Confederaziun e da la Conferenza da las Regenzas chantunalas; pia er sin las Directivas relativas a l'administraziun digitala da la Conferenza da las Regenzas chantunalas (CdC) e sin la Strategia dad e-government da la Svizra.

Dus dals champs d'acziun da la Strategia dad e-government dal Grischun concernan l'optimaziun dals process tranter las autoritads ed il barat da datas. La digitalisaziun duai accelerar ils process administrativs ed evitar da registrar pliras giadas datas electronicas ch'èn gia avant maun. L'uschenumnà princip "once-only" e l'evitar ina gestiun da datas redundanta fan medemamain part dals princips da la Strategia dad e-government dal Grischun. Quai permetta da simplifitgar las fatschentas administrativas cun la populaziun sco er cun las interpresas, d'evitar interacziuns nun-necessarias e da meglierar la qualitad da las datas. La Regenza sa stenta d'amplifitgar las prestaziuns digitalas dal chantun a favur da la populaziun e da las interpresas en moda che tegna quint dals basegns da la clientella e d'observar tenor pussaivladad il princip "once-only". Ma i sto vegnir accentuà che quai po capitar mo entaifer las limitas da las disposiziuns vertentas davart la protecziun da datas, e che per part ston anc vegnir creadas las basas giuridicas, tecnicas ed organisatoricas persuenter. 

Las administraziuns chantunalas registreschan, rimnan ed elavuran datas da tut gener, sco datas da la statistica, da la geoinfurmaziun, da l'ambient, da l'aura, da la mobilitad, da l'energia e dals bains culturals sco er da differentas publicaziuns uffizialas. Qua sa tracti da numerusas datas che na sa refereschan betg a persunas, che pon esser accessiblas gratuitamain ed a medemas cundiziuns tecnicas giuridicas e simplas per tut ils interessads, nun ch'igl existia in interess da protecziun legitim predominant. Questas datas pon vegnir elavuradas vinavant ed utilisadas da terzas persunas. La preparaziun e la publicaziun da talas datas administrativas avertas vegnan designadas sco open-government-data (OGD). I sa tracta da datas da las autoritads structuradas, libramain reutilisablas e libramain accessiblas sco er legiblas da maschinas. Tenor la Strategia OGD da la Confederaziun promova il liber access a datas administrativas la transparenza e la participaziun, rinforza la responsabladad e gida ad augmentar la creaziun da valur. Quest ultim punct duai vegnir pussibilità tras in'effizienza pli gronda da l'administraziun, cun permetter innovaziun e cun realisar novs models da fatschenta. OGD po er gidar a cuntanscher in chantun Grischun innovativ e digital.

Cun la Strategia dad e-government dal Grischun ha la Regenza gia furmà la basa per sviluppar vinavant OGD en il chantun Grischun. Questa strategia fixescha che l'access public a las datas da las autoritads vegn promovì resguardond las cundiziuns generalas legalas e la Strategia open-government-data da la Svizra 2014 fin 2018 (ch'è vegnida remplazzada tras la Strategia OGD da la Confederaziun 2019 fin 2023). Per cumplettar poi vegnir renvià a las Directivas da la CdC relativas a l'administraziun digitala, nua ch'i vegn fixà che la purschida e l'accessibladad da las datas dal maun public stoppian vegnir amplifitgadas ulteriuramain sur plattafurmas da datas interfederalas, la finanziaziun da quellas stoppia vegnir garantida e pussaivladads d'access simplas stoppian vegnir purschidas.

Cun la plattafurma opendata.swiss han la Confederaziun ed ils chantuns stgaffì ina tala plattafurma dad OGD. Sin quella vegnan colliadas cun in link e munidas cun metadatas datas structuradas e legiblas cun maschinas. Las datas sezzas na vegnan betg messas sin la plattafurma centrala, mabain restan tar il post da publicaziun respectiv. Dapi l'onn 2017 – cun la publicaziun da las datas da votaziun dal chantun sur opendata.swiss – fa il Grischun experientschas en il sectur dad OGD.

Cun realisar la Strategia dad e-government dal Grischun ed en il rom da las resursas che stattan a disposiziun sa stenta la Regenza da constituir e d'engrondir en etappas la purschida dad OGD dal chantun e da crear uschenavant sco pussaivel las premissas necessarias per quai. 

Sa basond sin questas explicaziuns propona la Regenza al Cussegl grond d'acceptar questa incumbensa.

27 da favrer 2020