Tar la dumonda 1: Il giudicament annual davart l'influenza da la selvaschina è vegnì fatg ils onns 2017 e 2018 sco project da pilot. L'enviern 2018/2019 ha l'Uffizi da guaud e privels da la natira (UGP) duvrà quest giudicament per l'emprima giada sco basa per la communicaziun annuala da la situaziun a l'Uffizi da chatscha e pestga (UCP). La metoda sa basa sin experientschas e retschertgas da datas che vegnan fatgas e sviluppadas vinavant permanentamain dapi ils onns 1990 dal UGP e dals selviculturs da revier u d'inschigners forestals independents incaricads. Las colla­vu­raturas ed ils collavuraturs dal UCP vegnan per part integradas en las retschertgas da datas.

Il november 2019 è vegnida surdada l'incumbensa da far in'expertisa externa per examinar e per eventualmain optimar la metodica e la forza expressiva da las char­tas d'influenza. L'examinaziun è vegnida fatga en spezial resguardond las prescrip­ziuns federalas e las recumandaziuns pertutgant il giudicament davart l'influenza da la selvaschina, sco ch'ella è fixada en l'agid d'execuziun "Guaud e selvaschina" dal UFAM (2010) ed en la publicaziun "Guaud e selvaschina – princips per la pratica" (UFAM 2010). L'expertisa vegn a la conclusiun ch'il giudicament sa basa sin las pre­scripziuns federalas e ch'el ademplescha quellas. Ultra da quai vegn l'expertisa a la conclusiun – en ina preschentaziun da las fermezzas e da las deblezzas – che opti­maziuns èn pussaivlas. Actualmain vegnan talas examinadas e realisadas pass per pass.

Tar la dumonda 2: L'onn 2019 han ils resultats dal giudicament annual pudì vegnir mess a disposiziun per l'emprima giada al UCP ed a la Cumissiun da chatscha sco basa per la planisaziun da la chatscha. Questas basas per tut il chantun remplazzan successivamain las annunzias detagliadas da donns da las tschintg regiuns dal UGP. Ils resultats dal giudicament annual vegnan resguardads per fixar las cifras da prelevaziun resp. vegnan integrads en ils instruments da la planisaziun da la chatscha sco p.ex. il plan da prelevaziun (qualitativamain e quantitativamain), la determinaziun da la chatscha prioritara u las limitas d'autezza per la chatscha da chamutschs. 

Tar la dumonda 3: Tenor la lescha è la planisaziun da la chatscha obligada da te­gnair quint da la persistenza (ecologica). Tranter auter sto ella limitar sin ina dimen­siun supportabla ils donns chaschunads d'animals selvadis vi dal guaud e vi da cul­turas agriculas (art. 1 al. 1 lit. c da la Lescha federala davart la chatscha e la protec­ziun dals mamifers e dals utschels selvadis [Lescha da chatscha, LChP; CS 922.0]). Tenor l'art. 3 LChP ston ultra da quai vegnir garantidas la cultivaziun duraivla dals guauds e la regiuvinaziun natirala cun spezias da bostgs indigenas. Ils concepts da chatscha che vegnan applitgads en il Grischun sa drizzan consequentamain tenor questas obligaziuns legalas.

Tar la dumonda 4: Il giudicament annual davart l'influenza da la selvaschina è vegnì sviluppà sco basa da lavur per far la planisaziun da la chatscha sco er per eruir e per registrar donns da selvaschina en il guaud e n'è anc betg dal tuttafatg madirà. Pervia da la cumplexitad da la tematica n'èsi anc betg stà pussaivel da communitgar e da metter a disposiziun las infurmaziuns a la publicitad. Il giudicament annual davart l'influenza da la selvaschina vegn optimà e preparà tenor las recumandaziuns da l'ex­pertisa per al pudair metter a disposiziun en il futur en furma chapaivla a la publi­citad.

Tar la dumonda 5: En ils documents da scolaziun per las chatschadras ed ils cha­tschaders grischuns (e svizzers) vegnan tractads detagliadamain il guaud sco spazi da viver cun sias funcziuns multifaras, l'ecologia dals animals selvadis e las conse­quenzas respectivas per la chatscha sco er il management dals animals selvadis (cf. "Jagen in der Schweiz – Auf dem Weg zur Jagdprüfung", chasa editura Salm, Wohlen b. Bern 2011, chapitels 4 ss.). En ils curs da scolaziun da l'Uniun grischuna da chatschadras e chatschaders da patenta (UGCP) ed a chaschun da las 50 uras da tgira en la natira pon las candidatas ed ils candidats profitar da las experientschas praticas da las selviculturas e dals selviculturs, da las tgiradras e dals tgiraders, da las chatschadras e dals chatschaders sco er dals guardiaselvaschina. Il tema guaud e selvaschina fa part dal rom d'examen "Selvaschina ed ambient" che tutga dapi l'onn 1986 tar il program d'examen.

6 da mars 2020