Navigation

Inhaltsbereich

Sessiun: 04.12.2019

En Engiadina è l'augment latent dals camiuns da 40 tonnas fin ad ina veritabla axa da traffic da rauba sin il transit nord–sid in scenari che sto vegnir evità vehementamain. Ina colliaziun directa lada e svelta da Landeck a Clavenna è la basa per in'ulteriura axa da transit tras las Alps da Minca a Milaun.

La discussiun, sche camiuns fitg gronds (vehichels da 40 tonnas) dastgan cursar regularmain en Engiadina, dura dapi l'onn 2001. Quella giada ha la Confederaziun fatg la cunvegna davart il traffic terrester tranter la Svizra e la UE (CS 0.740.72) e la regenza grischuna l'ha surpigliada. Pass per pass èn vegnidas augmentadas las tonnaschas permessas da 28 sin 34 tonnas e sin la A13 (San Bernardin) sin 40 tonnas, quella giada anc cun 8 contingents per di.

Ina discussiun pli gronda davart la ruta dal San Bernardin ed er davart la ruta dal Güglia ha gì lieu en il cussegl grond ils 28 da matg 2002: https://www.gr.ch/Deutsch/Institutionen/Parlament/Protokolle_Sessionen/mai2002/28mai-vow.pdf.

L'autorisaziun da charrar cun vehichels da 40 tonnas sin tut las vias chantunalas (via dal Güglia, via d'Engiadina) e savens er sin las vias da colliaziun è vegnida concedida l'onn 2005. L'utilisaziun per camiuns pesants è dentant stada pussaivla mo en moda limitada, pervia dal grond dumber da stretgas e pervia dals trajects a sveltezza reducida.

La via da l'Engiadina bassa en Bregaglia sco er la via dal Güglia da la Tumleastga en Engiadina èn vegnidas renovadas pass per pass ils ultims onns, q.v.d. alingiadas e schlargiadas. Tuttas duas axas èn transiblas – fin ad intgins paucs trajects cun stretgas – senza impediments per vehichels da 40 tonnas. Las firmas da spediziun han medemamain modernisà ils vehichels pass per pass e parallelamain a la renovaziun da las vias. Sin la via d'Engiadina sco er sin las vias dal Güglia, dal Malögia e dal Bernina curseschan gia regularmain gronds camiuns a sella.

A partir dal 1. da schaner 2020 vegn la via dal Güglia reclassifitgada resp. auzada d'ina via chantunala ad ina via naziunala N29. Uschia vegn la confederaziun a decider tge vehichels da quantas tonnas che dastgan charrar sin la via. Gist en vista a l'augment dal volumen da traffic ch'è da spetgar ed en vista a l'obligaziun dal chantun da proteger la populaziun d'in tal augment sco er d'immissiuns pli grondas, fan las sutsegnadras ed ils sutsegnaders las suandantas dumondas a la regenza:

1.     Co ed en tge dimensiun vegn integrada en la strategia d'immissiuns da la regenza l'utilisaziun actuala che stuess vegnir registrada en il rom da la taxa sin il traffic da camiuns pesants dependenta da la prestaziun TTPDP?

2.     Datti ideas concretas pertutgant il futur basegn da traffic da camiuns pesants sin la via dal Güglia (en cas che la creschientscha economica resta tala e quala) sco

a) apportadra en Engiadina?

b) traject parzial d'ina axa Tusaun–Tirano?

c) traject parzial schizunt per Tusaun–Clavenna (per l'anteriura varianta imaginada dal tunnel dal Spleia)?

d) via auxiliara traversala d'ina axa Landeck–Clavenna?

3.     Renconuscha la regenza la consequenza ch'i vegn pussibilità – cun reclassifitgar la via dal Güglia – da charrar cun vehichels da 40 tonnas (chargiads cumplainamain) a media vista a 100 %?

4.     Quant enavant è la regenza pronta da far frunt ad in'axa da transit senza impediments per il traffic da rauba (inclusiv distgargias traversalas) tras l'Engiadina?

5.     Co pensa la regenza d'ir enturn cun il dilemma tranter la pretensiun da la strategia da clima 2050 da reducir la quantitad dals transports e la promoziun libra da la creschientscha economica, cumbain ch'il transferiment sin la viafier stagnescha e cumbain ch'igl è actualmain mo in giavisch da distatgar la creschientscha economica dal consum da resursas?

Cuira, ils 4 da december 2019

Preisig, Salis, Clalüna, Atanes, Baselgia-Brunner, Berweger, Brandenburger, Brunold, Cahenzli-Philipp, Casutt-Derungs, Caviezel (Cuira), Degiacomi, Deplazes (Cuira), Ellemunter, Flütsch, Gartmann-Albin, Gasser, Hofmann, Horrer, Jochum, Kappeler, Kienz, Kunfermann, Lamprecht, Maissen, Märchy-Caduff, Michael (Castasegna), Müller (Favugn), Natter, Noi-Togni, Papa, Perl, Rettich, Ruckstuhl, Rüegg, Rutishauser, Schwärzel, Thomann-Frank, Thöny, Thür-Suter, Ulber, von Ballmoos, Widmer (Favugn), Widmer-Spreiter (Cuira), Wilhelm, Zanetti (Sent), Padrun-Valentin, Pajic, Spadarotto

Resposta da la regenza

Il traject da via Tusaun – Casti – Silvaplauna è vegnì reclassifitgà a via naziunala N29 en il rom dal nov Conclus da vias naziunalas (NEB) per il 1. da schaner 2020 e transferì en proprietad da la Confederaziun. Cun il NEB resulta ina midada da proprietad e da cumpetenza da las vias existentas. L'Uffizi federal da vias UVIAS ch'è cumpetent en chaussa vegn da princip a manar vinavant il traject da via Tusaun – Casti – Silvaplauna en il stadi existent e sco via naziunala da terza classa (cun cuntratraffic e cun traffic maschadà, cun avertura da l'areal e senza saiv da protecziun cunter la selvaschina). Il traject mantegna uschia vinavant ses caracter da via principala, sche la signalisaziun resta la medema. Tenor l'infurmaziun dal UVIAS n'è la via dal Güglia betg adattada per sviar il traffic da rauba, uschia ch'ella na vegn er en il futur betg ad obtegnair ina rolla en il rom da la regulaziun dal traffic entaifer la rait da vias naziunalas. Bain è il pass dal Güglia decisiv per l'avertura da l'Engiadina sco er da las vals dal sid cunfinantas. Correspundentamain vegn la Regenza a s'engaschar er en il futur tar la Confederaziun per in engrondiment moderà resp. per l'eliminaziun da stretgas.

Tar la dumonda 1: Co ir enturn cun immissiuns da traffic resp. las mesiras per observar las valurs minimalas relevantas èn reglads en la legislaziun federala davart la protecziun da l'ambient. L'execuziun da quests relaschs è l'incumbensa dal proprietari dal stabiliment, en cas da la via naziunala N29 è pia la Confederaziun cumpetenta. Sut quest aspect èn limitadas las pussaivladads d'intervegnir dal chantun.

Ma en il "Plan da mesiras per l'igiena da l'aria, adattaziun 2016 e 2018, V3 transports ecologics da rauba" ha la Regenza prendì differentas mesiras per transferir il traffic da rauba da la via sin la Viafier retica. Questas mesiras permettan er d'influenzar en moda positiva la situaziun sin la via dal Güglia.

Tar la dumonda 2: Pertutgant il traffic da rauba vegn spetgà in grond augment sin via en l'entira Svizra. L'augment dal traffic da rauba sin la via dal Güglia sco via d'access per l'Engiadina e per las vals dal sid cunfinantas dependa cunzunt da l'agir economic, da la creschientscha dals abitadis sco er dal diever persunal en la regiun. Ord vista da la Regenza na vegn la via dal Güglia er a lunga vista betg ad avair ina impurtanza sco axa transalpina per il traffic da rauba (p.ex. sco traject parzial da las axas Tusaun – Tiran, Tusaun – Clavenna u Landeck – Clavenna). Quai mussa per l'ina il fatg che – er en cas da serradas respectivas dal tunnel dal Gottard – i na vegn betg registrà in augment signifitgant dal traffic da camiuns pesants sin il pass dal Güglia. Per l'autra han las enquistas da l'Uffizi chantunal da construcziun bassa da l'onn 2011 mussà che mo circa 15 pertschient dal traffic da rauba da la via dal Güglia ha in punct da partenza e d'arriv en las vals dal sid talianas cunfinantas e ch'il traffic da rauba na preschenta pia er nagin traffic da transit.

Tar la dumonda 3: La via dal Güglia era charrabla cun vehichels da 40 tonnas gia avant che la Confederaziun l'ha surpigliada. La reclassificaziun da la via dal Güglia n'ha pia nagina influenza sin la pussaivladad da charrar cun vehichels da 40 tonnas (chargiads cumplainamain).

Tar la dumonda 4: Sco preschentà en la resposta a la dumonda 2, na vegn – ord vista da la Regenza – la via dal Güglia er a lunga vista betg ad avair ina impurtanza sco axa transalpina per il traffic da rauba.

Tar la dumonda 5: Ils transports da rauba cun la Viafier retica, p.ex. per grossists u per la dismessa da rument, èn oz ina part respectabla e vegnan promovids vinavant (cf. resposta a la dumonda 1). La Regenza renconuscha ultra da quai che la colliaziun ch'exista oz facticamain tranter la creschientscha economica ed il consum da resursas dovria ina distgargia sche pussaivel. Correspundentamain vegn questa problematica ad esser in'axa d'agir dal plan d'acziun "Green Deal per il Grischun".

5 da mars 2020