L'optimaziun ed il mantegniment dal traffic public en il chantun Grischun èn da fitg gronda impurtanza. Tenor la lescha davart il traffic public en il chantun Grischun (LTP) procuran il chantun e las vischnancas ch'il chantun vegnia avert areguard il traf­fic cun meds da transport publics e creeschan impuls per che quels vegnian utilisads pli savens. La promoziun dal traffic pu­blic da persunas e dal traffic da rauba sin la viafier vul proteger l'uman e ses ambient, spargnar energia ed utilisar l'energia en moda economica sco er coordinar il traffic public e privat (art. 2 LTP).

Per cuntanscher questas finamiras èsi indispensabel da planisar a media ed a lunga vista il mantegniment e l'optimaziun dal traffic public. En quest connex stoi vegnir resguardà che la purschida dal traffic regiunal da persunas (TRP) è ina incumbensa cuminaivla dal chantun e da la confederaziun, cunquai che la confederaziun paja 80 pertschient dal TRP en il Grischun. Plina­vant vegn l'infrastructura da viafier finanziada sur il fond per l'infrastructura da viafier (FIV), e la confederaziun fixescha las prioritads en il rom dals pass da svilup (PROSSIV).

Il settember 2012 ha la regenza grischuna deliberà la missiva davart la planisaziun da novas colliaziuns da traffic (missiva NCT). Dapi lura è la mobilitad sa sviluppada vinavant rasantamain. En la missiva da quella giada aveva la regenza examinà differents projects da viafier e dividì quels en projects A, B e C. Dacurt è puspè vegnì tematisà il project B cun ina colliaziun da viafier da Scuol a Damal. La dumonda è quant enavant che midadas, ch'èn resultadas en il fratemp tar singulas cundiziuns generalas, influenzeschan las enconuschientschas da questa missiva.

Per quest motiv vegn la regenza incumbensada da suttametter al cussegl grond in rapport u da prender posiziun en il rom da la missiva tar la revisiun totala planisada da la LTP, e quai en spezial davart ils suandants puncts centrals:

I.          Svilup da la purschida entaifer ils proxims 10 onns (a media vista)
En il rom da la planisaziun a media vista prenda la regenza posiziun en spezial davart ils suandants puncts:
-      extensiun dal tact da mes'ura en il chantun Grischun tar la viafier e sin via, en spezial en direcziun dals centers regiunals;
-      ulteriur svilup e cumplettaziun dal traffic da viafier express regiunal (viafier S);
-      investiziuns necessarias en il material rullant da la Viafier retica ed en las infrastructuras per amplifitgar la purschida (p.ex. lingias cun dus binaris, staziun Cuira vest, legislaziun davart l'egualitad da persunas cun impediments);
-      tact da mes'ura tranter Cuira e Turitg ed amplificaziun da la purschida tras la Val dal Rain songagliaisa (purschida, infrastructura da viafier);
-      colliaziun directa tranter Cuira e Turitg Eroport ed en la Svizra centrala.
-      Tge pussaivladads vesa la regenza per realisar e per finanziar questas purschidas e co valitescha ella la libertad d'agir envers la confederaziun?

II.        Avertura cun novas colliaziuns da traffic (a lunga vista)
Sin basa da la missiva NCT e sco examinaziun cumplessiva da tala duai la planisaziun a lunga vista preschentar il suandant:
-      projects visiunars per ina meglra avertura dal chantun Grischun sin basa da las enconuschientschas da la missiva NCT, integrond las cundiziuns generalas actualas ch'èn sa midadas per part en la cumparegliaziun (inclusiv eventuala actualisa­ziun);
-      ulteriuras colliaziuns da viafier impurtantas cun las regiuns vischinas da la Svizra e da l'exteriur, sco la realisaziun da la Porta Alpina a Sedrun u la colliaziun da la Mesolcina cun la purschida da TILO.
-      Tge proxims pass vesa la regenza areguard las NCT e co valitescha ella la libertad d'agir envers la confederaziun sco er envers ils chantuns vischins ed envers ils pajais cunfinants?

III.     Avertura da territoris periferics sco incumbensa permanenta dal chantun (a media ed a lunga vista)
En il rom da la planisaziun a media ed a lunga vista sco incumbensa permanenta dal chantun prenda la regenza posiziun davart ils suandants puncts:
-      Avertura ed amplificaziun da la purschida dals territoris periferics che han ina pitschna relevanza economica u turistica.
-      Tge pussaivladads vesa la regenza per l'avertura fina e co valitescha ella la libertad d'agir?

Cuira, ils 4 da december 2019

Crameri, Widmer (Favugn), Engler, Alig, Atanes, Berther, Berweger, Bettinaglio, Bigliel, Brandenburger, Brunold, Buchli-Mannhart, Caluori, Cantieni, Casutt-Derungs, Cavegn, Caviezel (Cuira), Danuser, Degiacomi, Della Cà, Deplazes (Rabius), Derungs, Dürler, Ellemunter, Epp, Fasani, Felix, Florin-Caluori, Flütsch, Gasser, Geisseler, Giacomelli, Grass, Hardegger, Hartmann-Conrad, Hefti, Hitz-Rusch, Hohl, Holzinger-Loretz, Horrer, Jenny, Jochum, Kienz, Kohler, Kunfermann, Kunz (Fläsch), Kunz (Cuira), Lamprecht, Loepfe, Loi, Märchy-Caduff, Michael (Castasegna), Mittner, Natter, Niggli (Samedan), Niggli-Mathis (Grüsch), Papa, Paterlini, Perl, Pfäffli, Preisig, Rettich, Ruckstuhl, Rüegg, Rutishauser, Sax, Schmid, Schneider, Schutz, Schwärzel, Tanner, Thomann-Frank, Ulber, Waidacher, Zanetti (Sent), Zanetti (Landquart), Padrun-Valentin, Spadarotto, Tschudi